Ekkewe Nongonongen Fefin Chon Amwa, March 2018
Iotek ren Emon me Emon Fefin ren Iter
Ach tong ngeni me pwarata ngeni kich usun ekkewe sia churi epwe watteno nupwen sia iotek faniten emon me emon fefin ren iter.
Nuku, Famini, Aninis
Ekkewe pukfen mi aiti kich usun chommong mwan me fefin mi iotek faniten ekkoch ren iter. Emon me neir mi kon amwarar mi seman Alma ewe Kukkun. Emon chon nang a kapas ngeni Alma ewe Kukkun, a ereni pwe seman “a fen iotek ren watten nuku usum … ; iei minne, ren ei popun ua feito pwe upwe pesek usun ewe manaman me mumuta an Kot, pwe ekkewe iotek an noun kewe chon angang repwe tongeni ponu anongonong won ar nuku” (Mosaia 27:14).
Ach iotek faniten pwan emon a suki netipach ach sipwe angei ekkewe feioch minne ewe Samon a mochen ngenikich. “Popun iotek esap pwe sipwe siwini netipen Kot, nge pwe kich me pwan ekkoch sipwe angei ekkewe feioch minne Kot a fen mochen ngenikich, nge akkom sipwe tingor pwe sipwe tongeni angei.”1
Emon fefin a aporausa pwe non eu fansoun osukosuk non manauan, fan chommong a angei eu kokko are text seni noun kewe fefin chon amwa non “ekkewe ran mi rochongau.” A usun ra sinei nupwen a mochen aninis. A sinei pwe ra iotek fanitan, non ar churi i me pwan nupwen ra pwisin iotek.
“Ekieki usun ach pochokun ika pwe fefin menisin ra ennetin iotek iteiten nesessor me pwin are, pwan och, iotek fansoun meinisin usun met ewe Samon a annuku,” Julie B. Beck, emon Presetenin Fin Anisi Unus me nom a apasa.2 Ach iotek fan iten ekkewe sia churi a apochokuna kich pwisin me pwan kich fefin Souneng non Fansoun Soponon.
Preseten Henry B. Eyring, Aewin Chon Aninis non ewe Aewin Presetensi a apasa: “Oupwe iotek pwe oupwe sinei mefien netiper. … Epwe namwot oupwe sinei met Kot a mochen oupwe fori ne anisir me oupwe achocho ne fori ren ami mefi an Kot tong fan iter.”3
© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Chiaku seni Visiting Teaching Principles, March 2018. Chuukese. 15049 901