Mensahe iti Visiting Teaching, Marso 2018
Ikararagan ti Tunggal Kabsat a Babai babaen ti Naganna
Dumakkelto ti ayat ken pammaregtatayo maipanggep kadakuada no sipapakumbaba nga ikararagantayo ti tunggal kabsat a babai nangnangruna no babaen ti naganna.
Pammati, Pamilia,Tulong
Ibinglay dagiti nasantuan a kasuratan ti adu a pagarigan dagiti lallaki ken babbai a nangikararagan kadagiti dadduma babaen ti naganda. Maibilang kadagiti makasagid-rikna ket ti ama ni Alma nga Ub-ubing. Nakisao ti maysa nga anghel ken ni Alma nga Ub-ubing, a mangibagbaga kenkuana a ti amana ket ”nagkararag a napnuan pammati maipanggep kenka … ; ngarud, daytoy ti gapu ti immayak tapno allukoyenka iti bileg ken turay ti Dios, tapno masungbatan ti karkararag dagiti katulonganna a maibatay iti pammatida” (Mosiah 27:14).
Ti panangikararagan iti tunggal maysa ket manglukat iti puspusotayo nga umawat kadagiti bendision a tartarigagayan ti Apo nga ited kadatayo. Ti panggep ti kararag ket saan a mangbalbaliw iti pagayatan ti Dios ngem ketdi mangpatalged para iti bagbagitayo ken para iti dadduma kadagiti bendision a siaayat nga ipaay ti Dios, ngem nasken a kiddawentayo tapno magun-odtayo.”1
Maysa a kabsat a babai ti nangisalaysay a kabayatan ti narigat a panawen ti biagna, ti tawag iti telepono wenno simple a mensahe iti teks ti masansan nga aggapu kadagiti visiting teacherna kadagiti “nangnangruna a nalidem nga aldaw.” Kasla ammoda a kasapulanda laeng ti panangparegta. Ammona nga inkararaganna ida, agpada a kabayatan dagiti isasarungkar ken iti bukodda.
“Panunoten ti nagtipon a pigsatayo no naimpusuan a nagkararag ti maysa a kabsat a babai iti tunggal bigat ken rabii, wenno, nasaysayaat, awan sardayna nga agkararag kas iti imbilin ti Apo,” kinuna ni Julie B. Beck, sigud a General Relief Society President.2 Ti panangikararagan kadagiti sarungkaran ken suruantayo ket mangpapigsa kadatayo kas tao ken kas babbai a Santa iti ud-udina nga aldaw.
Kinuna ni Presidente Henry B. Eyring, Umuna a Mammagbaga iti Umuna a Panguluen: “Ikararaganyo ti wagas tapno maammuan ti kaungganda. … Nasken a maammuanyonto no ania ti ipaaramid ti Dios kadakayo a makatulong kadakuada ken aramiden amin daytoy, agingga a kabaelanyo, a mangrikna iti ayat ti Dios para kadakuada.”3
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching principles, March 2018. Ilokano. 15049 864