Mensahe ti Umuna a Panguluen, Marso 2018
Ti Balikas ti Dios kadagiti Annakna
Ni Presidente Dieter F. Uchtdorf
Maikadua a Mammagbaga iti Umuna a Panguluen
Ibaga dagiti nasantuan a kasuratan kadatayo a ti umuna a banag nga inaramid ti Dios kalpasan ti panangparsuana iti lalaki ken babai ket kinasaona ida.1 Adda napateg a pakaammo ken napateg a pangiturong nga intedna kadakuada. Ti panggepna ket saan a mangpadagsen wenno mangburibor kadakuada ngem di ketdi mangtarabay kadakuada iti kinaragsak ken iti agnanayon a gloria.
Ket dayta laeng ti nangrugianna. Manipud iti dayta nga aldaw agingga itoy, intultuloy ti Dios ti nakisao kadagiti annakna. Dagiti balikasna ket tinaginayon, impateg, ken inadal dagiti disipulona iti tunggal henerasion. Dagitoy ket dinayaw dagiti nagkalikagum a mangammo iti pagayatan ti Dios, ket pinaneknekanda iti kinapudno nga “awanto ti aramiden ti Dios, no di ipalgakna ti palimedna kadagiti katulonganna a dagiti propeta.”2
Daytoyen ti pagtuladan manipud pay idi punganay ti panawen, ken agtultuloy ti pagtuladan agingga iti agdama. Daytoy ket saan laeng a napintas nga estoria iti Biblia; daytoy ti naipasdek a wagas ti Dios a panakaisao dagiti napapateg a mensahe kadagiti annakna. Intag-ayna dagiti tao manipud iti nagbabaetantayo, inawaganna ida nga agbalin a propeta, ken inikkanna ida kadagiti balikas nga isawang a nakaawisantayo nga “umawat, a kasla naggapu iti bukod[na] a ngiwat.”3 Impakdaarna, “Babaen man ti bukodko a timek wenno babaen ti timek dagiti katulongak, agpada daytoy”4
Daytoy ti maysa kadagiti kadayagan, karegtaan, ken makanamnama unay a mensahe ti Panakaisubi—saan a naulimek ti Dios! Ay-ayatenna dagiti annakna. Saannatayo a pinanawan tapno mayaw-awan iti kasipngetan.
Mamindua iti tunggal tawen, iti Abril ken Oktubre, addaantayo iti gundaway a dumngeg iti timek ti Apo babaen dagiti katulonganna kadagiti nakaskasdaaw a sapasap a komperensiatayo.
Personal a paneknekak kadakayo a nabayag sakbay a makapagsarita iti podium ti maysa a bumibitla iti sapasap a komperensia, nakaaramiden iti dakkel a panagkagumaan, panagkararag,ken panagadal kas sungbat iti naituding a panagsaritana. Tunggal mensahe iti komperensia ket mangibagi iti saan a mabilang nga oras ti panagsagana ken naimpusuan a pakaasi tapno maawatan no ania ti tarigagayan ti Apo a mangngegan dagiti Santona.
Ania ti mabalin a mapasamak no datayo kas dumdumngeg ket ituladtayo ti bukodtayo a panagsagana iti panagsagana dagiti bumibitla? Kasano a maiduma ti approachtayo iti sapasap a komperensia no nakitatayo a ti komperensia ket maysa a gundaway tapno umawat kadagiti mensahe manipud iti Apo Mismo? Babaen dagiti balikas ken musika ti sapasap a komperensia, manamnamatayo ti umawat kadagiti personal a sungbat kadagiti ania man a saludsod wenno problema a mabalin a pakaipaspasanguantayo.
No panunotenyo no talaga a makisaritanto kadakayo ti Nailangitan nga Ama, ipalagipko kadakayo dagiti simple ngem naipangpangruna a balikas a kankantaen dagiti ubbing iti Primary: “[Dakayo] ti anak ti Dios, imbaonna[kayo] ditoy.” Panggepna a tulongannakayo nga agsubli “nga agnaed iti sidongna iti maysa nga aldaw.”
No asitganyo ti Nailangitan nga Ama kas anakna, maidawatmo Kenkuana nga addaan iti napudno a puso, “Iturongnak, idalannak, tarabayennak. Isuronak ti aramidek.” Makisaritanto kadakayo babaen ti Nasantuan nga Espirituna, ken adda kadakayo no “aramidenyo ti pagayatanna.” Ikarik kadakayo a no aramidenyo, “nakasagana dagiti nawadwad a bendision.”5
Kasapulan ita ti pannarabay ti Apo kas iti panagkasapulan unay iti pakasaritaan ti lubong. Bayat ti panagsaganatayo a dumngeg iti balikas ti Apo, makapagtallugodtayo koma nga agkalikagum a manggun-od iti Espiritu ti kinapudno tapno no agsarita ti Apo babaen dagiti katulonganna, makaawattayo, mapadur-astayo, ken agrag-otayo a sangkamaysa.6
Paneknekak a “babaen ti panangaramid[tayo] kadagitoy a banag saanto nga agballigi [kadatayo] dagiti ruangan ti impierno; wen, ket paksiatento ti Apo a Dios dagiti bileg ti kasipngetan iti imatang[tayo], ket padayyegennanto dagiti langit nga agpaay iti pagimbagan[tayo], ken iti dayag ti naganna.”7
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, March 2018 Ilokano. 15049 864