Pedped in Katak ko an Kōra ro, Maaj 2018

Jar kōn Kajjojo Sister ilo Am̧ Kwaļo̧k Kajjojo Etaer

Ad iakwe im kea kōn ro jej loļo̧k er enaaj ļapļo̧k n̄e jej jar ilo ettā kōn kajjojo sister eļaptata ilo ad kwaļo̧k kajjojo etaer.

Jeje ko rekwojarjar rej kwaļo̧k elōn̄ waanjon̄ok ko kōn em̧m̧aan ro im kōrā ro raar jar kōn aer kwaļo̧k etan ro jet. Ilubwilijin elōn̄ iaan armej ro ban meļo̧kļo̧k ej jemān Alma Alma eo Edik. Juon enjeļ eaar kōnono n̄an Alma eo Edik, jiron̄ ļo̧k e bwe jemān “[eaar] jar eļap kōn tōmak kōn eok … ; kōn menin, kōn un in iaar itok n̄an kareel buruōm̧ kōn kajoor im maron̄ an Anij, bwe jar ko an ro karejeran ren maron̄ uwaak ekkar n̄an aer tōmak” (Mosaia 27:14).

Jar kōn doon ej kōppeļļo̧k būruwōd n̄an bōk kōjeraam̧m̧an ko me Irooj ekōņaan letok n̄an kōj. “Jibadbad eo an jar ejjab tin ukōt ankilaan Anij, ak n̄an kōjparok kōj make im kōjeraam̧m̧an ko jet me Anij ej m̧ōņōņō in litok, ak jej aikuj in kajjitōk n̄an būki.”¹

Juon sister eaar kwaļo̧k bwe ilo juon iien epen ilo mour eo an, juon kūr ak juon ennaan ekkā an itok jān rūkaki in loļo̧k ko an kōrā ilo “raan ko remarok.” Raar baj jeļā wōt n̄e ej aikuj jipan̄. Eaar jeļā bwe raar jar kake e, jim̧or ilo iien aer loļo̧k im iien ko aer make.

“Ļōmņak kōn kobain kajoor eo ad make eļan̄n̄e aolep sister rej lukkuun jar kajjojo jibbon̄ im jota ak, em̧m̧anļo̧k, jar im jab kijeļo̧k āinwōt an Irooj kakien,” Julie B. Beck, kar Būreejtōn eo m̧okta an Doulul eo an Kōrā.² Jar kōn ro jej loļo̧k er n̄an kōkajoor kōj kajjojo im āinwōt kōrā ro Rekwojarjar.

Būreejtōn Henry B. Eyring, Rikakpilōklōk eo Kein Kajuon ilo Būreejtōnji eo Kein Kajuon, eaar ba: “Jar kōn wāween jeļā būruweer. … Kwonaaj aikuj in jeļā ta eo Anij ekōņaan bwe kwon kōm̧m̧ane n̄an jipan̄ er im n̄an kōm̧m̧ani aolepāer, ilo jon̄an wōt eo komaron̄e, en̄jake iakwe an Anij n̄an er.”³

© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an Visiting Teaching Principles, March 2018. Marshallese. 15049 874