Ennaan eo an Būreejtōnji eo Kein Kajuon, M̧aaj 2018
Naan eo an Anij n̄an Ajri ro Nejin
Jān Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Jeje ko rekwojarjar rej jiron̄ kōj bwe men eo m̧oktata Anij eaar kōm̧m̧ane ālkin kōm̧anm̧an m̧aan im kōrā eaar kōnono n̄an er.1 Ewōr Ippān meļeļe im katak ko raorōk n̄an liļo̧k n̄an er. Jibadbad eo An eaar jab n̄an kaddodo ak kainepataik er ak n̄an tōl er n̄an m̧ōņōņō im aiboojoj indeeo.
Im eaar baj jinoin wōt eo. Jān raan eo n̄an iien in, Anij eaar kōnono wōt n̄an Ajri ro Nejin. Naan ko An kar kōjparoki, kar kaorōki, im kar ekkatak jān rikaļoor ro ilo kajjojo epepen. Raar kaorōki jān ro rej kappukot n̄an jeļā ankilaan Anij, im rej kwaļo̧k kam̧ool kōn m̧ool eo me “Irooj e jab kōm̧m̧an jabdewōt n̄e ab Ej kwaļo̧k pepe eo An n̄an ri karijeran, ri kanaan ro.”2
En̄in kar baj jon̄ak eo jān jinoin, im bwe jon̄ak in ej wōnm̧aanļo̧k rainin. Ejjab baj juon bwebwenato ilo Baibōļ; ej wāween kōnono eo eaorōk Anij ekar ejaake n̄an ajri ro Nejin. Eaar kālet jet jān ilubwiljiid, kūr er rikanaan ro, im leļo̧k n̄an er naan ko n̄an ba, eo jej ruwainene n̄an “bōke, āinwōt n̄e ej jān lon̄iin [Make].”3 Eaar kwaļo̧k, “Mekarta jān Ainikiō make ak jān ainikien ro rikarejera, ej āinwōt juon.”4
En̄in ej juon iaan ennaan ko raiboojoj, rekōbbakkak, im kōjatdikdik eo an Jepļaaktok in—Anij ejjab ikōn̄! Ej iakwe aolep ajri ro Nejin. Eaar jab likūt kōj n̄an etetal ilo marok.
Ruo alen ilo kajjojo iiō, ilo Eprōļ im Oktoba, ewōr ad iien em̧m̧an n̄an ron̄ ainikien Irooj jān ro Rikarejeraņ ilo kweilo̧k eo eļap ad raiboojoj.
Ij lewaj aō make kam̧ool bwe m̧okta jān juon rikōnono ilo kweilo̧k eo eļap ej itok n̄an lokatok in, eaar pukot eļap kijejeto ilo, jar, im ekkatak n̄an unin kōnono eo n̄an kōnono. Kajjojo ennaan ilo kweilo̧k eo ebōk awa ko in kōppopo im būruwōn wūjlepļo̧k n̄an meļeļe ta eo Irooj ej kōņaan bwe Armej ro An Rekwojarjar ren ron̄jake.
Ta emaron̄ waļo̧k n̄e kōj āinwōt riron̄jake ro keidi kōppopo eo an rikōnono ro’ ippān eo ad make? Elmen an oktak ad jibadōkļo̧k kweilo̧k eo eļap eļan̄n̄e jej lo kweilo̧k eo āinwōt juon iien em̧m̧an n̄an bōk ennaan ko jān Irooj Make? Jen naan im al ko ilo kweilo̧k eo eļap, jej maron̄ in bōk uwaak ko ad make n̄an jabdewōt kajjitōk im būrabōlōm̧ ko jej jelm̧ai.
Kwonan̄in ke ļōmņak n̄e Jemedwōj Ilan̄ enaaj lukkuun kōnono n̄an eok, imaron̄ kakeememej eok kōn juon enaan epidodo loi ilo naan ko me ajri ro nejiid ilo Būraimere rej al kake: “[Kwoj] ajri nejin Anij, im eaar jilkintok [eok] n̄an ijin.” An jibadbad ej n̄an jipan̄ eok jepļaak “im mour ippān juon raan.”
Eļan̄n̄e kwoj kepaakļo̧k Jemedwōj Ilan̄ āinwōt ajri Nejin, komaron̄ kajjitōk Ippān kōn bōro em̧ool, “tōl iō, ļoor iō, etetal ippa, jipan̄ eō aolep iien. Katakin eō aolep men.” Enaaj kōnono n̄an eok kōn Jetōb Kwojarjar eo An, innām ej am̧ pepe “n̄an kōm̧anm̧an ankilaan.” Ij kallim̧ur bwe eļan̄n̄e kwoj kōm̧m̧ane, “enaaj kōjeraam̧m̧an eok.”5
Tōl eo an Irooj ej menin aikuj rainin jen kar m̧okta ilo bwebwenato in laļ in. Ilo ad m̧aanjabpopo n̄an ron̄ ainikien Irooj, jān tiljek kappukot Jetōb in m̧ool eo bwe n̄e Irooj ej kōnono n̄an ro Rikarejeraņ, jen maron̄ meļeļe, juon wōt, im m̧ōņōņō ippān doon.6
Ij kam̧ool bwe “jān kōm̧m̧ani men kein aor ko an hell rej jamin anjo̧ ņae [kōj]; aaet, im Irooj Anij enaaj kajjeplōklōk kajoor ko an marok jān [im̧aad], im kōm̧m̧an bwe lan̄ ko ren wūdiddid n̄an em̧m̧an eo ami, im aiboojoj an Etan.”7
© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, March 2018. Marshallese. 15049 874