Parau tumu nō te hāhaerera’a a te mau tuahine, Māti 2018

Pure nō te mau tuahine tāta’itahi ma te fa’ahiti i tōna iho i’oa

E rahi mai tō tātou here ’e tō tātou fa’aurura’a nō te feiā tā tātou e hāhaere ra, ’ia pure ana’e tātou ma te ha’eha’a nō te tuahine tāta’itahi, ’e hau atu ’ia fa’ahitihia tō rātou i’oa.

Te Fa’aro’o, Te ’Utuāfare, Te Tōtauturu

ʼUa fa’a’ite mai te mau pāpaʼiraʼa moʼa e rave rahi mau hi’ora’a o te mau tāne ’e te mau vahine tei pure nō vetahi ’ē ma te fa’ahiti i tō rātou i’oa. I roto i te mea fifi mau o te metua tāne ïa o Alama tamaiti. ’Ua paraparau te hō’ē melahi ia Alama tamaiti, ma te parau ē « ’ua pure ho’i [tōna metua tāne] ia ’oe ma te fa’aro’o rahi… ’e nō reira i haere mai ai au e fa’a’ite atu ia ’oe na i te mana ’e te pūai o te Atua ra, ’ia fa’ati’ahia te pure a tōna ra mau tāvini mai te au i tō rātou ra fa’aro’o » (Mosia 27:14).

Te purera’a nō te tahi ’e te tahi, e ’īriti ïa i tō tātou ’ā’au nō te fāri’i i te mau ha’amaita’ira’a o tā te Fatu e hina’aro ra e hōro’a mai nō tātou. « Te fā o te pure e ’ere ïa i te tauira’a i te hina’aro o te Atua, o te fāri’ira’a rā nō tātou iho ’e nō vetahi ’ē i te mau ha’amaita’ira’a tā te Atua i ineine i te hōro’a mai, e tītauhia rā ia tātou ’ia ani nō te fāri’i ».¹

’Ua fa’ati’a mai te hō’ē tuahine ē, i roto i te hō’ē tau fifi o tōna orara’a, e tae pinepine mai te hō’ē niuniu ’aore rā te hō’ē parau poro’i ’ōhie nā roto mai i tōna mau tuahine hāhaere, i « te mau mahana hepohepo mau iho ā rā ». E au ra ē, ’ua ’ite maita’i rāua i te taime e hina’aro ai ’oia i te tauturu. ’Ua ’ite ’oia ē, tē pure nei rāua nōna, ’oia ho’i i te mau taime e fārerei ai rātou ’e i te mau taime o rāua ana’e iho.

« ’A feruri na i tō tātou pūai ’ia ’āmuihia, mai te peu e pure te tuahine tāta’itahi ma te ’ā’au tae i te mau po’ipo’i ’e i te mau pō ato’a, hau atu ā, ’ia pure tu’utu’u ’ore mai tā te Fatu i fa’aue mai », ’ua parau ’o Julie B. Beck, peresideni rahi tahito nō te Sōtaiete Tauturu.² E ha’apūai te purera’a nō te feiā tā tātou e hāhaere ra, ia tātou ’ei ta’ata iho ’e ’ei mau vahine feiā mo’a i te mau mahana hope’a nei

’Ua parau te peresideni Henry B. Eyring, tauturu hō’ē i roto i te Peresidenira’a Mātāmua ē : « E pure atu ’outou nō te rāve’a ’ia ’ite i tō rātou ’ā’au… Tītauhia ’ia ’ite mai ’outou i te mea tā te Atua e hina’aro ’ia rave ’outou nō te tauturu ia rātou ’e ’ia rave pauroa i te reira, i te fāito maita’i roa a’e e roa’a ia ’outou, ma te putapū i tō te Atua here nō rātou ».³

© 2018 nā te Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō te Visiting Teaching Principles, March 2018. Tahitian. 15049 895

Fa’ata’ara’a

1. Arata’i o te pāpa’ira’a mo’a, « pure ».

2. Julie B. Beck, « Te mea tā te mau vahine feiā mo’a i te mau mahana hope’a nei e rave maita’i a’e : ’Ia ti’a pa’ari ’e te ’āueue ’ore », Liahona,Novema 2007, 110.

3. Henry B. Eyring, « Te autahu’ara’a ’e tā ’oe iho pure », Liahona, Me 2015, 85.

’A feruri i teie

E aha te mau fa’aurura’a ’e te mau mana’o, ’aita i maoro a’enei tei tae, mai ia ’outou, ’a pure ai ’outou nō te mau tuahine o tā ’outou e hāhaere ra ?

Tāvinira’a

Te purera’a nō te tuahine tāta’itahi nā ni’a i tōna iho i’oa, e fāri’i tātou i te hō’ē fa’aurura’a o te ta’ata iho nō te ’ite mai nāhea tātou ’ia pāhono i te mau hina’aro o te tuahine tāta’itahi o tā tātou e hāhaere ra.