Parau poro’i a te Peresidenira’a Mātāmua, Māti 2018

Te parau a te Atua i tāna mau tamari’i

Nā te peresideni Dieter F. Uchtdorf

Tauturu piti i roto i te Peresidenira’a Mātāmua

Hōho’a

Peresideni Dieter F. Uchtdorf

Tē parau nei te mau pāpa’ira’a mo’a ē te ’ohipa mātāmua tā te Atua i rave i muri a’e i te hāmanira’a i te tāne ’e te vahine o te paraparaura’a ïa ia rāua.¹ E ha’amāramaramara’a hina’arohia ’e e mau arata’ira’a faufa’a roa tāna i hōro’a ia rāua. E ’ere tāna ’ōpuara’a nō te fa’ateimaha ’aore rā nō te ha’ape’ape’a ia rāua, nō te arata’i rā ia rāua i te ’oa’oa ’e te bāsileia mure ’ore.

’E o te ha’amatara’a noa te reira. Mai te reira mahana mai ā, ’ua tāmau noa te Atua i te paraparau i tāna mau tamari’i. ’Ua fa’ahereherehia, ’ua herehia ’e ’ua tuatāpapahia tāna mau parau ’e te mau pipi o te mau u’i tāta’itahi. E mea fa’aturahia rātou e te feiā e ’imi nei ’ia ’ite i te hina’aro o te Atua, ’e tē fa’a’ite pāpū nei rātou i te parau mau ē : « ’aita ā te Fatu ra a Iehova e peu i rave maori rā ’ia fa’a’ite i tāna parau i mo’e i tāna ra mau tāvini i te mau peropheta ».²

O te reira te hōho’a mai te ha’amatara’a mai o te tau, ’e te tāmau noa ra te hōho’a e tae roa mai i teie mahana. E ’ere noa i te hō’ē ’ā’amu nehenehe o te Bibilia ; o te huru ra i ha’amauhia e te Atua nō te fa’a’ite i te mau parau poro’i faufa’a roa i tāna mau tamari’i. ’Ua aupuru mai ’oia i te mau ta’ata nō rotopū mai ia tātou, ’ua pi’i ia rātou ’ia riro ’ei mau peropheta, ’e ’ua hōro’a ia rātou te mau parau e parau, o te ani-manihini-hia ia tātou ’ia « fāri’i… mai te mea ra ē nō roto i [tōna] iho vaha ».³ ’Ua parau ’oia, « nā roto i tō’u iho reo ’e ’aore rā, nā roto i te reo o tā’u mau tāvini, hō’ē ā ïa ».⁴

Teie hō’ē o te mau parau poro’i hanahana roa a’e, itoito a’e ’e te ti’aturi a’e o te fa’aho’i-fa’ahou-ra’a mai—E’ita te Atua e muhu ’ore ! ’Ua here ’oia i tāna mau tamari’i. ’Aita ’oia i vaiiho haere ’ē noa ia tātou i roto i te pōiri.

E piti taime i te matahiti, nā ’āva’e ’ēperēra ’e ’ātopa, e rāve’a nō tātou ’ia fa’aro’o i te reo o te Fatu nā roto mai i tāna mau tāvini i roto i tā tātou mau ’āmuira’a rahi fa’ahiahia.

Tē fa’a’ite pāpū nei au iho ia ’outou ē, e mea maoro nā mua a’e te hō’ē ta’ata a’o i te ’āmuira’a rahi e rave ai i teie ta’ahira’a ātea i te fata, ’ua hōro’a ’oia i te mau tauto’ora’a rahi, te pure, ’e te tuatāpapara’a ’ei pāhono i te tītaura’a ’ia paraparau. E tītau te parau poro’i tāta’itahi o te ’āmuira’a e rave rahi hora nō te fa’aineinera’a ’e te paraura’a ma te ’ā’au tae nō te ta’a maita’i e aha tā te Fatu e hina’aro ’e ’ia fa’aro’o tāna mau feiā mo’a.

E aha te tupu mai, mai te peu tātou te mau ta’ata fa’aro’o e ’āmui atu i te fa’aineinera’a a te mau ta’ata a’o ’e tā tātou iho ? Nāhea tō tātou pirira’a atu i te ’āmuira’a rahi e riro ai e mea ta’a ’ē mai te peu e hi’o tātou i te ’āmuira’a mai te hō’ē rāve’a nō te fāri’i i te mau parau poro’i nō ’ō mai i te Fatu iho ? Nā roto mai i te mau parau ’e te mau hīmene o te ’āmuira’a rahi, e nehenehe tātou e fāri’i i te mau pāhonora’a ta’a ’ē i tā tātou iho mau uira’a ato’a ’aore rā i te mau fifi o tā tātou e fa’aruru nei.

Mai te mea e uiui māere ’outou ē, e paraparau mau ānei te Metua i te Ao ra ia ’outou, e fa’aha’amana’o atu vau ia ’outou i te mau parau ’ōhie hōhonu , e hīmenehia ra e tā tātou mau tamari’i i te paraimere: « E tamari’i [’outou] nā te Atua ra, [’e ’ua tono mai ’oia ia ’outou i’ō nei] ». Tāna ’ōpuara’a, ’o te tauturura’a ïa ia ’outou ’ia ho’i « ’ia ora iāna ra».

Mai te peu e ha’afātata atu ’outou i te Metua i te Ao ra ’ei tamari’i nāna, e nehenehe ’outou e ani iāna ma te ’ā’au tae, « arata’i mai iā’u i te ’ē’a mau parau mai te tano iā’u [i te rave] ». E parau mai ’ōna ia ’outou nā roto mai i tōna Vārua Maita’i, ’e i muri iho nā ’outou « e rave i tōna hina’aro ». ’Ua fafau mai ’oia ē mai te peu e rave ’outou, « e mau ha’amaita’ira’a tao’a rahi tei fa’ahereherehia ».⁵

E mea faufa’a roa te mau arata’ira’a a te Fatu, hau atu ā i teie mahana mai tei nā reira noa na i roto i te ’ā’amu o te ao nei. ’A fa’aineine ai tātou ia tātou nō te fa’aro’o i te parau a te Fatu, ’ia ’imi itoito atu tātou i te vārua parau mau, i te mea ē ’ia parau ana’e te Fatu nā roto i tāna mau tāvini, e nehenehe tātou e māramarama, e ha’apūaihia ’e e ’oa’oa ’āmui.⁶

Tē fa’a’ite pāpū nei au ē « nā roto i te ravera’a i teie nei mau mea e ’ore roa ’outou e noa’a i te mau ’ūputa o hade ; oia ïa, ’e nā te Fatu ra o te Atua e ha’apurara ’ē atu i te mau mana nō te pōuri mai mua atu ia ’outou, ’e e fa’a’āueue ho’i i te ra’i ’ei maita’i nō ’outou nā, ’e i tō tōna i’oa ra hanahana ho‘i ».⁷

© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō First Presidency Message, March 2018. Tahitian. 15049 895

Ha’api’ira’a nō roto mai i teie parau poro’i

I roto i te ’āmuira’a rahi e nehenehe tātou e fāri’i i te mau pāhonora’a ta’a ’ē i tā tātou iho mau uira’a ’e i tō tātou iho mau fifi, ’a fa’aro’o ai tātou i te mau tāvini a te Atua o tei fa’ata’ahia. ’Ā ’ōpua ’ia ’āparau ’e te feiā tā ’outou e ha’api’i ra i teie i muri nei : Nāhea ’outou ’ia fa’aineine ’ia ’outou nō te fāri’i i teie mau pāhonora’a i te ’āmuira’a rahi ? ’Ua fa’aitoito te peresideni Uchtdorf ia tātou ’ia « ’imi itoito atu i te vārua parau mau ». E aha tō ’outou mana’o i te aura’a o te reira, ’e nāhea ’outou i te fa’aō atu i te reira i roto i tā ’outou fa’aineinera’a ? Hau atu i te mau ha’amaita’ira’a i fa’ahitihia i roto i te Parau Ha’api’ira’a ’e te mau Parau Fafau 21:6, e aha te tahi atu mau ha’amaita’ira’a e tae mai ’a fa’aineine ai ’outou ia ’outou nō te fa’aro’o i te mau parau a te Fatu nā roto mai i tāna mau tāvini ? ’A ani manihini i te feiā tā ’outou e ha’api’i ra ’ia pāpa’i i roto i te hō’ē buka ’ā’amu e aha tā te Vārua i ha’api’i mai ia rātou i roto i teie ’āmuira’a rahi.