Mulwol ko Bin Somm’on e Presidency, March 2018

Fare Thin rok Got ngak Pifak

Ni yib ku President Dieter F. Uchtdorf

Bin L’agruw e Counselor u lane Bin Somm’on e Presidency

siasing/Llecheklel

President Dieter F. Uchtdorf

Fare chepen nib thothup ma weliy ni bin somm’on e ngongol ni ke rin’ Got tomur ni ke sunmiy pumo’on nge ppin e ke non ngak.¹ Bay gonop ni thabi ga’ fan nge thabi fel’ t’uf ni nge pi’ ngorow. Fan rok ni dabi’ pi magawon fa ruus ngorow machane powi’iy rorow nga falfalaen’ nge fal’ngin nib manemus.

Ma biney ni kemus e tabab. Mada’ ko e rran nem, Got ma non ngak pi fak. Ke thap e thin Rok, ba’adag, nge bi’eg urngin e gachelpen ulan gubin ningyal’. Ya ba’adag riy pi gidii’ nibe guyed nang fan fare tin ba’adag Got, nge yad be pii’ michriy ko tin riyul’ ni “I Somoel ni Th’abi Tolang e dariy ban’en nma rin’ nder ma dag ngak e pi profet, ni aram e pi tapigpig rok.”²

Ireray e yal’uweg ke buch kakrom nge mada’ ko chiney, nge yal’uweg ma ul’ul’ daba. Gathi kemus e yaat’ nib mangil u lan fare Bible; ni’ir e rogon rok Got ni ma weliy e mulwol rok ngorad pi Fak. Ma tinning ngalang bochi gidii’ ufithikdad, duwgliy rad pi profet, nge pii’ ngoraed fapi thin nib t’uf ni ngar yoeged, tiney ma piningdad ni ngad “thapeged, ni boed nike yib u langan.”³ Nike weliy, “Fa’an udakaen e lamag fa e lamrad ko tapigpig rog, ba ta’abrogon.”⁴

Mulwol ney e bang ko Fulweg nga chilan rogon ma be pii’ athamgil nge athap ngodad—Got e gathi dariy luman! Ba tu’uf pifak Rok. De pag dad ni ngad dared ufithik e lumor.

L’agruw i yay gubin e duw, ko April nge October, rayog ni ngad runga’aged e lam Somel ufithik e pigpig Rok ulangin pi general conference nib mangil.

Gube micheg ngomed ni u’mon ba paer cha’ ko podium ulan general conference, cha’nem ke muruwliy nib yo’or, ke meybil, me fil marunga’agen e tin ni ngan non. Kan ta’ermadliy nge meybil nib yo’or ko pi mulwol nu conference ni wenig ngak somoel ni ke nang fan mang ni ba’adag pi chongin ni runga’aged.

Mang e ra buch fa’an ni ngad ta’erdamilyed ni boed rogon fapi tanonnon? Urogon nira thilyeg e ba’adagdad nifan general conference fa’an ni ngad nanged e conference e ma pii’ ngodad pi mulwol rok Somoel? Ufithik e pi thin nge pi tang ko general conference, gadad ra nanged ni ngad thapeged e fulweg ko demtrug e pi dewer fa magawon rodad.

Fa’an ni ngam lemnag fa’anra Chitimangiy ni bay nu Tharmiy e ra non ngom, Gube pug uran ngomed ni fan e pi thin nib moem nge thabi fel’ rogon e pi bitir ku Primary ma yoen’ed: “[Gur] e bitir ku Got, nge ke l’ugeg ura’.” Fan rok ni ma ayuwegdad ni ngad suloed “ni ra paer rok bi’id.”

Fa’an ni ngam yib nga Chitamangiy ni Tharmiy ni boed e fak, gimed ra fith Ngak u fithik’ e l’agaen’ u gum’ircha’ey, “Wawliyeg, powi’iyeg, Dag eg tunom rom. Fil ngog tin thingar gu rin’.” Ra non ngom ufithik fare Kan ni Thothup, nge tomur rangam mel’eg ni ngam “rin’ laniyaen’ rok.” Gube micheg ni fa’an gara rin’ biney, “pi tawa’ath ra yib.”⁵

Ba t’uf e powi’iy rok Somoel daba’ ni boed rogon ni kakrom. Napan ni ngad fal’egdad ni ngad runga’aged e thin rok Somoel, gube athap ni ngad gay rogon ni thapeg fare Kan Thothup ere napan ra non Somoel udaken e pi tapigpig Rok, rangam nangfan, fil’ed, nge falfalan’dad u ta’abang.⁶

Gube micheg “napan ni ngam rin’ed tin’ey ma fapi garog nu infierno e dabiyog ni nge togopluw ngo[dad]; aragon, nge Somoel Got ra chel e gelingin lumor [rodad], nge ra rurrur e tharmiy ni fandad, nge fithingan nib fel’ngin.”⁷

© 2018 rok Intellectual Reserve, Inc. Gubin mabay matwon Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg e thin ko First Presidency Message, March 2018 Yapese 15049 905

Rogon ni ngan Fil e Biney e Mulwol

Rayog ni ngad thapeged e fulweg ko demtrug e pi dewer fa magawon rodad ufithik general conference napan ni ngad motoyilgad ngak fapi tapigpig rok Got. Mu lemnag rogon ni ngam weliy tiney ngak pi gidii ngam machib: Urogon ni ngam fal’eg ni ngam thapeg a fulwegem napan bay general conference? President Uchtdorf be pi athamgil ngodad ni ngad “gay rogon ni thapeg fare Kan Thothup.” Mang gama lemnag e tiney be yip’fan, nge urogon e rayog ni ngam tay biney ulan e ta’erdamily romed? Ko reb e pi ta’awath ke weliy ulan Muguy ko Doctrine and Covenants 21:6., mang reb e tawa’ath ra yib ngom napan gara ta’ermadliy ko motoyil e pi thin rok Somoel udakaen e tapigpig Rok? Rangam pinning raed pi cha’en ni gabe fil ni ngar yol ulan e journal e pi’nen nike fil fare Kan Thothup ngoraed ulane general conference ney.