Mensahe sang Unang Panguluhan, Nobyembre 2018
Partisipasyon sang mga Sister sa Pagtipon sang Israel
Ni Pangulong Russell M. Nelson
Bilang propeta nagapangabay ako sa inyo, mga kababayin-an sang Simbahan, nga pormahon ang palaabuton paagi sa pagbulig nga matipon ang nagalinapta nga Israel.
Kanami nga makaupod kamo, mahal kag hamili kong mga sister. Ayhan ang isa ka eksperiyensya sang sini lang makahatag sa inyo sang ideya kon ano ang akon nabatyagan para sa inyo kag sa langitnon nga mga ikasarang nga ginbugay sa inyo.
Isa ka adlaw samtang nagahambal ako sa isa ka kongregasyon sa South America, ginkunyag gid ako sa akon topiko, kag sa sinang importante nga tion, nagsiling ako, “Bilang iloy sang 10 ka kabataan, masugiran ko kamo nga …” Kag nagpadayon ako sa pagtapos sang akon mensahe.
Wala ko narealisar nga nahambal ko ang tinaga nga iloy. Gin-islan ang tinaga nga iloy sa amay sang akon taglubad, nga naghaumhaum nga nagsala ako sa paghambal, gani wala gid nakahibalo ang kongregasyon nga gintumod ko ang akon kaugalingon bilang iloy. Pero nabatian ini sang akon asawa nga si Wendy, kag naham-ot sia sa pagsala ko sang hambal.
Sa sina nga tion, ang ginahandum gid sang akon tagipusuon nga maghimo sang kinalain sa kalibutan—nga mahimo lamang sang isa ka iloy—nagpangibabaw sa akon tagipusuon. Sa pagligad sang mga tinuig, kon pamangkuton ako ngaa ginpili ko mangin doktor, amo lang ina sa gihapon ang akon sabat: “Bangod indi ko pwede pilion nga mangin isa ka iloy.”
Palihog talupangda nga kon gamiton ko ang tinaga nga iloy, wala ako nagahambal lamang parte sa mga babayi nga nagpamata ukon nag-adoptar sang kabataan sa sining kabuhi. Nagahambal ako parte sa tanan nga hamtong nga mga anak nga babayi sang aton Langitnon nga mga Ginikanan. Angtagsa ka babayi isa ka iloy bangod sa iya wala’y katapusan nga diosnon nga katuyoan.
Gani karon nga gab-i, bilang amay sang 10 ka kabataan—siyam ka babayi kag isa ka lalaki—kag bilang Pangulo sang Simbahan, ginapangamuyo ko nga marealisar ninyo ang akon gid nabatyagan sa inyo—sa kon sin-o kamo kag sa tanan nga maayo nga sarang ninyo mahimo. Wala sang makahimo sang mahimo sang isa ka matarong nga babayi. Wala sang makakopya sang impluwensya sang isa ka iloy.
Ang mga lalaki sarang kag masami nga makapabutyag sang gugma sang Amay nga Langitnon kag sang Manluluwas sa iban. Apang ang mga babayi may espesyal nga dulot para diri—isa ka diosnon nga bugay. May yara kamo sang ikasarang nga mahibal-an kon ano ang kinahanglan sang isa ka tawo—kag kon san-o niya ini kinahanglan. Sarang kamo magdab-ot, magpasulhay, magtudlo, kag magpabakod sang isa ka tawo sa oras mismo sang iya pagkinahanglan.
Lain ang panan-aw sang mga babayi sangsa mga lalaki, kag kinahanglan gid namon ang inyo panan-aw! Ang inyo kinaiya nagatulod sa inyo nga unahon pinsar ang iban, nga hunahunaon ang epekto sang bisan ano nga buluhaton sa iban.
Pareho sang gintudlo ni Pangulong Eyring, ang aton mahimayaon nga Iloy nga si Eba—sa iya labing importante nga paghangop sang plano sang aton Amay nga Langitnon—ang nagsugod sang ginatawag naton nga “ang Pagkapukan.” Ang iya maalam kag maisog nga pagpili kag nagasakdag nga desisyon ni Adan nagpasulong sang plano sang kalipayan sang Dios. Ginhimo nila nga posible para sa tagsa sa aton nga magkari sa duta, magbaton sang lawas, kag magpamatuod nga pilion naton nga magtindog para kay Jesucristo karon, pareho sang ginhimo naton sa kabuhi antes matawo.
Mahal kong mga sister, may yara kamo sang espesyal nga espirituhanon nga mga dulot kag mga huyog. Karon nga gab-i ginapaisog ko kamo, sa tanan nga paglaum sang akon tagipusuon, nga magpangamuyo agud mahangpan ang inyo espirituhanon nga mga dulot—agud makultibar, magamit, kag mapauswag ang mga ini, sing labi pa gid sa karon. Maliwat ninyo ang kalibutan kon himuon ninyo ini.
Bangod mga babayi kamo, ginainspirar ninyo ang iban kag nagapahamtang sang sulukdan nga nagakaangay sundon. Hatagan ko kamo sang diutay nga impormasyon parte sa duha ka mayor nga mga pahibalo nga ginhimo sa aton nagligad nga pangkabilogan nga komperensya. Kamo, mahal kong mga sister, ang yabi sa tagsa sini.
Una, ministering. Ang labing mataas nga sulukdan para sa ministering iamo ang iya sang aton Manluluwas, si Jesucristo. Sa pangkabilogan, ang mga babayi, halin sang una, mas malapit sa sinang sulukdan sangsa mga lalaki. Kon kamo matuod-tuod nga naga-minister, ginasunod ninyo ang inyo mga balatyagon sa pagbulig sa iban nga maeksperiyensyahan pa gid ang gugma sang Manluluwas. Ang natural nga balatyagon sa pag-minister kinaiya sang mga matarong nga babayi. May kilala ako nga mga babayi nga nagapangamuyo adlaw-adlaw, “Sin-o ang Imo luyag nga buligan ko karon nga adlaw?”
Antes sang Abril 2018 nga pahibalo parte sa mas mataas kag mas balaan nga paagi sa pagtatap sang iban, ang huyog sang pila ka lalaki amo nga tsekan ang ila mga takay sa home teaching nga “tapos na” kag magkadto sa masunod nga buluhaton.
Apang kon mabatyagann ninyo nga ang sister nga inyo gina-visiting teaching nagakinahanglan sang bulig, nagaresponder kamo sing gilayon kag tubtob sa bug-os nga bulan. Gani, ang paagi sang paghikot ninyo sang visiting teaching ang nag-inspirarsang amon pagpasangkad sa ministering.
Ika-duha, sang nagligad nga pangkabilogan nga komperensya, ginbag-o man namon ang pamaagi sang mga korum sang Melchizedek Priesthood. Sang nagpangamuyo kami kon paano buligan ang mga kalalakin-an sang Simbahan nga mangin mas epektibo sa ila mga responsibilidad, ginbinagbinag namon sing maayo ang ehemplo sang Relief Society.
Sa Relief Society, ang mga babayi sa lain-lain ang pangidaron kag bahin sang kabuhi nagatililipon. Ang tagsa ka halintang sang kabuhi may yara sang pinasahi nga mga hangkat, apang, ara kamo sa gihapon, kada semana, nagatililipon, nagatubo kag nagatudlo sang ebanghelyo sing ulolupod, kag nagahimo sang matuod nga kinalain sa kalibutan.
Karon, nga ginasunod ang inyo ehemplo, ang mga nagakapot sang Melchizedek Priesthood mga miyembro na sang korum sang mga elder. Ining mga lalaki nagaedad sing 18 tubtob 98 anyos (ayhan masobra pa), nga may palareho ka lain-lain nga mga eksperiyensya sa priesthood kag sa Simbahan. Ining mga kauturan sarang na nga makahimo sang mas mabakod nga mga kaangtanan sang pag-ulolutod, makatuon sing ulolupod, kag magpakamaayo sang iban sing mas epektibo.
Madumduman ninyo nga sang nagligad nga Hunyo, ako kag si Sister Nelson nakighambal sa mga lamharon sang Simbahan. Gin-agda namon sila nga mag-entra sa grupo sang mga lamharon sang Ginuo agud magbulig sa pagtipon sang Israel sa duha ka bahin sang belo. Ini nga pagtipon “ang pinakadako nga hangkat, ang pinakadako nga kawsa, kag ang pinakadako nga buluhaton sa kalibutan karon nga panahon”!1
Isa ini nga kawsa nagakinahanglan gid sang mga babayi bangod ang mga babayi nagaimpluwensya sang palaabuton. Gani karon nga gab-i bilang propeta nagapangabay ako sa inyo, mga kababayin-an sang Simbahan, nga pormahon ang palaabuton paagi sa pagbulig nga matipon ang nagalinapta nga Israel.
Sa diin kamo makasugod?
Luyag ko magtanyag sang apat ka imbitasyon:
Una, ginaagda ko kamo nga magpartisipar sa 10 ka adlaw nga pagpuasa gikan sa social media kag gikan sa iban pa nga media nga nagadala sang negatibo kag mahigko nga mga panghunahuna sa inyo mga kaisipan. Magpangamuyo agud mahibaloan kon ano nga mga impluwensya ang dapat kakason sa tion sang inyo pagpuasa. Ang epekto sang inyo 10-ka-adlaw nga pagpuasa ayhan makakibot sa inyo. Ano ang inyo matalupangdan pagkatapos nga mag-untat kamo sing makadali gikan sa mga panan-aw sang kalibutan nga nagasamad sang inyo espiritu? May pagbag-o bala kon sa diin na ninyo gusto ihinguyang ang inyo tion kag kusog? May naliwat bala sa inyo mga prayoridad—bisan diutay lang? Ginapaisog ko kamo nga isulat kag mag-akto sa tagsa ka pagpabatyag.
Ika-duha, ginaagda ko kamo nga basahon ang Libro ni Mormon sumugod karon tubtob sa katapusan sang tuig. Bisan pa nga daw ka imposible sina bangod sang tanan nga inyo ginahikot sa inyo kabuhi, kon batunon ninyo ining imbitasyon sa bug-os nga katuyoan sang tagipusuon, buligan kamo sang Ginuo nga masalapoan ang paagi nga mahimo ini. Kag, kon magtuon kamo sing mainampuon, ginapromisa ko nga ang kalangitan magabukas para sa inyo. Bugayan kamo sang Ginuo sang dugang nga inspirasyon kag rebelasyon.
Samtang nagabasa kamo, ginaagda ko kamo nga markahan ninyo ang tagsa ka bersikulo nga nagahambal parte sa ukon nagatumod sa Manluluwas. Dayon, planoha nga maghambal parte kay Cristo, magkasadya kay Cristo,kag magwali parte kay Cristo upod sa inyo mga pamilya kag mga abyan.2 Paagi sa sining proseso mangin mas malapit kamo kag sila sa Manluluwas. Kag matabo ang mga pagbag-o, bisan pa mga milagro.
Sini nga aga gin-anunsyo ang parte sa bag-o nga iskedyul sa Domingo kag kurikulum nga nasentro sa puluy-an kag suportado sang Simbahan. Kamo, mahal kong mga sister, ang yabi sa kadalag-an sining bag-o, balanse, kag organisado nga paghimud-os sa pagtudlo sang ebanghelyo. Palihog tudloi sila nga inyo ginapalangga sang inyo natun-an sa balaan nga mga kasulatan. Tudloi sila kon paano magdangop sa Manluluwas para sa Iya nagapang-ayo kag nagatinlo nga gahum kon makasala sila. Kag tudloi sila kon paano maggamit sang Iya nagapabakod nga gahum adlaw-adlaw sang ila kabuhi.
Ika-tatlo, magpahamtang sang sulundan sang regular nga pagtambong sa temple. Mahimo ini magkinahanglan sing dugang pa nga sakripisyo sa inyo kabuhi. Ang dugang nga regular nga tion sa templo magatugot sa Ginuo nga tudloan kamo kon paano gamiton ang Iya gahum sang priesthood nga ginbugay sa inyo sa Iya templo. Sa inyo nga wala nagapuyo malapit sa templo, ginaagda ko kamo nga magtuon sing mainampuon parte sa mga templo sa balaan nga mga kasulatan kag sa mga pulong sang buhi nga mga propeta. Tinguhai nga makahibalo pa gid, nga makahangop pa gid, nga makaangkon pa gid sing dugang nga balatyagon para sa mga templo karon kon ikomparar sang una.
Sa aton bug-os kalibutan nga youth devotional sang nagligad nga Hunyo, naghambal ako parte sa isa ka lamharon nga lalaki nga ang kabuhi nagbag-o sang gin-islan sang iya mga ginikanan ang iya smartphone sang flip phone. Ang iloy sIning lamharon isa ka maisog nga babayi sang pagtuo. Nakita niya ang iya anak nga nagaamat-amat kabuyo sa mga pagpili nga makapugong sa iya sa pag-alagad sa misyon. Nagkadto sia sa templo nga nagapangamuyo nga mahibaloan kon ano ang pinakamaayo nga himuon agud mabuligan niya ang iya anak. Dayon nag-akto sia sa tagsa ka pagpabatyag.
Nagsiling sia: “Nabatyagan ko ang Espiritu nga nagagiya sa akon nga tan-awon ang telepono sang akon anak sa partikular nga tinion agud makita ang partikular nga mga butang. Indi ako makahibalo maggamit sining mga smartphone, pero gingiyahan ako sang Espiritu sa tanan nga social media nga wala man gani ako nagagamit! Nakahibalo ako nga ang Espiritu nagabulig sa mga ginikanan nga nagapangayo sang giya agud amligan ang ila mga anak. [Sang primero] nangakig ang akon anak sa akon. … Pero pagligad lamang sang tatlo ka adlaw, ginpasalamatan niya ako! Nabatyagan niya ang kinalain.”
Ang pangginawi kag batasan sang iya anak nagbag-o sing dako. Nangin mas mabinuligon sia sa balay, mas palayuhum , kag mas aktibo sa simbahan. Nanamian sia mag-alagad sang isa ka tinion sa bulunyagan sang templo (temple baptistry) kag sa paghanda para sa iya misyon.
Ang akon ika-apat nga imbitasyon, sa inyo nga yara na sa husto nga edad, amo ang magpartisipar sing lubos sa Relief Society. Ginapaisog ko kamo nga tun-an ang bag-o nga pahayag sa katuyoan sang Relief Society. Makatalandog ini. Mahimo ini maggiya sa inyo sa pagbalay sang inyo kaugalingon nga pahayag sa katuyoan sang inyo kaugalingon nga kabuhi. Ginapangabay ko man kamo nga tilawan ang mga kamatuoran sa pahayag sang Relief Society (Relief Society declaration) nga ginbantala halos 20 ka tuig na ang nagligad.3 Ang isa ka ginkuwadro nga kopya sining pahayag nagakabit sa dingding sa opisina sang Unang Panguluhan. Nalipay gid ako sa tagsa ka tion nga basahon ko ini. Ginalaragway sini kon sin-o kamo kag kon ano nga klase sang tawo nga gusto sang Ginuo nga kamo mangin sa sini mismo nga tion samtang inyo ginahimo ang inyo bahin sa pagbulig nga matipon ang nagalinapta nga Israel.
Mahal kong mga sister, kinahanglan namon kamo! Amon “kinahanglan ang inyo kusog, inyo pagkahaylo, inyo panindugan, inyo ikasarang sa pagpanguna, inyo kaalam, kag inyo mga tingug.”4 Indi namon matipon ang Israel kon wala kamo.
Palangga ko kamo kag nagapasalamat ako sa inyo kag karon nagapakamaayo sa inyo sang ikasarang nga indi magpaimpluwensya sa kalibutan samtang nagabulig kamo sa sining importante kag hilingagawon nga buluhaton. Sing ulolupod sarang naton himuon ang tanan nga gusto sang Amay nga Langitnon nga himuon naton sa paghanda sang kalibutan para sa Ika-duha nga Pagkari sang Iya Hinigugma nga Anak.
Si Jesus ang Cristo. Iya ini Simbahan. Sa sini ako nagapamatuod sa ngalan ni Jesucristo, amen.