Ang Husto nga Ngalan sang Simbahan

Ni Pangulong Russell M. Nelson

Litrato

Pangulong Russell M. Nelson

Gintudloan kita ni Jesucristo nga tawgon ang Simbahan sa Iya ngalan bangod Iya ini Simbahan nga napuno sang Iya gahum.

Pinalangga kong mga kauturan, sa sining matahum nga adlaw nga Inugpahuway ululupod kita nga nagakalipay bangod sang aton madamo nga mga bugay halin sa Ginuo. Nagapasalamat gid kami bangod sang inyo mga pagpamatuod parte sa ginpanumbalik nga ebanghelyo ni Jesucristo, para sa mga sakripisyo nga ginhimo ninyo agud magpabilin ukon magbalik sa banas sang Iya kasugtanan, kag para sa inyo dedikado nga pag-alagad sa Iya Simbahan.

Karon nga adlaw kinahanglan ko hambalan upod sa inyo ang isa ka importante gid nga topiko. Sang nagligad nga pila ka semana, nagpahayag ako sang panindugan parte sa pagtawag sa Simbahan sa iya sini husto nga ngalan.¹ Ginhimo ko ini bangod ginpahibalo sang Ginuo sa akon kaisipan ang kaimportante sang ngalan nga ginhatag Niya para sa Iya Simbahan, nga amo ang Ang Simbahan ni Jesucristo sang mga Santos sa Ulihing mga Adlaw.²

Suno sa inyo ginapaabot, ang mga reaksyon sa sining pahayag kag sa ginbag-o nga style guide³ nagkalain-lain. Madamo nga mga miyembro ang gilayon nga nagtadlong sang ngalan sang Simbahan sa ila mga blog kag mga social media page. Ang iban natingala kon ngaa, nga sa tanan nga nagakalatabo sa kalibutan, kinahanglan pa dagmiton ang isa ka butang nga “witiwiti.” Kag may pila nga nagasiling nga indi ini mahimo, gani ano pa ang pulos sini? Ipaathag ko kon ngaa importante sa amon ining isyu. Apang una ihambal ko ang mga indisa sining paghimud-os:

Indi ini pagliwat sang ngalan.
Indi ini pagliwat sang tatak.
Indi ini hapaw lamang.
Indi ini paluyag-luyag lang.
Kag indi ini witiwiti.

Kundi, isa ini ka paghusto. Isa ini ka sugo sang Ginuo. Indi si Joseph Smith ang naghingalan sa Simbahan nga ginpanumbalik paagi sa iya; indi man si Mormon. Kundi ang Manluluwas Mismo nga nagsiling, “Kay ang akon simbahan dapat pagatawgon sa ulihing mga adlaw nga Ang Simbahan ni Jesucristo sang mga Santos sa Ulihing mga Adlaw.”⁴

Bisan sang damlag pa sang tuig AD 34, ang aton nabanhaw nga Ginuo naghatag sang amo man nga panulin sa mga miyembro sang Iya Simbahan sang nagbisita Sia sa ila sa kadutaan sang Amerika. Sang sadto nga tion nagsiling Sia:

“Tawagon ninyo ang simbahan sa akon ngalan. …

“Kag paano ini nga mangin akon simbahan luwas nga ini pagatawagon sa akon ngalan? Kay kon ang simbahan ginatawag sa ngalan ni Moises nian simbahan ini ni Moises; kag kon ini ginatawag sa ngalan sang isa ka tawo nian simbahan ini sang isa ka tawo; apang kon ini ginatawag sa akon ngalan nian akon ini simbahan.”⁵

Gani, ang ngalan sang Simbahan indi puwede liwaton. Sang nagapaathag ang Manluluwas sang nagakadapat nga ngalan sang Iya Simbahan kag nagsugod pa sang Iya pahayag sa, “Kay ang akon simbahan dapat pagatawgon,” seryoso Sia. Kag kon maggamit kita sang mga hayo ukon magbaton ukon magpalapnag mismo sinang mga hayo, masaklaw Sia.

Ano bala ka importante ang isa ka ngalan ukon, sa sini nga halimbawa, isa ka hayo? Parte sa mga hayo sang Simbahan, subong sang ang “Simbahan sang LDS,” ang “Simbahan sang Mormons,” ukon ang “Simbahan sang mga Santos sa Ulihing mga Adlaw,” ang pinakaimportante gid sa sinang mga ngalan amo nga wala sa mga ini ang ngalan sang Manluluwas. Ang pagkakas sang ngalan sang Ginuo sa Simbahan sang Ginuo isa ka dako gid nga kadalag-an para kay Satanas. Kon ginakakas naton ang ngalan sang Manluluwas, medyo ginabalewala naton ang tanan nga ginhimo ni Jesucristo para sa aton—bisan pa ang iya Pagbayad-sala.

Binagbinaga ini gikan sa Iya panan-aw: Sa kabuhi antes matawo, Sia si Jehova, ang Dios sang Daan nga Katipan. Sa idalom sang direksyon sang Iya Amay, Sia ang Tagtuga sang ini kag sang iban pa nga kalibutan.⁶ Ginpili Niya nga magsunod sa kabubut-on sang Iya Amay kag maghimo sang butang para sa tanan nga mga anak sang Dios nga wala sing bisan sin-o pa man ang makahimo! Sa pagbiya Niya sang Iya himaya agud magkari sa duta bilang Bugtong nga Anak sang Amay sa unod, ginpasipalahan Sia, gin-uligyat, ginduplaan, kag ginbunal. Sa Hardin sang Getsemane, gin-ako sang Manluluwas ang tagsa ka sakit, tagsa ka sala, kag tanan nga kalisud kag pag-antos nga wala mo kag nakon kag sang tanan-tanan nga nagkabuhi ukon magakabuhi pa maeksperiyensyahan. Bangod sa kabug-at sinang tuman kasakit nga palas-anon, naggwa ang dugo sa tagsa ka buho sang Iya panit.⁷ Ining tanan nga pag-antos nagdugang pa gid sang ginlansang Sia sa krus sang Kalbaryo.

Paagi sining tuman ka sakit nga mga eksperiyensya kag ang nagsunod Niya nga Pagkabanhaw —Iya wala’y dulonan nga Pagbayad-sala—ginhatag Niya ang pagkawala’y kamatayon sa tanan-tanan kag gintubos ang tagsa sa aton gikan sa mga epekto sang sala sa kondisyon nga maghinulsol kita.

Pagkatapos sang Pagkabanhaw sang Manluluwas kag sang napatay na ang Iya mga Apostoles, nahulog ang kalibutan sa mga siglo sang kadulom. Dayon sa tuig 1820, ang Dios nga Amay kag Iya Anak nga si Jesucristo, nagpakita kay Propetang Joseph Smith agud sugdan ang Pagpanumbalik sang Simbahan sang Ginuo.

Pagkatapos sang tanan nga Iya naagyan—kag pagkatapos sang tanan nga Iya nahimo para sa katawhan—narealisar ko upod ang dako nga paghinulsol nga wala hungda naton nga ginbaton ang pagtawag sang ginpanumbalik nga Simbahan sang Ginuo sa iban nga mga ngalan, nga sa tagsa sini ginakakas ang sagrado nga ngalan ni Jesucristo!

Kada Domingo samtang takos kita nga nagaambit sang sakramento, ginabag-o naton ang aton sagrado nga promisa sa Amay nga Langitnon nga handa kita nga dal-on sa aton kaugalingon ang ngalan sang Iya Anak nga si Jesucristo.⁸ Nagapromisa kita nga magsunod sa Iya, maghinulsol, magtuman sang Iya mga kasugoan, kag dalayon nga magdumdum sa Iya.

Kon ginakakas naton ang Iya ngalan sa Iya Simbahan, di-hungod naton nga ginakakas Sia bilang sentro sang aton kabuhi.

Ang pagdala sang ngalan sang Manluluwas sa aton kaugalingon nagalakip sang pagpahayag kag pagsaksi sa iban—paagi sa aton mga buhat kag mga pulong—nga si Jesus amo ang Cristo. Nahadlok gid bala kita nga makasaklaw sang isa ka tawo nga nagatawag sa aton nga “Mormons” nga wala na naton napangapinan ang Manluluwas Mismo, agud depensahan Sia bisan na lang sa ngalan nga ginatawag sa Iya Simbahan?

Kon kita bilang katawhan kag bilang mga indibidwal gusto nga maggamit sang gahum sang Pagbayad-sala ni Jesucristo—agud matinloan kag mapaayo kita, agud mapabakod kag mapadako kita, kag sa ulihi agud mapahitaas kita—kinahanglan naton Sia kilalahon bilang ang ginahalinan sinang gahum. Makasugod kita paagi sa pagtawag sa Iya Simbahan sa ngalan nga Iya ginhatag.

Kalabanan sang mga tawo nakakilala sa Simbahan sang Ginuo bilang ang “Simbahan sang Mormons.” Apang kita bilang mga miyembro sang Simbahan sang Ginuo nakahibalo kon sin-o ang nagatindog sa ulohan sini: si Jesucristo Mismo. Sa masubo nga palad, madamo sang makabati sang tinaga nga Mormon ang mahimo maghunahuna nga ginasimba naton si Mormon. Indi ini matuod! Ginapasidunggan kag ginatahod naton inang halangdon nga dumaan nga propeta sang Amerika.⁹ Pero indi kita mga disipulo ni Mormon. Mga disipulo kita sang Ginuo.

Sang una nga bahin sang ginpanumbalik nga Simbahan, ang mga tinaga nga pareho sang Simbahan sang Mormons kag Mormons¹⁰ masami nga ginagamit bilang mga bansag—bilang mapintas nga mga tinaga, nagapakalain nga mga tinaga—nga gindesinyo agud ihimutig ang impluwensya sang Dios sa pagpanumbalik sang Simbahan ni Jesucristo sa sining ulihing mga adlaw.¹¹

Mga kauturan, may madamo nga kalibutanon nga mga pagbinaisay batok sa pagpanumbalik sang husto nga ngalan sang Simbahan. Bangod sa digital nga kalibutan nga ginapuy-an naton kag sang search engine optimization nga nagabulig sa aton tanan nga makita ang impormasyon nga kinahanglan naton sing gilayon—lakip ang impormasyon parte sa Simbahan sang Ginuo—ang mga kritiko nagasiling nga ang koreksyon sa sini nga tion indi maalamon. Ang iban nagahunahuna nga bangod kilala na gid kita bilang “Mormons” kag bilang “Simbahan sang Mormons,” dapat batunon na lang naton kag atubangon ini.

Kon ang paghinambalanay parte sa pagtatak sang isa ka tawhanon nga organisasyon, mahimo magpangibabaw ang ina nga mga argumento. Apang sa sining importante nga butang, nagatulok kita sa Iya nga nagapanag-iya sining Simbahan kag ginabaton nga ang mga paagi sang Ginuo indi, kag indi gid bisan san-o, mga paagi sang tawo. Kon mangin mapinasensyahon kita kag kon himuon naton ang aton bahin sing maayo, pagatuytuyan kita sang Ginuo sa sining importante nga buluhaton. Kay man, nakahibalo kita nga ginabuligan sang Ginuo inang mga nagatinguha sa paghimo sang Iya pagbuot, subong nga ginbuligan Niya si Nefi nga matuman ang buluhaton sang pagpasad sang sakayan-dagat nga magtabok sa dagat.¹²

Luyag naton mangin matinahuron kag mapinasensyahon sa aton mga paghimud-os sa pagtadlong sining mga sala. Ang responsable nga media mangin mahinangpanon sa pagsabat sa aton pangabay.

Sa isa ka nagligad nga pangkabilogan nga komperensya, si Elder Benjamín De Hoyos naghambal parte sa amo nga hitabo. Siling niya:

“Sang nagligad nga pila ka tuig samtang nagaalagad sa palangakuan sang public affairs sang Simbahan sa Mexico, gin-agda [ako kag ang akon kaupod] nga magpartisipar sa isa ka talk show sa radyo. … [Isa sang mga direktor sang programa] nagpamangkot sa [amon], ‘Ngaa kalawig sang ngalan sang inyo Simbahan? …’

“Nagyuhum kami sang akon kaupod sa amo kanami nga pamangkot kag dayon nagpadayon sa pagpaathag nga ang ngalan sang Simbahan wala ginpili sang tawo. Ginahatag ini sang Manluluwas. … Ang direktor sang programa gilayon kag matinahuron nga nagsabat, ‘Ikalipay gid namon nga suliton ini.’”¹³

Ang ina nga report nagahatag sang sulundan. Sing isa-isa, ang aton bug-os nga masarangan bilang mga indibidwal kinahanglanon sa pagtadlong sang mga sala nga amat-amat na nga ginabaton sa pagligad sang mga tinuig.¹⁴ Ang iban sa kalibutan mahimo nga magsunod ukon indi sa aton sa pagtawag sa aton sa husto nga ngalan. Apang indi sinsero nga magbatyag kita sang kapaslaw sa pagtawag sang kalabanan sang kalibutan sa Simbahan kag sa mga miyembro sini sa sala nga mga ngalan kon nagahimo kita sang amo man.

Makabulig ang aton ginbag-o nga style guide. Nagasiling ini: “Sa una nga pagsambit, ginapasulabi ang pagmitlang sang bug-os nga ngalan sang Simbahan: ‘Ang Simbahan ni Jesucristo sang mga Santos sa Ulihing mga Adlaw.’ Kon ang napalip-ot [nga ika-duha] nga r pagsambit ang kinahanglanon, ginapaisog ang paggamit sang mga tinaga nga ‘ang Simbahan’ ukon ang ‘Simbahan ni Jesucristo’. Ang ‘ginpanumbalik nga Simbahan ni Jesucristo’ sibo man kag ginasakdag.”¹⁵

Kon may mamangkot, “Mormon ka?” sarang ka magsabat nga, “Kon nagapamangkot ka kon miyembro ako sang Ang Simbahan ni Jesucristo sang mga Santos sa Ulihing mga Adlaw, huo, miyembro ako!”

Kon may mamangkot, “Santos sa Ulihing mga Adlaw ka?”¹⁶ mahimo ka magsabat, “Huo. Nagapati ako kay Jesucristo kag miyembro ako sang Iya ginpanumbalik nga Simbahan.”

Mahal kong mga kauturan, ginapromisa ko sa inyo nga kon himuon naton ang tanan nga aton masarangan agud ipanumbalik ang husto nga ngalan sang Simbahan sang Ginuo, sa Iya nga nagapanag-iya sining Simbahan, igabubo Niya ang Iya gahum kag mga pagpakamaayo sa mga ulo sang mga Santos sa Ulihing mga Adlaw,¹⁷ sa mga paagi nga wala pa naton maeksperiyensyahan. Maangkon naton ang ihibalo kag gahum sang Dios nga magbulig sa aton nga dal-on ang mga bugay sang ginpanumbalik nga ebanghelyo ni Jesucristo sa tagsa ka nasyon, kaliwat, lengguahe, kag katawhan kag maghanda sang kalibutan para sa Ika-duha nga Pagkari sang Ginuo.

Gani, ano bala ang importante sa isa ka ngalan? Kon parte sa ngalan sang Simbahan sang Ginuo, ang sabat amo nga “Tanan-tanan!” Gintudloan kita ni Jesucristo nga tawgon ang Simbahan sa Iya ngalan bangod Iya ini Simbahan nga napuno sang Iya gahum.

Nakahibalo ako nga buhi ang Dios. Si Jesus ang Cristo. Ginagiyahan Niya ang Iya Simbahan karon nga panahon. Ako nagapamatuod gid sini sa sagrado nga ngalan ni Jesucristo, amen.

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, November 2018. Hiligaynon. 14853 861