ຂ່າວສານຈາກຝ່າຍປະທານສູງສຸດ, ເດືອນພະຈິກ 2018
ພາກສ່ວນຂອງເອື້ອຍນ້ອງ ໃນການເຕົ້າໂຮມອິດສະຣາເອນ
ໂດຍ ປະທານຣະໂຊ ເອັມ ແນວສັນ
ຄ່ຳຄືນນີ້ຂ້າພະເຈົ້າຂໍສະເໜີຄຳອ້ອນວອນຂອງສາດສະດາຕໍ່ທ່ານ, ສະຕີໃນສາດສະໜາຈັກ, ໃຫ້ຫລໍ່ຫລອມອະນາຄົດ ໂດຍການຊ່ວຍເຕົ້າໂຮມອິດສະຣາເອນ ທີ່ໄດ້ກະຈັດກະຈາຍໄປ.
ຊ່າງເປັນໂອກາດທີ່ປະເສີດທີ່ໄດ້ມາຮ່ວມກັບທ່ານ, ເອື້ອຍນ້ອງທີ່ຮັກແພງຂອງຂ້າພະເຈົ້າ. ບາງທີປະສົບການເມື່ອບໍ່ດົນມານີ້ ຈະອະທິບາຍໃຫ້ທ່ານຮັບຮູ້ວ່າ ຂ້າພະເຈົ້າຮູ້ສຶກແນວໃດກ່ຽວກັບທ່ານ ແລະ ຄວາມສາມາດແຫ່ງສະຫວັນທີ່ທ່ານໄດ້ຮັບມາ.
ມື້ໜຶ່ງ ຕອນກ່າວປາໄສຢູ່ກອງປະຊຸມທີ່ອາເມຣິກາໃຕ້, ຂ້າພະເຈົ້າຕື່ນເຕັ້ນຫລາຍກ່ຽວກັບຫົວຂໍ້ປາໄສຂອງຂ້າພະເຈົ້າ, ແລະ ໃນວິນາທີທີ່ສຳຄັນທີ່ສຸດ, ຂ້າພະເຈົ້າໄດ້ກ່າວອອກວ່າ, “ໃນຖານະ ແມ່ ຂອງລູກ 10 ຄົນ, ຂ້າພະເຈົ້າບອກທ່ານໄດ້ວ່າ …” ແລະ ແລ້ວຂ້າພະເຈົ້າກໍໄດ້ກ່າວຂ່າວສານຂອງຂ້າພະເຈົ້າຕໍ່ໄປ.
ຂ້າພະເຈົ້າບໍ່ໄດ້ຮູ້ເລີຍວ່າ ຂ້າພະເຈົ້າໄດ້ກ່າວຄຳວ່າ ແມ່. ນາຍພາສາຂອງຂ້າພະເຈົ້າ, ໂດຍທີ່ຄິດວ່າຂ້າພະເຈົ້າໄດ້ກ່າວຜິດຄຳ, ກໍໄດ້ປ່ຽນຄຳວ່າ ແມ່ ໄປເປັນ ພໍ່, ສະນັ້ນຜູ້ຄົນໃນກອງປະຊຸມບໍ່ໄດ້ຮູ້ເລີຍວ່າ ຂ້າພະເຈົ້າໄດ້ອ້າງເຖິງຕົວເອງວ່າ ແມ່. ແຕ່ ເວັນດີ ພັນລະຍາຂອງຂ້າພະເຈົ້າໄດ້ຍິນ, ແລະ ນາງກໍດີໃຈທີ່ຂ້າພະເຈົ້າໄດ້ກ່າວຜິດ ເຖິງຄວາມຮູ້ສຶກຈາກຈິດສຳນຶກ.
ໃນວິນາທີນັ້ນ, ຄວາມປະສົງເລິກໆໃນໃຈຂອງຂ້າພະເຈົ້າ ແມ່ນຢາກເຮັດຄວາມແຕກຕ່າງໃນໂລກ—ທີ່ພຽງແຕ່ແມ່ເທົ່ານັ້ນທີ່ເຮັດໄດ້—ໄດ້ເປັນຝອດຂຶ້ນມາຈາກຈິດໃຈຂອງຂ້າພະເຈົ້າ. ຕະຫລອດຫລາຍປີທີ່ຜ່ານມາ, ເມື່ອໃດມີຄົນຖາມຂ້າພະເຈົ້າວ່າເປັນຫຍັງຂ້າພະເຈົ້າຈຶ່ງໄດ້ ເລືອກ ທີ່ຈະເປັນທ່ານໝໍ, ຄຳຕອບຂອງຂ້າພະເຈົ້າກໍເໝືອນເດີມ: “ເພາະຂ້າພະເຈົ້າ ເລືອກ ທີ່ຈະເປັນແມ່ບໍ່ໄດ້.”
ຂໍໃຫ້ສັງເກດເຫັນວ່າ ເມື່ອໃດທີ່ຂ້າພະເຈົ້າໃຊ້ຄຳວ່າ ແມ່, ຂ້າພະເຈົ້າບໍ່ໄດ້ພຽງແຕ່ກ່າວເຖິງຜູ້ຍິງທີ່ໃຫ້ກຳເນີດລູກໆ ຫລື ລ້ຽງເດັກເປັນລູກບຸນທຳໃນຊີວິດນີ້ເທົ່ານັ້ນ. ຂ້າພະເຈົ້າກ່າວເຖິງທິດາຜູ້ໃຫຍ່ຂອງພຣະບິດາມານດາໃນສະຫວັນຂອງເຮົາ ທຸກຄົນ. ຜູ້ຍິງທຸກຄົນ ກໍເປັນແມ່ ອີງຕາມທຳມະຊາດທີ່ສູງສົ່ງນິລັນດອນຂອງນາງ.
ສະນັ້ນ ໃນຄ່ຳຄືນນີ້, ໃນຖານະ ພໍ່ ຂອງລູກ 10 ຄົນ—ເກົ້າຄົນເປັນລູກສາວ ແລະ ໜຶ່ງຄົນເປັນລູກຊາຍ—ແລະ ໃນຖານະປະທານຂອງສາດສະໜາຈັກ. ຂ້າພະເຈົ້າອະທິຖານວ່າ ທ່ານຈະຮັບຮູ້ວ່າ ຂ້າພະເຈົ້າຮູ້ສຶກແນວໃດແທ້ໆກ່ຽວກັບທ່ານ—ກ່ຽວກັບວ່າທ່ານເປັນໃຜ ແລະ ທຸກສິ່ງທຸກຢ່າງທີ່ດີງາມທີ່ທ່ານເຮັດ. ບໍ່ມີໃຜສາມາດເຮັດສິ່ງທີ່ຜູ້ຍິງທີ່ຊອບທຳສາມາດເຮັດໄດ້. ບໍ່ມີໃຜສາມາດລອກແບບອິດທິພົນຂອງແມ່ໄດ້.
ຜູ້ຊາຍສາມາດ ແລະ ສ່ວນຫລາຍກໍຈະສື່ສານຄວາມຮັກຂອງພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຕໍ່ຄົນອື່ນໄດ້. ແຕ່ຜູ້ຍິງມີຂອງປະທານພິເສດສຳລັບສິ່ງນີ້—ຂອງປະທານສັກສິດຈາກສະຫວັນ. ທ່ານມີຄວາມສາມາດທີ່ຈະຮູ້ສຶກເຖິງສິ່ງທີ່ຄົນໃດຄົນໜຶ່ງຕ້ອງການ—ແລະ ເມື່ອໃດ ທີ່ເຂົາເຈົ້າຕ້ອງການມັນ. ທ່ານສາມາດເອື້ອມອອກໄປຫາ, ປອບໂຍນ, ສິດສອນ, ແລະ ເສີມຄວາມເຂັ້ມແຂງໃຫ້ແກ່ຄົນໃດຄົນໜຶ່ງໃນວິນາທີທີ່ເຂົາມີຄວາມຕ້ອງການ.
ຜູ້ຍິງເຫັນໄດ້ແຕກຕ່າງຈາກຜູ້ຊາຍ, ແລະ ໂອ້ຍ, ພວກເຮົາກໍຕ້ອງການທັດສະນະຂອງທ່ານແທ້ໆ! ທຳມະຊາດຂອງທ່ານນຳພາໃຫ້ທ່ານຄິດເຖິງຄົນອື່ນ ກ່ອນ, ເພື່ອພິຈາລະນາເຖິງຜົນກະທົບ ທີ່ການກະທຳໃດໜຶ່ງຈະມີຕໍ່ຄົນອື່ນ.
ດັ່ງທີ່ປະທານໄອຣິງ ໄດ້ຊີ້ບອກ, ແມ່ນມານດາເອວາທີ່ຮຸ່ງໂລດຂອງເຮົາ—ພ້ອມດ້ວຍວິໄສທັດທີ່ກວ້າງໄກຂອງນາງ ເຖິງແຜນຂອງພຣະບິດາເທິງສະຫວັນຂອງເຮົາ—ເປັນຜູ້ທີ່ໄດ້ລິເລີ່ມສິ່ງທີ່ເຮົາເອີ້ນວ່າ ‘‘ການຕົກ.” ການເລືອກທີ່ສະຫລາດ ແລະ ກ້າຫານຂອງນາງ ແລະ ການຕັດສິນໃຈທີ່ອາດາມໄດ້ສະໜັບສະໜູນ ກໍໄດ້ຜັກດັນແຜນແຫ່ງຄວາມສຸກຂອງພຣະເຈົ້າໄປໜ້າ. ມັນໄດ້ເຮັດໃຫ້ເປັນໄປໄດ້ສຳລັບເຮົາແຕ່ລະຄົນ ທີ່ຈະລົງມາເທິງແຜ່ນດິນໂລກ, ເພື່ອຮັບເອົາຮ່າງກາຍ, ແລະ ພິສູດວ່າເຮົາຈະເລືອກທີ່ຈະສະໜັບສະໜູນພຣະເຢຊູຄຣິດ ໃນວັນເວລານີ້, ດັ່ງທີ່ເຮົາໄດ້ເຮັດໃນຊີວິດກ່ອນເກີດ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານມີຂອງປະທານ ແລະ ແນວໂນ້ມພິເສດທາງວິນຍານ. ໃນຄ່ຳຄືນນີ້ ຂ້າພະເຈົ້າຂໍຊຸກຍູ້ທ່ານ, ດ້ວຍຄວາມຫວັງທັງໝົດຈາກໃຈຂອງຂ້າພະເຈົ້າ, ໃຫ້ອະທິຖານເພື່ອຈະເຂົ້າໃຈ ຂອງປະທານທາງວິນຍານຂອງທ່ານ—ທີ່ຈະປູກຝັງ, ນຳໃຊ້, ແລະ ຂະຫຍາຍມັນອອກໄປ, ແມ່ນແຕ່ຫລາຍກວ່າທີ່ທ່ານເຄີຍໄດ້ເຮັດມາກ່ອນ. ທ່ານຈະປ່ຽນແປງໂລກໃນຂະນະທີ່ທ່ານເຮັດດັ່ງນີ້.
ໃນຖານະຜູ້ຍິງ, ທ່ານດົນໃຈຄົນອື່ນ ແລະ ຈັດມາດຕະຖານອັນສົມຄວນທີ່ຈະເອົາເປັນແບບຢ່າງ. ຂ້າພະເຈົ້າຂໍໃຫ້ພື້ນຖານຂອງການປະກາດສຳຄັນສອງຢ່າງ ທີ່ຖືກປະກາດໃນກອງປະຊຸມໃຫຍ່ສາມັນ ເທື່ອແລ້ວນີ້. ເອື້ອຍນ້ອງຂອງຂ້າພະເຈົ້າ, ທ່ານໄດ້ເປັນພາກສ່ວນທີ່ສຳຄັນຂອງແຕ່ລະຢ່າງ.
ທຳອິດ, ການປະຕິບັດສາດສະໜາກິດ. ມາດຕະຖານທີ່ສູງສົ່ງສຳລັບການປະຕິບັດສາດສະໜາກິດກໍແມ່ນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ໂດຍທົ່ວໄປແລ້ວ, ຜູ້ຍິງຢູ່ໃກ້ມາດຕະຖານນັ້ນ, ແລະ ໄດ້ຢູ່ໃກ້ສະເໝີມາ, ຫລາຍກວ່າຜູ້ຊາຍ. ເມື່ອທ່ານປະຕິບັດສາດສະໜາກິດແທ້ໆ, ທ່ານກໍເຮັດຕາມຄວາມຮູ້ສຶກຂອງທ່ານທີ່ຈະຊ່ວຍຄົນອື່ນໃຫ້ປະສົບກັບຄວາມຮັກຂອງພຣະຜູ້ຊ່ວຍໃຫ້ລອດຫລາຍຂຶ້ນ. ແນວໂນ້ມທີ່ຈະປະຕິບັດສາດສະໜາກິດແມ່ນຝັງຕິດຢູ່ໃນຕົວຂອງຜູ້ຍິງທີ່ຊອບທຳ. ຂ້າພະເຈົ້າຮູ້ຈັກຜູ້ຍິງທີ່ອະທິຖານທຸກໆມື້ວ່າ, “ພຣະອົງປະສົງໃຫ້ຂ້ານ້ອຍຊ່ວຍເຫລືອໃຜແດ່ມື້ນີ້?”
ກ່ອນການປະກາດໃນເດືອນເມສາ ປີ 2018 ກ່ຽວກັບວິທີທາງທີ່ສູງກວ່າ ແລະ ສັກສິດກວ່າ ຂອງການດູແລຄົນອື່ນ, ແນວໂນ້ມຂອງຜູ້ຊາຍບາງຄົນແມ່ນທີ່ຈະຂີດໝາຍໜ້າທີ່ມອບໝາຍຂອງການສອນປະຈຳບ້ານວ່າ “ສຳເລັດແລ້ວ” ແລະ ປ່ຽນໄປເຮັດໜ້າທີ່ຕໍ່ໄປ.
ແຕ່ເມື່ອ ທ່ານ ໄດ້ຮູ້ສຶກວ່າເອື້ອຍນ້ອງທີ່ທ່ານໄດ້ຢ້ຽມສອນ ຕ້ອງການຄວາມຊ່ວຍເຫລືອ, ທ່ານກໍໄດ້ຕອບຮັບທັນທີ ແລະ ເຮັດສິ່ງນັ້ນຕະຫລອດທັງເດືອນ. ສະນັ້ນ, ວິທີ ທີ່ທ່ານໄດ້ຢ້ຽມສອນກໍໄດ້ດົນໃຈການປ່ຽນແປງ ໃຫ້ຂຶ້ນມາເປັນການປະຕິບັດສາດສະໜາກິດ.
ທີສອງ, ໃນກອງປະຊຸມໃຫຍ່ສາມັນ ເທື່ອແລ້ວນີ້, ພວກເຮົາກໍໄດ້ຈັດໂຄງຮ່າງກຸ່ມຖານະປະໂລຫິດແຫ່ງເມນຄີເສເດັກແບບໃໝ່. ເມື່ອພວກເຮົາໄດ້ຄິດກ່ຽວກັບວິທີທີ່ຈະຊ່ວຍເຫລືອພວກຜູ້ຊາຍໃນສາດສະໜາຈັກໃຫ້ມີປະສິດທິພາບຫລາຍຂຶ້ນ ໃນໜ້າທີ່ຮັບຜິດຊອບຂອງເຂົາເຈົ້າ, ພວກເຮົາກໍໄດ້ພິຈາລະນາຢ່າງຮອບຄອບ ເຖິງແບບຢ່າງຂອງສະມາຄົມສະຕີສົງເຄາະ.
ໃນສະມາຄົມສະຕີສົງເຄາະ, ຜູ້ຍິງທີ່ຢູ່ໃນໄວທີ່ແຕກຕ່າງ ແລະ ຈຸດຕ່າງໆໃນຊີວິດກໍປະຊຸມນຳກັນ. ແຕ່ລະທົດສະວັດຂອງຊີວິດ ກໍນຳການທ້າທາຍພິເສດມາໃຫ້, ແຕ່ ທ່ານ ກໍຍັງຢູ່ທີ່ນັ້ນ, ທຸກໆອາທິດ, ເວົ້າລົມຊຸມນຸມກັນ, ເຕີບໂຕ ແລະ ສັ່ງສອນພຣະກິດຕິຄຸນໄປນຳກັນ, ແລະ ເຮັດຄວາມແຕກຕ່າງທີ່ແທ້ຈິງຢູ່ໃນໂລກ.
ບັດນີ້, ໂດຍເຮັດຕາມຕົວຢ່າງຂອງທ່ານ, ຜູ້ດຳລົງຖານະປະໂລຫິດແຫ່ງເມນຄີເສເດັກ ກໍເປັນສະມາຊິກຂອງກຸ່ມແອວເດີ. ຜູ້ຊາຍເຫລົ່ານີ້ ມີອາຍຸຈາກ 18 ເຖິງ 98 ປີ (ຫລື ແກ່ກວ່ານັ້ນ), ທັງໝົດກໍມີປະສົບການທີ່ກວ້າງໄກກັບຖານະປະໂລຫິດ ແລະ ສາດສະໜາຈັກ. ບັດນີ້ ອ້າຍນ້ອງເຫລົ່ານີ້ສາມາດສ້າງຄວາມສຳພັນສັນອ້າຍນ້ອງໃຫ້ເຂັ້ມແຂງຂຶ້ນ, ຮຽນຮູ້ນຳກັນ, ແລະ ເປັນພອນໃຫ້ແກ່ຄົນອື່ນ ດ້ວຍປະສິດທິພາບຫລາຍຂຶ້ນ.
ທ່ານຄົງຈື່ຈຳໄດ້ວ່າ ເດືອນມິຖຸນາແລ້ວນີ້, ຊິດສະເຕີ ແນວສັນ ແລະ ຂ້າພະເຈົ້າ ໄດ້ກ່າວນຳຊາວໜຸ່ມຂອງສາດສະໜາຈັກ. ພວກເຮົາໄດ້ເຊື້ອເຊີນເຂົາເຈົ້າໃຫ້ເຂົ້າຮ່ວມກອງທັບຊາວໜຸ່ມຂອງພຣະຜູ້ເປັນເຈົ້າ ເພື່ອຊ່ວຍເຕົ້າໂຮມອິດສະຣາເອນ ທັງໃນສອງຟາກມ່ານ. ການເຕົ້າໂຮມນີ້ ກໍເປັນການທ້າທາຍ “ທີ່ສຸດ, ເປັນອຸດົມການ ທີ່ຍິ່ງໃຫຍ່ທີ່ສຸດ, ແລະ ເປັນວຽກງານທີ່ ສຳຄັນທີ່ສຸດ ຢູ່ເທິງແຜ່ນດິນໂລກ ໃນວັນເວລານີ້”!1
ມັນເປັນອຸດົມການທີ່ຕ້ອງການຜູ້ຍິງຫລາຍທີ່ສຸດ, ເພາະວ່າຜູ້ຍິງເປັນຜູ້ຫລໍ່ຫລອມອະນາຄົດ. ສະນັ້ນ ໃນຄ່ຳຄືນນີ້ ຂ້າພະເຈົ້າຂໍສະເໜີຄຳອ້ອນວອນຂອງສາດສະດາຕໍ່ທ່ານ, ບັນດາຜູ້ຍິງໃນສາດສະໜາຈັກ, ໃຫ້ຫລໍ່ຫລອມອະນາຄົດ ໂດຍການຊ່ວຍເຕົ້າໂຮມອິດສະຣາເອນ ທີ່ກະຈັດກະຈາຍໄປ.
ທ່ານສາມາດເລີ່ມຕົ້ນຈາກຈຸດໃດ?
ຂ້າພະເຈົ້າຂໍສະເໜີ ຄຳເຊື້ອເຊີນສີ່ຢ່າງ:
ໜຶ່ງ, ຂ້າພະເຈົ້າຂໍເຊື້ອເຊີນທ່ານໃຫ້ມີສ່ວນຮ່ວມໃນການຖືສິນອົດໃຊ້ເປັນເວລາ 10 ວັນ ຈາກສື່ສານມວນຊົນ ແລະ ຈາກສື່ສານໃດໆ ທີ່ນຳຄວາມນຶກຄິດທີ່ເປັນທາງລົບ ແລະ ບໍ່ສະອາດເຂົ້າມາສູ່ຈິດໃຈຂອງທ່ານ. ຂໍໃຫ້ອະທິຖານເພື່ອຈະໄດ້ຮູ້ວ່າ ຈະກຳຈັດອິດທິພົນໃດອອກໄປ ໃນລະຫວ່າງການຖືສິນອົດໃຊ້ຂອງທ່ານ. ຜົນສະທ້ອນຂອງການຖືສິນອົດໃຊ້ຂອງທ່ານເປັນເວລາ 10 ວັນ ອາດເຮັດໃຫ້ທ່ານປະຫລາດໃຈ. ທ່ານສັງເກດເຫັນຫຍັງແດ່ ຫລັງຈາກໄດ້ຢຸດພັກຈາກທັດສະນະຂອງໂລກ ທີ່ໄດ້ເຮັດໃຫ້ວິນຍານຂອງທ່ານ ໄດ້ຮັບບາດເຈັບ? ມີການປ່ຽນແປງບໍໃນບ່ອນທີ່ທ່ານຢາກໃຊ້ເວລາ ແລະ ເຫື່ອແຮງຂອງທ່ານ ໃນ ເວລານີ້? ລຳດັບຄວາມສຳຄັນຂອງທ່ານໄດ້ປ່ຽນໄປບໍ—ແມ່ນແຕ່ເລັກນ້ອຍກໍຕາມ? ຂ້າພະເຈົ້າຂໍຊຸກຍູ້ທ່ານໃຫ້ບັນທຶກລົງໄວ້ ແລະ ໃຫ້ປະຕິບັດຕາມແຕ່ລະຄວາມປະທັບໃຈ.
ສອງ, ຂ້າພະເຈົ້າຂໍເຊື້ອເຊີນທ່ານໃຫ້ອ່ານພຣະຄຳພີມໍມອນ ນັບຈາກເວລານີ້ ຈົນເຖິງ ທ້າຍປີ. ເຖິງແມ່ນອາດເບິ່ງຄືວ່າເປັນໄປບໍ່ໄດ້ ເພາະທຸກສິ່ງທີ່ທ່ານພະຍາຍາມຈະຈັດການໃນຊີວິດຂອງທ່ານ ມີຢ່າງຫລວງຫລາຍ, ຖ້າຫາກທ່ານຈະຍອມຮັບຄຳເຊື້ອເຊີນນີ້ດ້ວຍຄວາມເຕັມໃຈ, ແລ້ວພຣະຜູ້ເປັນເຈົ້າຈະຊ່ວຍເຫລືອທ່ານ ໃຫ້ພົບເຫັນວິທີທາງທີ່ຈະບັນລຸຜົນສຳເລັດນີ້ໄດ້. ແລະ, ເມື່ອທ່ານສຶກສາດ້ວຍການອະທິຖານ, ຂ້າພະເຈົ້າສັນຍາວ່າ ສະຫວັນຈະເປີດໃຫ້ແກ່ທ່ານ. ພຣະຜູ້ເປັນເຈົ້າຈະອວຍພອນທ່ານ ດ້ວຍການດົນໃຈ ແລະ ການເປີດເຜີຍ ທີ່ເພີ່ມທະວີຂຶ້ນ.
ເມື່ອທ່ານອ່ານ, ຂ້າພະເຈົ້າຢາກຊຸກຍູ້ທ່ານໃຫ້ໝາຍແຕ່ລະຂໍ້ ທີ່ເຮັດໃຫ້ທ່ານປະທັບໃຈ ຫລື ອ້າງເຖິງພຣະຜູ້ຊ່ວຍໃຫ້ລອດ. ແລ້ວ, ໃຫ້ມີຄວາມຕັ້ງໃຈກ່ຽວກັບການເວົ້າເຖິງພຣະຄຣິດ, ການປິຕິຍິນດີໃນພຣະຄຣິດ, ແລະ ການສັ່ງສອນເລື່ອງພຣະຄຣິດກັບຄອບຄົວ ແລະ ໝູ່ເພື່ອນຂອງທ່ານ.2 ທ່ານ ແລະ ເຂົາເຈົ້າຈະເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ ຜ່ານທາງຂັ້ນຕອນນີ້. ແລະ ການປ່ຽນແປງ, ແມ່ນແຕ່ສິ່ງມະຫັດສະຈັນ, ກໍຈະເລີ່ມເກີດຂຶ້ນ.
ມື້ເຊົ້ານີ້ ໄດ້ມີການປະກາດກ່ຽວກັບຕາຕະລາງໃໝ່ສຳລັບວັນອາທິດ ແລະ ການໃຫ້ບ້ານເຮືອນເປັນສູນກາງການຮຽນຮູ້, ໂດຍມີສາດສະໜາຈັກສະໜັບສະໜູນ. ເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານເປັນເຄັດລັບຕໍ່ຄວາມສຳເລັດຂອງຄວາມພະຍາຍາມ ໃນການສິດສອນພຣະກິດຕິຄຸນແບບໃໝ່ ແລະ ດຸນດ່ຽງ, ແລະ ປະສົມປະສານນີ້. ກະລຸນາສິດສອນຜູ້ຄົນທີ່ທ່ານຮັກ ເຖິງສິ່ງທີ່ທ່ານກຳລັງຮຽນຮູ້ຢູ່ຈາກພຣະຄຳພີ. ຂໍໃຫ້ສິດສອນເຂົາເຈົ້າເຖິງວິທີທີ່ຈະຫັນໄປຫາພຣະຜູ້ຊ່ວຍໃຫ້ລອດ ສຳລັບການປິ່ນປົວ ແລະ ອຳນາດແຫ່ງການຊຳລະໃຫ້ສະອາດ ເມື່ອເຂົາເຈົ້າເຮັດບາບ. ແລະ ຂໍໃຫ້ສິດສອນເຂົາເຈົ້າເຖິງວິທີທີ່ຈະດຶງເອົາອຳນາດທີ່ເສີມຄວາມເຂັ້ມແຂງຂອງພຣະອົງທຸກໆວັນຕະຫລອດຊີວິດຂອງເຂົາເຈົ້າ.
ສາມ, ໃຫ້ຈັດແບບແຜນຂອງການໄປພຣະວິຫານເປັນປະຈຳ. ສິ່ງນີ້ອາດຮຽກຮ້ອງການເສຍສະລະຫລາຍຂຶ້ນໃນຊີວິດຂອງທ່ານ. ການໄປພຣະວິຫານເປັນປະຈຳ ຈະອະນຸຍາດໃຫ້ພຣະຜູ້ເປັນເຈົ້າສິດສອນທ່ານ ເຖິງວິທີທີ່ຈະດຶງເອົາອຳນາດແຫ່ງຖານະປະໂລຫິດ ທີ່ທ່ານໄດ້ຮັບ ໃນພຣະວິຫານຂອງພຣະອົງ. ສຳລັບຜູ້ທີ່ບໍ່ໄດ້ອາໄສຢູ່ໃກ້ພຣະວິຫານ, ຂ້າພະເຈົ້າຂໍເຊື້ອເຊີນທ່ານໃຫ້ສຶກສາດ້ວຍການອະທິຖານກ່ຽວກັບພຣະວິຫານຢູ່ໃນພຣະຄຳພີ ແລະ ໃນຖ້ອຍຄຳຂອງສາດສະດາທີ່ມີຊີວິດຢູ່. ຂໍໃຫ້ສະແຫວງຫາທີ່ຈະ ຮູ້ ຫລາຍຂຶ້ນ, ທີ່ຈະ ເຂົ້າໃຈ ຫລາຍຂຶ້ນ, ທີ່ຈະ ຮູ້ສຶກ ຫລາຍຂຶ້ນ ກ່ຽວກັບພຣະວິຫານ ຫລາຍກວ່າທີ່ທ່ານເຄີຍເຮັດມາກ່ອນ.
ໃນກອງປະຊຸມໃຫ້ຄຳດົນໃຈຂອງຊາວໜຸ່ມຕະຫລອດທົ່ວໂລກ ເມື່ອເດືອນມິຖຸນາຜ່ານມານີ້, ຂ້າພະເຈົ້າໄດ້ກ່າວກ່ຽວກັບຊາຍໜຸ່ມຄົນໜຶ່ງ ທີ່ຊີວິດໄດ້ປ່ຽນໄປ ເມື່ອພໍ່ແມ່ຂອງລາວໄດ້ປ່ຽນມືຖືທັນສະໄໝຂອງລາວ ກັບມືຖືທຳມະດາຊະນິດມີຝາປິດ. ແມ່ຂອງຊາຍໜຸ່ມຄົນນີ້ເປັນຜູ້ຍິງທີ່ກ້າຫານ ແລະ ມີສັດທາ. ນາງໄດ້ເຫັນລູກຊາຍຂອງນາງຫລົງໄປຕາມການເລືອກທີ່ສາມາດກີດກັນລາວ ຈາກການອອກໄປຮັບໃຊ້ເຜີຍແຜ່. ນາງໄດ້ເອົາຄວາມອ້ອນວອນຂອງນາງໄປພຣະວິຫານ ເພື່ອຈະຮູ້ວິທີທີ່ດີທີ່ສຸດ ທີ່ຈະຊ່ວຍລູກຊາຍຂອງນາງ. ແລ້ວນາງໄດ້ປະຕິບັດຕາມທຸກໆຄວາມປະທັບໃຈ.
ນາງໄດ້ເວົ້າວ່າ: “ຂ້ານ້ອຍໄດ້ຮູ້ສຶກເຖິງພຣະວິນຍານນຳພາຂ້ານ້ອຍ ໃຫ້ກວດເບິ່ງມືຖືຂອງລູກຊາຍ ໃນເວລາໃດໜຶ່ງໂດຍສະເພາະ ເພື່ອຈະໄດ້ຮູ້ຈັກສິ່ງໃດສິ່ງໜຶ່ງໂດຍສະເພາະ. ຂ້ານ້ອຍບໍ່ຮູ້ຈັກໃຊ້ມືຖືສະໄໝໃໝ່, ແຕ່ພຣະວິນຍານໄດ້ນຳພາຂ້ານ້ອຍໃຫ້ກົດບ່ອນຫັ້ນບ່ອນນີ້ ທີ່ຂ້ານ້ອຍບໍ່ເຄີຍໃຊ້ມາກ່ອນ! ຂ້ານ້ອຍຮູ້ວ່າ ພຣະວິນຍານຊ່ວຍພໍ່ແມ່ຜູ້ທີ່ສະແຫວງຫາການຊີ້ນຳ ເພື່ອຈະປົກປ້ອງລູກໆຂອງເຂົາເຈົ້າ. [ໃນຕອນຕົ້ນ] ລູກຊາຍຂອງຂ້ານ້ອຍກໍໃຈຮ້າຍໃຫ້ຂ້ານ້ອຍຢ່າງໃຫຍ່. … ແຕ່ຫລັງຈາກສາມມື້, ລາວໄດ້ຂອບໃຈຂ້ານ້ອຍ! ລາວສາມາດຮູ້ສຶກແຕກຕ່າງ.”
ພຶດຕິກຳ ແລະ ທ່າທີຂອງລູກຊາຍຂອງນາງ ໄດ້ປ່ຽນໄປຫລາຍ. ລາວໄດ້ຊ່ວຍເຫລືອຫລາຍຂຶ້ນຢູ່ທີ່ບ້ານ, ຍິ້ມແຍ້ມຫລາຍຂຶ້ນ, ແລະ ກໍໄດ້ເອົາໃຈໃສ່ຢູ່ທີ່ໂບດ. ລາວໄດ້ຮັບໃຊ້ໃນພຣະວິຫານຊົ່ວໄລຍະໜຶ່ງ ຢູ່ທີ່ຫ້ອງບັບຕິສະມາ ແລະ ກະກຽມສຳລັບການເຜີຍແຜ່ຂອງລາວ.
ຄຳເຊື້ອເຊີນຂໍ້ທີສີ່ຂອງຂ້າພະເຈົ້າ, ສຳລັບທ່ານຜູ້ທີ່ມີອາຍຸເໝາະສົມ, ໃຫ້ມາຮ່ວມເຕັມທີ່ໃນສະມາຄົມສະຕີສົງເຄາະ. ຂ້າພະເຈົ້າຂໍຊຸກຍູ້ທ່ານໃຫ້ສຶກສາ ຂໍ້ຖະແຫລງເຖິງຈຸດປະສົງຂອງສະມາຄົມສະຕີສົງເຄາະ ໃນປະຈຸບັນນີ້. ມັນເປັນສິ່ງທີ່ດົນໃຈ. ມັນອາດຊີ້ນຳທ່ານໃນການພັດທະນາ ຂໍ້ຖະແຫລງເຖິງຈຸດປະສົງຂອງທ່ານເອງ ສຳລັບຊີວິດຂອງທ່ານເອງ. ຂ້າພະເຈົ້າຍັງຂໍໃຫ້ທ່ານຮັກສາຄວາມຈິງ ທີ່ມີຢູ່ໃນການປະກາດຂອງສະມາຄົມສະຕີສົງເຄາະ ທີ່ໄດ້ຈັດພິມເກືອບ 20 ປີຜ່ານມາແລ້ວ.3 ສຳເນົາຂອງການປະກາດນີ້ກໍມີແຂວນຢູ່ເທິງຝາ ຢູ່ໃນຫ້ອງການຂອງຝ່າຍປະທານສູງສຸດ. ຂ້າພະເຈົ້າຕື່ນເຕັ້ນ ທຸກໆ ເທື່ອ ທີ່ຂ້າພະເຈົ້າໄດ້ອ່ານມັນ. ມັນບັນຍາຍວ່າ ທ່ານເປັນໃຜ ແລະ ວ່າພຣະຜູ້ເປັນເຈົ້າປະສົງໃຫ້ທ່ານເປັນໃຜໃນເວລາ ປະຈຸບັນນີ້ ຂະນະທີ່ທ່ານເຮັດພາກສ່ວນ ຂອງທ່ານ ເພື່ອຊ່ວຍເຕົ້າໂຮມອິດສະຣາເອນ ທີ່ໄດ້ກະຈັດກະຈາຍໄປ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາຕ້ອງການ ທ່ານ! ພວກເຮົາ “ຕ້ອງການພະລັງ ຂອງທ່ານ, ການປ່ຽນໃຈ ຂອງທ່ານ, ຄວາມເຊື່ອໝັ້ນ ຂອງທ່ານ, ຄວາມສາມາດໃນການນຳພາ ຂອງທ່ານ, ສະຕິປັນຍາ ຂອງທ່ານ, ແລະ ປາກສຽງ ຂອງທ່ານ.”4 ພວກເຮົາບໍ່ສາມາດເຕົ້າໂຮມອິດສະຣາເອນ ປາດສະຈາກທ່ານແທ້ໆເດີ້.
ຂ້າພະເຈົ້າຮັກທ່ານ ແລະ ຂອບໃຈທ່ານ ແລະ ບັດນີ້ ອວຍພອນທ່ານດ້ວຍຄວາມສາມາດທີ່ຈະປ່ອຍປະໂລກໄວ້ກ່ອນ ຂະນະທີ່ທ່ານຊ່ວຍໃນວຽກງານທີ່ສຳຄັນ ແລະ ຮີບດ່ວນນີ້. ພ້ອມກັນ ເຮົາສາມາດເຮັດທຸກສິ່ງທີ່ພຣະບິດາເທິງສະຫວັນຂອງເຮົາປະສົງໃຫ້ເຮົາເຮັດ ເພື່ອກະກຽມໂລກສຳລັບການສະເດັດມາຄັ້ງທີສອງຂອງພຣະບຸດທີ່ຮັກຂອງພຣະອົງ.
ພຣະເຢຊູຄືພຣະຄຣິດ. ນີ້ແມ່ນສາດສະໜາຈັກຂອງພຣະອົງ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມຂອງພຣະເຢຊູຄຣິດ, ອາແມນ.