ຊື່ແທ້ຂອງສາດສະໜາຈັກ

ໂດຍ ປະທານຣະໂຊ ເອັມ ແນວສັນ

ພຣະເຢຊູຄຣິດໄດ້ບັນຊາເຮົາໃຫ້ເອີ້ນສາດສະໜາຈັກຂອງພຣະອົງ ໂດຍຊື່ຂອງພຣະອົງ ເພາະມັນເປັນສາດສະໜາຈັກຂອງພຣະອົງ, ຊຶ່ງເຕັມໄປດ້ວຍອຳນາດຂອງພຣະອົງ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃນວັນຊະບາໂຕທີ່ສວຍງາມນີ້ ເຮົາປິຕິຍິນດີນຳກັນ ກັບພອນຢ່າງຫລວງຫລາຍຂອງເຮົາ ຈາກພຣະຜູ້ເປັນເຈົ້າ. ເຮົາມີຄວາມກະຕັນຍູສຳລັບປະຈັກພະຍານເຖິງພຣະກິດຕິຄຸນຂອງພຣະເຢຊູຄຣິດ ທີ່ຖືກຟື້ນຟູ, ສຳລັບການເສຍສະລະທີ່ທ່ານໄດ້ເຮັດ ເພື່ອຢູ່ໃນ ຫລື ກັບຄືນມາສູ່ເສັ້ນທາງແຫ່ງພັນທະສັນຍາ, ແລະ ສຳລັບການຮັບໃຊ້ທີ່ອຸທິດຕົນຂອງທ່ານ ໃນສາດສະໜາຈັກຂອງພຣະອົງ.

ມື້ນີ້ ຂ້າພະເຈົ້າຮູ້ສຶກຈຳເປັນຕ້ອງໄດ້ກ່າວກັບທ່ານ ໃນເລື່ອງທີ່ສຳຄັນແທ້ໆ. ຫລາຍອາທິດຜ່ານມານີ້, ຂ້າພະເຈົ້າໄດ້ອະນຸມັດເອກະສານ ກ່ຽວກັບການເອີ້ນຊື່ຂອງສາດສະໜາຈັກໃຫ້ຖືກຕ້ອງ.¹ ຂ້າພະເຈົ້າໄດ້ເຮັດສິ່ງນີ້ ເພາະພຣະຜູ້ເປັນເຈົ້າໄດ້ເຮັດໃຫ້ຂ້າພະເຈົ້າ ຮູ້ເຖິງຄວາມສຳຄັນຂອງຊື່ທີ່ພຣະອົງໄດ້ຕັ້ງໄວ້ສຳລັບສາດສະໜາຈັກຂອງພຣະອົງ, ນັ້ນຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.²

ດັ່ງທີ່ທ່ານຄາດໝາຍ, ການຕອບຮັບຕໍ່ເອກະສານນີ້ ແລະ ການດັດແປງການເອີ້ນຕາມຊື່ທີ່ຖືກຕ້ອງ³ ແມ່ນເປັນທັງທາງບວກ ແລະ ທາງລົບ. ໃນທັນທີ ສະມາຊິກຂອງສາດສະໜາຈັກຫລາຍຄົນ ກໍໄດ້ເອີ້ນຕາມຊື່ແທ້ຂອງສາດສະໜາຈັກ ຢູ່ໃນເວບໄຊ້ສົນທະນາ ແລະ ໃນໜ້າສື່ສານມວນຊົນຂອງເຂົາເຈົ້າ. ໃນທຸກສິ່ງທີ່ກຳລັງເກີດຂຶ້ນຢູ່ໃນໂລກນີ້, ບາງຄົນກໍແປກໃຈວ່າ ເປັນຫຍັງຈຶ່ງຈຳເປັນຕ້ອງເນັ້ນກ່ຽວກັບບາງສິ່ງທີ່ “ບໍ່ສຳຄັນ.” ແລະ ບາງຄົນໄດ້ເວົ້າວ່າ ເປັນໄປບໍ່ໄດ້, ແລະ ຊິພະຍາຍາມໄປເຮັດຫຍັງ? ຂ້າພະເຈົ້າຈະອະທິບາຍເຖິງຄວາມຈຳເປັນທີ່ຕ້ອງເອົາໃຈໃສ່ກັບເລື່ອງນີ້. ແຕ່ກ່ອນອື່ນໝົດ ຂ້າພະເຈົ້າຂໍກ່າວກ່ຽວກັບສິ່ງທີ່ມັນ ບໍ່ ໄດ້ເປັນ:

ມັນ ບໍ່ ໄດ້ເປັນການປ່ຽນຊື່ໃໝ່.
ມັນ ບໍ່ ໄດ້ເປັນການຕັ້ງຊື່ໃໝ່.
ມັນ ບໍ່ ໄດ້ເປັນການດັດແປງໃໝ່.
ມັນ ບໍ່ ໄດ້ເປັນການປ່ຽນຊື່ຕາມອຳເພີໃຈ.
ແລະ ມັນ ບໍ່ ໄດ້ເປັນສິ່ງທີ່ບໍ່ສຳຄັນ.

ແຕ່ມັນ ເປັນ ສິ່ງທີ່ຖືກຕ້ອງ. ມັນ ເປັນ ພຣະບັນຊາຂອງພຣະຜູ້ເປັນເຈົ້າ. ໂຈເຊັບ ສະມິດ ບໍ່ໄດ້ຕັ້ງຊື່ໃຫ້ສາດສະໜາຈັກ ທີ່ຖືກຟື້ນຟູຜ່ານທາງເພິ່ນ, ແລະ ມໍມອນກໍບໍ່ໄດ້ຕັ້ງຊື່ໃຫ້. ພຣະຜູ້ຊ່ວຍໃຫ້ລອດເອງ ທີ່ກ່າວວ່າ ສາດສະໜາຈັກຂອງພຣະອົງຈະຖືກເອີ້ນດັ່ງນັ້ນໃນຍຸກສຸດທ້າຍ, ວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.⁴

ແມ່ນແຕ່ໃນສະໄໝກ່ອນ, ຄ.ສ. 34, ພຣະຜູ້ເປັນເຈົ້າຂອງເຮົາທີ່ຟື້ນຄືນພຣະຊົນ ກໍໄດ້ໃຫ້ຄຳແນະນຳທີ່ຄ້າຍຄືກັນນີ້ ແກ່ສະມາຊິກຂອງສາດສະໜາຈັກຂອງພຣະອົງ ເມື່ອພຣະອົງໄດ້ໄປຢ້ຽມຢາມເຂົາເຈົ້າ ຢູ່ທະວີບອາເມຣິກາ. ໃນເວລານັ້ນ ພຣະອົງໄດ້ກ່າວວ່າ:

“ເຈົ້າຈົ່ງເອີ້ນສາດສະໜາຈັກຕາມນາມຂອງເຮົາ. …

“ແລະ ມັນຈະເປັນສາດສະໜາຈັກຂອງເຮົາໄດ້ແນວໃດ ຖ້າຫາກມັນບໍ່ມີຊື່ຕາມນາມຂອງເຮົາ? ເພາະຖ້າຫາກສາດສະໜາຈັກມີຊື່ຕາມຊື່ຂອງໂມເຊ, ແລ້ວມັນກໍຈະເປັນສາດສະໜາຈັກຂອງໂມເຊ; ຫລື ຖ້າຫາກມັນມີຊື່ຕາມຊື່ຂອງມະນຸດ, ມັນກໍຈະເປັນສາດສະໜາຈັກຂອງມະນຸດ; ແຕ່ຖ້າຫາກມັນມີຊື່ຕາມນາມຂອງເຮົາ, ມັນກໍຈະເປັນສາດສະໜາຈັກຂອງເຮົາ.”⁵

ດັ່ງນັ້ນ, ຊື່ຂອງສາດສະໜາຈັກຂອງພຣະອົງ ຈຶ່ງບໍ່ສາມາດຕໍ່ລອງໄດ້. ເມື່ອພຣະຜູ້ຊ່ວຍໃຫ້ລອດກ່າວຢ່າງແຈ່ມແຈ້ງວ່າ ສາດສະໜາຈັກຂອງພຣະອົງ ຄວນມີຊື່ຈັ່ງໃດ, ແລະ ກ່ອນພຣະອົງໄດ້ປະກາດຊື່, ພຣະອົງໄດ້ກ່າວຂໍ້ຄວາມນີ້, “ສາດສະໜາຈັກຂອງເຮົາຈະຕ້ອງຖືກເອີ້ນຕາມນັ້ນ,” ພຣະອົງຈິງຈັງໃນເລື່ອງນີ້. ແລະ ຖ້າຫາກເຮົາປ່ອຍໃຫ້ຊື່ຫລິ້ນຖືກໃຊ້ ແລະ ເຮົາຮັບເອົາ ຫລື ແມ່ນແຕ່ສະໜັບສະໜູນຊື່ຫລິ້ນ, ພຣະອົງຈະບໍ່ພໍພຣະໄທ.

ຊື່ມີຄ່າຫຍັງແດ່, ຫລື ໃນກໍລະນີນີ້, ຊື່ຫລິ້ນມີຄ່າຫຍັງແດ່? ເມື່ອກ່າວເຖິງຊື່ຫລິ້ນຂອງສາດສະໜາຈັກ, ດັ່ງເຊັ່ນ “ສາດສະໜາຈັກ LDS,” “ສາດສະໜາຈັກມໍມອນ,” ຫລື “ສາດສະໜາຈັກຂອງໄພ່ພົນຍຸກສຸດທ້າຍ,” ສິ່ງທີ່ສຳຄັນທີ່ສຸດ ໃນ ຊື່ເຫລົ່ານັ້ນ ທີ່ຖືກ ຕັດອອກ ແມ່ນພຣະນາມຂອງພຣະຜູ້ຊ່ວຍໃຫ້ລອດ. ໃນການເອົາພຣະນາມຂອງພຣະຜູ້ເປັນເຈົ້າ ອອກຈາກສາດສະໜາຈັກຂອງພຣະຜູ້ເປັນເຈົ້າ ກໍເປັນໄຊຊະນະອັນຍິ່ງໃຫຍ່ສຳລັບຊາຕານແລ້ວ. ເມື່ອເຮົາ ປະຖິ້ມ ພຣະນາມຂອງພຣະຜູ້ຊ່ວຍໃຫ້ລອດ, ເຮົາກໍ ເຊົານັບຖື ແບບງຽບໆ ກັບທຸກສິ່ງທີ່ພຣະເຢຊູຄຣິດ ໄດ້ກະທຳເພື່ອເຮົາ—ແມ່ນແຕ່ການຊົດໃຊ້ຂອງພຣະອົງ.

ຈົ່ງພິຈາລະນາສິ່ງນີ້ ຈາກທັດສະນະຂອງພຣະອົງ: ໃນໂລກກ່ອນມະຕະ ພຣະອົງໄດ້ເປັນພຣະເຢໂຮວາ, ພຣະເຈົ້າຂອງພຣະຄຳພີເດີມ. ພາຍໃຕ້ການຊີ້ນຳຂອງພຣະບິດາຂອງພຣະອົງ, ພຣະອົງໄດ້ເປັນຜູ້ສ້າງໂລກນີ້ ແລະ ໂລກອື່ນໆ.⁶ ພຣະອົງໄດ້ເລືອກເຮັດຕາມພຣະປະສົງຂອງພຣະບິດາຂອງພຣະອົງ ແລະ ເຮັດບາງສິ່ງເພື່ອລູກໆທັງໝົດຂອງພຣະເຈົ້າ ທີ່ຄົນອື່ນບໍ່ສາມາດເຮັດ! ການທີ່ໄດ້ຈາກສະຫວັນມາສູ່ໂລກ ໃນຖານະພຣະອົງດຽວທີ່ຖືກຳເນີດຈາກພຣະບິດາ ໃນເນື້ອໜັງ, ພຣະອົງໄດ້ຖືກປ້ອຍດ່າ, ຖືກເຍາະເຍີ້ຍ, ຖືກຖົ່ມນ້ຳລາຍໃສ່, ແລະ ຖືກຂ້ຽນຕີ. ໃນສວນເຄັດເຊມາເນ, ພຣະຜູ້ຊ່ວຍໃຫ້ລອດຂອງເຮົາ ໄດ້ຮັບເອົາຄວາມເຈັບປວດ ທັງໝົດ, ບາບ ທັງໝົດ, ແລະ ຄວາມທຸກໃຈ ແລະ ຄວາມທຸກທໍລະມານ ທັງປວງ ທີ່ທ່ານ ແລະ ຂ້າພະເຈົ້າ ພ້ອມທັງ ທຸກຄົນທີ່ເຄີຍມີຊີວິດ ແລະ ຈະມີຊີວິດ ເຄີຍ ປະສົບ. ພາຍໃຕ້ພາລະອັນໜັກໜ່ວງ ທີ່ເຈັບປວດແສນສາຫັດນັ້ນ, ໂລຫິດຂອງພຣະອົງ ໄດ້ໄຫລອອກຈາກທຸກຂຸມຂົນ.⁷ ການຮັບທຸກທໍລະມານທີ່ເຈັບປວດຫລາຍທີ່ສຸດ ແມ່ນຕອນທີ່ພຣະອົງຖືກຄຶງໄວ້ເທິງໄມ້ກາງແຂນ ຢູ່ທີ່ພູຫົວກະໂຫລກ.

ຜ່ານປະສົບການທີ່ເຈັບປວດແສນສາຫັດເຫລົ່ານີ້ ແລະ ການຟື້ນຄືນພຣະຊົນຂອງພຣະອົງຫລັງຈາກນັ້ນ—ການຊົດໃຊ້ອັນເປັນນິດຂອງພຣະອົງ—ພຣະອົງໄດ້ມອບຄວາມເປັນອະມະຕະໃຫ້ແກ່ເຮົາ ແລະ ໄດ້ໄຖ່ເຮົາແຕ່ລະຄົນຈາກຜົນຂອງບາບ ໃນເງື່ອນໄຂທີ່ເຮົາຕ້ອງກັບໃຈ.

ຫລັງຈາກການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ແລະ ຫລັງຈາກການຕາຍຂອງອັກຄະສາວົກຂອງພຣະອົງ, ໂລກໄດ້ຈົມລົງຢູ່ໃນຄວາມມືດມົວ ເປັນເວລາຫລາຍສັດຕະວັດ. ແລ້ວໃນປີ 1820, ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ປະກົດຕໍ່ສາດສະດາ ໂຈເຊັບ ສະມິດ ເພື່ອເລີ່ມຕົ້ນການຟື້ນຟູສາດສະໜາຈັກຂອງພຣະຜູ້ເປັນເຈົ້າ.

ຫລັງຈາກທີ່ພຣະອົງໄດ້ອົດທົນກັບທຸກຢ່າງ—ແລະ ຫລັງຈາກທີ່ພຣະອົງໄດ້ກະທຳທຸກສິ່ງເພື່ອມະນຸດ—ຂ້າພະເຈົ້າຮັບຮູ້ດ້ວຍຄວາມຮູ້ສຶກເສຍໃຈ ທີ່ເຮົາໄດ້ຮັບເອົາສາດສະໜາຈັກຂອງພຣະອົງ ໃນຊື່ອື່ນ, ຊຶ່ງຊື່ເຫລົ່ານັ້ນ ໄດ້ຕັດພຣະນາມທີ່ສັກສິດຂອງພຣະເຢຊູຄຣິດອອກໄປ!

ທຸກວັນອາທິດ ຂະນະທີ່ເຮົາຮັບສ່ວນສິນລະລຶກຢ່າງມີຄ່າຄວນ, ເຮົາໄດ້ຕໍ່ພັນທະສັນຍາທີ່ສັກສິດຂອງເຮົາ ນຳພຣະບິດາເທິງສະຫວັນວ່າ ເຮົາຈະເຕັມໃຈຮັບເອົາພຣະນາມຂອງພຣະບຸດຂອງພຣະອົງ, ພຣະເຢຊູຄຣິດ.⁸ ເຮົາສັນຍາທີ່ຈະຕິດຕາມພຣະອົງ, ກັບໃຈ, ຮັກສາພຣະບັນຍັດຂອງພຣະອົງ, ແລະ ລະນຶກເຖິງພຣະອົງ ຕະຫລອດເວລາ.

ເມື່ອເຮົາຕັດພຣະນາມຂອງພຣະອົງອອກຈາກສາດສະໜາຈັກຂອງພຣະອົງ, ເຮົາກໍໄດ້ເອົາພຣະນາມຂອງ ພຣະອົງ ອອກໄປຢ່າງບໍ່ຕັ້ງໃຈ ຊຶ່ງເປັນສິ່ງສຳຄັນທີ່ເຮົາຄວນເອົາໃຈໃສ່ ໃນຊີວິດຂອງເຮົາ.

ການຮັບເອົາພຣະນາມຂອງພຣະຜູ້ຊ່ວຍໃຫ້ລອດ ແມ່ນຮ່ວມທັງການປະກາດ ແລະ ການເປັນພະຍານຕໍ່ຄົນອື່ນ—ຜ່ານທາງການກະທຳ ແລະ ຖ້ອຍຄຳຂອງເຮົາ—ວ່າ ພຣະເຢຊູຄື ພຣະຄຣິດ. ເຮົາຢ້ານຄົນອື່ນ ຜິດໃຈ ບໍ ຜູ້ເອີ້ນເຮົາວ່າ “ຊາວມໍມອນ” ຈົນວ່າເຮົາບໍ່ໄດ້ ຕໍ່ສູ້ ເພື່ອພຣະຜູ້ຊ່ວຍໃຫ້ລອດ, ເພື່ອປົກປ້ອງພຣະນາມຂອງພຣະອົງ ຊຶ່ງສາດສະໜາຈັກຖືກເອີ້ນຕາມພຣະນາມນັ້ນ?

ຖ້າຫາກເຮົາທັງສາດສະໜາຈັກ ແລະ ຕົວເຮົາເອງ ຈະເຂົ້າເຖິງພະລັງແຫ່ງການຊົດໃຊ້ຂອງພຣະເຢຊູຄຣິດ—ເພື່ອຊຳລະ ແລະ ປິ່ນປົວເຮົາ, ເພື່ອເພີ່ມຄວາມເຂັ້ມແຂງ ແລະ ຂະຫຍາຍເຮົາ, ແລະ ໃນທີ່ສຸດ ເພື່ອນຳຄວາມສູງສົ່ງມາໃຫ້ເຮົາ—ເຮົາຕ້ອງຮັບຮູ້ພຣະອົງຢ່າງແຈ່ມແຈ້ງ ວ່າເປັນແຫລ່ງຂອງພະລັງນັ້ນ. ເຮົາສາມາດເລີ່ມຕົ້ນໂດຍການເອີ້ນຊື່ຂອງສາດສະໜາຈັກຂອງພຣະອົງ ຕາມທີ່ພຣະອົງໄດ້ປະກາດ.

ສຳລັບຜູ້ຄົນສ່ວນຫລາຍໃນໂລກ, ໃນເວລານີ້ ສາດສະໜາຈັກຂອງພຣະຜູ້ເປັນເຈົ້າ ຖືກປົກປິດໄວ້ດ້ວຍຄຳວ່າ “ສາດສະໜາຈັກມໍມອນ.” ແຕ່ເຮົາຜູ້ເປັນສະມາຊິກຂອງສາດສະໜາຈັກຂອງພຣະຜູ້ເປັນເຈົ້າ ຮູ້ວ່າຜູ້ໃດເປັນປະມຸກຂອງສາດສະໜາຈັກ: ພຣະເຢຊູຄຣິດນັ້ນເອງ. ບໍ່ສົມຄວນເລີຍ ທີ່ຫລາຍຄົນຜູ້ໄດ້ຍິນຄຳວ່າ ມໍມອນ ອາດຄິດວ່າ ເຮົານະມັດສະການມໍມອນ. ບໍ່ແມ່ນແນວນັ້ນ! ເຮົາໃຫ້ກຽດ ແລະ ນັບຖືສາດສະດາໃນອາເມຣິກາ ສະໄໝບູຮານ ຜູ້ຍິ່ງໃຫຍ່.⁹ ແຕ່ເຮົາ ບໍ່ ໄດ້ເປັນສານຸສິດຂອງມໍມອນ. ເຮົາເປັນສານຸສິດຂອງພຣະຜູ້ເປັນເຈົ້າ.

ໃນຕອນຕົ້ນຂອງການຟື້ນຟູສາດສະໜາຈັກ, ຄຳວ່າ ສາດສະໜາຈັກມໍມອນ ແລະ ຊາວມໍມອນ¹⁰ ໄດ້ຖືກໃຊ້ເລື້ອຍໆ ໃນແບບທີ່ດູຖູກ—ເປັນຄຳທີ່ໂຫດຮ້າຍ, ທີ່ຫຍາບຄາຍ—ມີຈຸດປະສົງທີ່ຈະລົບລ້າງພຣະຫັດຂອງພຣະເຈົ້າ ໃນການຟື້ນຟູສາດສະໜາຈັກຂອງພຣະເຢຊູຄຣິດ ໃນຍຸກສຸດທ້າຍນີ້.¹¹

ອ້າຍເອື້ອຍນ້ອງທັງຫລາຍ, ມັນມີການໂຕ້ຖຽງກັນຢູ່ໃນໂລກນີ້ ກ່ຽວກັບການກ່າວຊື່ແທ້ຂອງສາດສະໜາຈັກ. ເພາະໃນໂລກ ດິຈິຕັນ ທີ່ເຮົາອາໄສຢູ່ນີ້ ແລະ ດ້ວຍການຊອກຫາຂໍ້ມູນໄດ້ຢ່າງວ່ອງໄວ—ຮ່ວມທັງຂໍ້ມູນກ່ຽວກັບສາດສະໜາຈັກຂອງພຣະຜູ້ເປັນເຈົ້າ—ຜູ້ວິຈານຈຶ່ງກ່າວວ່າ ການຈະເອີ້ນຕາມຊື່ແທ້ໃນຕອນນີ້ ແມ່ນບໍ່ສະຫລາດ. ບາງຄົນກໍຮູ້ສຶກວ່າ ເພາະເຮົາຖືກຮັບຮູ້ໂດຍທົ່ວໄປວ່າເປັນ “ຊາວມໍມອນ” ແລະ “ສາດສະໜາຈັກມໍມອນ,” ເຮົາຈຶ່ງຄວນໃຊ້ຄຳນີ້ຕໍ່ໄປ.

ຖ້າຫາກເຮົາກ່າວກ່ຽວກັບຊື່ຂອງອົງການທີ່ມະນຸດຈັດຕັ້ງຂຶ້ນເອງ, ການໂຕ້ຖຽງເຫລົ່ານັ້ນອາດຊະນະ. ແຕ່ນີ້ແມ່ນເລື່ອງທີ່ສຳຄັນ, ເຮົາຫວັງເພິ່ງພຣະອົງ ຜູ້ເປັນເຈົ້າຂອງສາດສະໜາຈັກ ແລະ ຮັບຮູ້ວ່າ ວິທີທາງຂອງພຣະຜູ້ເປັນເຈົ້າ, ຈະບໍ່ເປັນເໝືອນວິທີທາງຂອງມະນຸດຈັກເທື່ອ. ຖ້າຫາກເຮົາຈະມີຄວາມອົດທົນ ແລະ ຖ້າຫາກເຮົາຈະເຮັດພາກສ່ວນຂອງເຮົາໃຫ້ດີ, ພຣະຜູ້ເປັນເຈົ້າຈະຊ່ວຍເຮົາ ຜ່ານຜ່າຄວາມຫຍຸ້ງຍາກນີ້ໄປໄດ້ຢ່າງແນ່ນອນ. ໃນທີ່ສຸດ, ເຮົາຮູ້ວ່າ ພຣະຜູ້ເປັນເຈົ້າຈະຊ່ວຍຜູ້ທີ່ສະແຫວງຫາທີ່ຈະເຮັດຕາມພຣະປະສົງຂອງພຣະອົງ, ດັ່ງທີ່ພຣະອົງໄດ້ຊ່ວຍນີໄຟ ສຳເລັດການສ້າງເຮືອໃຫຍ່ ເພື່ອຂ້າມທະເລ.¹²

ເຮົາຕ້ອງສຸພາບ ແລະ ອົດທົນ ໃນຄວາມພະຍາຍາມ ທີ່ຈະດັດແປງຄວາມຜິດນີ້. ໜ່ວຍສື່ສານທີ່ຮູ້ຈັກຮັບຜິດຊອບ ຈະເຂົ້າໃຈ ຕໍ່ຄຳຮຽກຮ້ອງນີ້.

ໃນກອງປະຊຸມໃຫຍ່ສາມັນທີ່ຜ່ານມາ, ແອວເດີ ເບັນຈາມິນ ເດ ໂອໂຢະສ໌ ໄດ້ກ່າວກ່ຽວກັບເລື່ອງນີ້. ເພິ່ນໄດ້ກ່າວວ່າ:

“ເມື່ອຫລາຍປີກ່ອນ ຕອນຮັບໃຊ້ຢູ່ຫ້ອງການຮັບໃຊ້ມວນຊົນ ຂອງສາດສະໜາຈັກຢູ່ ແມັກຊິໂກ, [ເພື່ອນຄົນໜຶ່ງ ກັບຂ້າພະເຈົ້າ] ໄດ້ຖືກເຊີນໄປຮ່ວມລາຍການຢູ່ໃນວິທະຍຸ ເພື່ອສົນທະນາ. … [ຜູ້ດຳເນີນລາຍການຄົນໜຶ່ງ] ໄດ້ຖາມ [ພວກເຮົາ] ວ່າ, ‘ເປັນຫຍັງສາດສະໜາຈັກຂອງພວກທ່ານຈຶ່ງມີຊື່ຍາວແທ້? …’

“ເພື່ອນຂອງຂ້າພະເຈົ້າ ກັບຂ້າພະເຈົ້າ ໄດ້ພາກັນຍິ້ມ ເມື່ອໄດ້ຍິນຄຳຖາມທີ່ສຳຄັນ ແລ້ວໄດ້ເລີ່ມຕົ້ນອະທິບາຍວ່າ ຊື່ຂອງສາດສະໜາຈັກບໍ່ໄດ້ຖືກຕັ້ງຂຶ້ນໂດຍມະນຸດ. ແມ່ນພຣະຜູ້ຊ່ວຍໃຫ້ລອດຕັ້ງຂຶ້ນເອງ. … ຜູ້ດຳເນີນລາຍການໄດ້ຕອບທັນທີດ້ວຍຄວາມນັບຖືວ່າ, ‘ຄັນຊັ້ນ ພວກເຮົາຈະກ່າວຊື່ນີ້ ດ້ວຍຄວາມຍິນດີ.’”¹³

ການລາຍງານນັ້ນ ໄດ້ຈັດຕັ້ງແບບແຜນ. ເຮົາຈະຖືກຮຽກຮ້ອງໃຫ້ດັດແປງຄວາມຜິດໄປເທື່ອລະຢ່າງ ຊຶ່ງຄວາມຜິດເຫລົ່ານັ້ນໄດ້ຕິດພັນຢູ່ກັບເຮົາເປັນເວລາດົນນານ.¹⁴ ຄົນສ່ວນຫລາຍຢູ່ໃນໂລກ ອາດບໍ່ເຫັນດ້ວຍກັບເຮົາ ທີ່ຈະເອີ້ນຊື່ແທ້ຂອງສາດສະໜາຈັກ. ແຕ່ເຮົາຊິໄປໃຈຮ້າຍໃຫ້ຄົນອື່ນບໍ່ໄດ້ ເມື່ອເຂົາເຈົ້າເອີ້ນຊື່ຂອງສາດສະໜາຈັກ ແລະ ສະມາຊິກຜິດ ຖ້າຫາກຕົວເຮົາເອງກໍເອີ້ນຜິດຄືກັນ.

ແບບແຜນໃໝ່ຂອງເຮົາແມ່ນຊ່ວຍໄດ້ຫລາຍ. ມັນກ່າວວ່າ: “ໃນຂໍ້ອ້າງອີງທຳອິດ, ຊື່ເຕັມຂອງສາດສະໜາຈັກ ທີ່ຢາກໃຫ້ເອີ້ນແມ່ນ: ‘ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.’ ຂໍ້ອ້າງອີງ [ທີສອງ] ເມື່ອຕ້ອງຫຍໍ້ຊື່, ຄຳວ່າ ‘ສາດສະໜາຈັກ’ ຫລື ‘ສາດສະໜາຈັກຂອງພຣະເຢຊູຄຣິດ’ ກໍຖືກສະໜັບສະໜູນໃຫ້ໃຊ້. ຄຳວ່າ ‘ສາດສະໜາຈັກຂອງພຣະເຢຊູຄຣິດທີ່ຖືກຟື້ນຟູ’ ກໍຖືກສະໜັບສະໜູນໃຫ້ໃຊ້ຄືກັນ.”¹⁵

ຖ້າຫາກມີຄົນຖາມວ່າ, “ເຈົ້າແມ່ນຄົນມໍມອນບໍ?” ທ່ານສາມາດຕອບວ່າ, “ຖ້າຫາກເຈົ້າຖາມວ່າ ຂ້ອຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍບໍ, ແມ່ນແລ້ວ ຂ້ອຍເປັນ!”

ຖ້າຫາກມີຄົນຖາມວ່າ, “ເຈົ້າເປັນໄພ່ພົນຍຸກສຸດທ້າຍບໍ?”¹⁶ ທ່ານສາມາດຕອບວ່າ, “ແມ່ນແລ້ວ ຂ້ອຍເປັນ. ຂ້ອຍເຊື່ອໃນພຣະເຢຊູຄຣິດ ແລະ ຂ້ອຍເປັນສະມາຊິກຂອງສາດສະໜາຈັກທີ່ຖືກຟື້ນຟູຂອງພຣະອົງ.”

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າສັນຍາວ່າ ຖ້າຫາກເຮົາເຮັດໃຫ້ດີທີ່ສຸດ ໃນການເອີ້ນຊື່ແທ້ຂອງສາດສະໜາຈັກຂອງພຣະຜູ້ເປັນເຈົ້າ, ແລ້ວພຣະອົງ ຜູ້ເປັນເຈົ້າຂອງສາດສະໜາຈັກ ຈະຖອກເທອຳນາດ ແລະ ພອນຂອງພຣະອົງລົງມາເທິງຫົວຂອງໄພ່ພົນຍຸກສຸດທ້າຍ,¹⁷ ໃນວິທີທີ່ເຮົາບໍ່ເຄີຍເຫັນມາກ່ອນ. ເຮົາຈະມີຄວາມຮູ້ ແລະ ອຳນາດຂອງພຣະເຈົ້າ ເພື່ອຊ່ວຍເຮົາເອົາພອນຂອງການຟື້ນຟູພຣະກິດຕິຄຸນຂອງພຣະເຢຊູຄຣິດ ໄປຫາທຸກປະຊາຊາດ, ທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ ແລະ ກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.

ສະນັ້ນ, ຊື່ມີຄ່າຫຍັງແດ່? ເມື່ອກ່າວເຖິງຊື່ຂອງສາດສະໜາຈັກຂອງພຣະຜູ້ເປັນເຈົ້າ, ຄຳຕອບແມ່ນ “ທັງໝົດ!” ພຣະເຢຊູຄຣິດໄດ້ບັນຊາເຮົາໃຫ້ເອີ້ນສາດສະໜາຈັກຂອງພຣະອົງ ໂດຍຊື່ຂອງພຣະອົງ ເພາະມັນເປັນສາດສະໜາຈັກຂອງພຣະອົງ, ຊຶ່ງເຕັມໄປດ້ວຍອຳນາດຂອງພຣະອົງ.

ຂ້າພະເຈົ້າຮູ້ວ່າ ພຣະອົງຊົງພຣະຊົນຢູ່. ພຣະເຢຊູຄືພຣະຄຣິດ. ພຣະອົງນຳພາສາດສະໜາຈັກຂອງພຣະອົງ ໃນທຸກວັນນີ້. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.

© 2018 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, November 2018. Laotian. 15054 331