Ang Pamilya sa Kahangturan ni Alonzo
“Kay balaang dapit ang templo diin kita masilyo” (Songbook sa mga Bata, 99).
“Makauban ba nako pag-usab si Mamá ug Papá?”
“Ang Pasko sa Pagkabanhaw maoy usa ka maayong panahon sa paghunahuna mahitungod ni Jesus ug sa paghinumdom sa Iyang Pagkabanhaw,” miingon si Sister Rojas. Mipakita siya og hulagway ni Jesus. “Tungod Kaniya, ang mga tawo nga namatay na mabuhi pag-usab.”
Mihangad si Alonso sa dihang misulti niini ang iyang magtutudlo sa Primary. Nagpasabut ba kana nga makita nako pag-usab ang akong mga ginikanan? Naghunahuna si Alonso.
Namatay si Mamá katuigan na ang milabay. Wala kaayo makahinumdom si Alonso kaniya, apan ganahan siyang motan-aw sa mga litrato niini. Dayon namatay usab si Papá.
Karon nagpuyo si Alonso uban ni Abuela, ang iyang lola. Gitudloan siya niini mahitungod sa iyang simbahan, Ang Simbahan ni Jesukristo sa mga Santos sa Ulahing mga Adlaw. Bunyagan ug kumpirmahan siya sa sunod tuig, sa dihang igo na ang iyang pangedaron.
Dayon si Sister Rojas mipakita og litrato sa usa ka puti nga gambalay. “Laing talagsaon nga gasa gikan ni Jesus mao ang mga templo. Kini ang usa sa mga templo dinhi sa Chile.”
Mitan-aw si Alonso sa bulawan nga estatuwa ibabaw sa gambalay. Nindot kaayo kadto! Naghunahuna siya kon unsay nahitabo sa sulod.
“Diha sa mga templo nga ang mga pamilya masilyo nga mag-uban sa kahangturan,” miingon si Sister Rojas. “Kini nga templo sa Santiago mao ang dapit diin gisilyo ko ngadto sa akong mga ginikanan human kami mipasakop sa Simbahan. Tungod kay kami nasilyo, mahimo nako silang makauban bisan human niini nga kinabuhi.”
Mibati og kahinam si Alonso sa dihang nadungog niya kana. “Mahimo ba ko nga masilyo ngadto sa akong mga ginikanan?” nangutana siya. “Bisan tuod patay na sila?”
Miyango si Sister Rojas. “Oo! Usa kana sa mga rason nga ang mga templo importante kaayo. Makapanalangin kini sa tanang sakop sa atong pamilya, lakip niadtong namatay na.”
Sa nahabilin nianang adlawa, si Alonso padayon nga naghunahuna sa mga templo. Mihangyo siya ni Abuela nga tudloan pa siya. Mihisgot si Abuela mahitungod sa puti nga mga sinina nga isul-ob sa mga tawo sa sulod ug sa maanindot nga artwork sa mga bongbong.
“Labaw sa tanan, dinhi niini nga masilyo ka ngadto sa imong mga ginikanan,” miingon si Abuela. “Mohangyo kita og duha ka tawo sa ward nga maoy mobarug alang kanila panahon sa pagsilyo.”
“Pwede ta nga moadto ugma?” Nangutana si Alonso. “Gusto nako nga makauban si Mamá ug Papá sa kahangturan!”
Mipahiyum si Abuela. “Nalipay ko nga gusto ka nga moadto,” miingon siya. “Apan ang kinadul-an nga templo anaa sa Concepción. Wala kitay igong kwarta alang sa mga tiket sa bus.”
“Motabang ko og tigum alang sa biyahe!” Miingon si Alonso.
Sukad niadto, matag higayon nga makakita si Alonso og sinsilyo diha sa dalan o dunay kahigayunan nga makapangita og kwarta, mibayad siya og ikapulo ug dayon midugang sa nahabilin ngadto sa ilang pundo sa templo.
Human sa mga bulan nga nagtigum, si Alonso ug Abuela sa katapusan aduna nay igong kwarta aron mobiyahe ngadto sa templo. Mihangyo sila ni Brother ug Sister Silva nga mokuyog kanila. Sa adlaw sa biyahe, mihimo sila og dugay nga pagbiyahe sa bus padulong sa siyudad sa Concepción. Hapit na mosalop ang adlaw sa dihang nakakita si Alonso og daw bulawan sa layo.
“Makita na nako si anghel Moroni!” Miingon si Alonso, nagtudlo ngadto sa estatuwa ibabaw sa asul nga linginong atop sa templo.
Migahin sila sa gabii diha sa usa ka apartment tapad sa templo. Sa buntag, misulod si Alonso sa templo sa unang higayon. Nakakita siya og dako nga hulagway ni Jesus sa sulod. Siya ug si Abuela nag-ilis og puti. Mibati siya og kalipay ug kalinaw.
Sa dihang panahon na alang sa pagsilyo, si Alonso misulod sa usa ka matahum nga lawak nga dunay mga samin sa bongbong. Usa ka temple worker mipakita ni Alonso, Abuela, ug sa mga Silva unsaon sa pagluhod libut sa espesyal nga lamesa nga gitawag og altar. Gihapinan kini og humok nga panapton.
Si Brother ug Sister Silva anaa didto alang sa mama ug papa ni Alonso. Si Abuela anaa didto alang sa iyang igsoong babaye kinsa namatay sa wala pa matawo si Alonso.
Mipiyong sa iyang mga mata, gihunahuna ni Alonso nga anaa ang tibuok niyang pamilya.
Dili ko kahulat nga makita sila pag-usab, naghunahuna si Alonso. Mapasalamaton kaayo ko nga ang mga pamilya mahimong magkuyog sa kahangturan! ●
Mga paghulagway pinaagi ni Mark Jarman