Dijitol Nomo: Blong Ol Yang Adalt
I Go long Misinari Ia we I Gat Niu Sapraes Asaenmen
?Olsem wanem? ?Misin blong yu i tanem raon? Hemia sam tingting blong wan we i andastanem smol long wanem yu yu stap go tru.
Hem we i raet i stap long Yuta, YSA.
Plante long yufala ol misinari, yufala i stap long ol ples we yufala i neva ting se bae yufala i stap long hem tedei—we yufala i stap wet blong faenemaot niu misin asaenmen, o maet yufala i gobak hom. Taem mi stap luk ol stori ia, i mekem mi mi tingbaot ol gud memori blong misin blong mi, mo eksperiens we mi bin gat sam yia i pas. Mi wantem serem sam niu lukluk we i save help, we i kam long wan misinari we i kasem wan niu sapraes asaenmen, folem wetem wan narawan.
Muvaot long Albania
Eli long 1997, mi mi wan misinari long Albania. Ol kompanion blong mi mo mi i laekem kantrisaed, ol naes jis mo kabis pae, mo saon blong lanwis we mifala i bin wokhad blong lanem. Antap long evri samting ia, mifala i lavem wok wetem ol pipol longwe.
Wetem taem, politik situesen raon long mifala i kam strong moa. Mifala i traem blong lukluk nomo blong stap serem gospel, be mifala i stap harem nomo ol nius abaot ol ribel fos we oli kam strong moa raon long kantri. Afta, gavman i putum taem blong nomo wokbaot long naet, mo ol samting oli stat blong kam nogud evriwan. Nesen ia, i stap go from wan sivil wo.
Laswan, long namba 14 Maj, oli muvumaot mifala evriwan long misin. Bae mi neva fogetem telefon kol we i talem long mifala se i taem blong kam wanples blong oli save sendem mifala aot long kantri. Ol tingting mo ol filing we oli no stret oli tantanem insaed long maen blong mi. I tru. Mi wantem stap sef, be tingting blong lego ol famli we mifala i kam blong lavem, speseli long denja taem ia, i brekem hat blong mi. Bae mifala i no gat janis nomo blong talem tata.
Wokbaot blong mifala blong aot long kantri, i mekem mifala i flae long helikopta i go long wan bigfala ples, mo afta, mifala i transfea sot taem long Itali, mo afta oli sendem mifala i go long ol nara misin. Mi mi go kasem Inglan. I bin go kwik, i gud smol, mo i bin rili had. Wan long ol las memori blong mi abaot Albania, i blong lukluk ol hil mo ples oli go smol andanit long helikopta, mo mi stap askem miwan we bae ol pipol we oli stap ia, bae wanem i hapen long olgeta.
Stap Faenem Pis
Maet ol ditel blong eksperiens blong yu bae oli defren long hemia blong mi, be mi save se sam long yufala i gat ol semmak miks filing naoia. Mekem se mi hop se wanem mi gat blong serem bae i tajem tingting blong yu tu. Hemia olgeta sikis prinsipol we oli bin helpem mi blong faenem pis afta long ol defren kona mo rod blong fultaem misinari eksperiens blong mi.
-
Toktok wetem ol narafala man. Maet yu gat filing se yu no hapi mo tingting i fasfas we i mekem se yu yu wantem go stap samples yuwan. Be, hem i impoten blong yu stap toktok long ol narafalawan, speseli long taem we yu stap traem blong stretem yuwan. Go aot blong kea long ol pipol we oli helpem yu blong kipim gudfala spirit wetem yu. Wetem teknoloji we i stap tedei, !i no gat eskius nomo! Maet yu save faenem wan blong praktisim ol ovasi lanwis skil blong yu. Maet yu save stap konek wetem olgeta we yu bin stap wok wetem olgeta mo tijim olgeta. Nomata we yu filim se yu no stap long raet ples, yu yu no stap yuwan. Iven sapos famli blong yu mo ol fren blong yu oli no save olsem wanem blong sapotem yu long wan stret fasin, mi sua se plante long olgeta oli kea tru, long yu mo oli wantem se yu yu oraet i stap.
-
Gohed blong serem testemoni blong yu. I nomata weaples yu stap long hem long wol taem yu stap ridim hemia, mi no gat tu tingting nating se ol pipol we oli stap raonabaot long yu bae oli save kasem blesing from spesel lukluk blong yu. Yu no sakemaot tingting blong serem wanem we yu bin lanem mo filim olsem wan fultaem misinari—i nomata se taem we yu stap long fil i longwan o i sotwan. Taem yu stap gotru long ol las samting, mo luksave han blong God long laef blong yu, serem wanem yu luksave wetem olgeta we yu lavem olgeta. Mebi wan lesen we yu lanem aot long wokbaot blong yu i stret samting we wan i nidim blong harem.
-
Trastem se Papa long Heven i save yu. ?Yu save wanem? !Lod i bin save se bae hemia i hapen! Hem i save evri samting we i stap hapen long laef blong yu. Mo Sevya blong yu, Jisas Kraes, i andastanem stret olsem wanem yu yu stap filim. Oli stap wetem yu taem yu stap wokbaot long rod ia mo oli save givim kamfot long yu tru long Tabu Spirit. Ol filing ia blong hat i soa i save stap blong wan longfala taem, mo hemia i oraet. Trastem Lod taem Hem i talem se: “ Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala.” (Doktrin mo Ol Kavenan 84:88).
-
Gat longfala tingting taem yu stap harem nogud i stap. ?Yu harem se yu kros? ?Yu no hapi? ?Yu no glad nating? O yu luk se yu stap tingting se: “!Hemia i no stret nating!” Mebi yu stap filim plante kaen filing. Yu mas save nomo se, wanem we yu stap filim naoia, i oraet i stap. Yu stap harem nogud from yu lusum wan samting, mo hem i impoten blong yu save stap wet longtaem taem yu stap wok tru long rod ia. Long semtaem, yu mas lukaotgud blong yu no faenem eskius long ol eksperiens, o stap wokem tokbaot wanem i pas finis, mekem se yu nomo save wok tedei. Sapos yu filim se yu gat hadtaem blong gohed long sam helti fasin, askem bisop o misin presiden blong helpem yu blong toktok wetem wan profesonol kaonsela. I no gat sem blong stap askem help.
-
Traem had blong invaetem Spirit. Gohed blong draonem yu long wok ia blong gospel. Sapos oli sendem yu nara ples, gohed blong stap obei long ol rul blong misin. Faenem ol wei, evri dei blong soem long Spirit se yu wantem Hem blong i stap wetem yu, mo raetemdaon insperesen we yu kasem long Hem. Stap kolosap long Spirit mo hemia bae i helpem yu blong mekem ol desisen abaot fiuja blong yu, mo tu, blong yu faenem kamfot long situesen we yu stap long hem naoia.
-
Gat tras se oli stil “singaotem yu yet long wok ia.” Blong wan longfala taem, mi ting se “koling” blong mi we oli givim long mi, i blong stap olsem wan misinari. Sapos nomo mi bin andastanem hemia eli, se tru koling blong mi i blong givhan long ol pikinini blong God, long weaples we mi stap long hem. Iven afta we mi bin tekemaot blak nem tag blong mi, mi mas folem ol kavenan blong baptaes we i blong tekem long miwan, nem blong Jisas Kraes, mo tritim gud ol narawan long wei we Lod i wantem, evri dei. Sapos yu gat wan niu misin asaenmen o oli rilisim yu long fultaem seves, yu mas save gud se ol talen blong yu, bae yu save yusum olgeta blong bildimap Kingdom blong God long weaples yu stap go long hem.
Insaed long Ol Han blong Hem
Mi ting se wan long ol nogud samting blong stap aot long Albania, i blong lego ol niufala Sent we bae oli mas lan blong laef wetem gospel olgetawan nomo. ?Mo yu save wanem? Oli bin mekem wan gudfala wok. Iven we yumi no bin stap blong helpem olgeta, God i bin stap wetem olgeta. Stat long taem we, 20 yia i pas, wok long graon ia i bin gohed, mo ol Sent oli stap strong.
Mekem se, dia misinari, gohed blong lukluk long tabu wok blong han we i stap kamaot long fored blong yu. I gat ol pipol yet we oli nidim voes blong yu, mo i gat plante glad blong stap glad long hem yet. Yusum spesel eksperiens ia olsem wan janis blong mekem rilesensip blong yu wetem God i kam dip moa. Bae God i blesem yu taem yu stap muv fored wetem fet.