Dijitol Nomo: Blong Ol Yang Adalt
Wanem we Jos long Hom i bin Tijim Mi abaot Fasin blong Mit Tugeta
Mi harem nogud smol taem we oli stopem, blong smol taem, ol miting blong Jos from se i gat wol sik ia. Naoia, mi mi talem tangkyu tumas long wanem mi bin lanem.
Hem we i raet i stap long Skania, Swiden.
Blong stap go long jos, oltaem i bin wan long ol haelaet blong wik blong mi. Mi laekem blong kam tugeta wetem ol fren mo famli, mo lego ol wari blong wol ia oli stap long saed taem mifala i stap wosip tugeta.
Afta, evri samting i bin stat blong jenis from wol sik ia. Long tetaem ia, yumi no bin gat plante sikman we oli gat koronavaeres long Swiden, mo skul i stap gohed olsem oltaem, mekem se mi no rili andastanem se from wanem ol lida blong Jos oli bin filim nid ia blong stopem ol miting blong sot taem. Wetem wei we ol samting oli bin stap go krangke olbaot raon long wol, mi bin wantem tumas blong mit wetem ol fren blong mi long Sandei. Be afta, mi bin lanem se oli bin stopem ol miting blong Jos blong sot taem, mo bae yumi stap wosip nomo long hom. Mi no hapi mo mi harem mi kros smol from hemia.
Taem Sandei i bin kam, mi bin putum dres blong mi, mo putum mekap long fes, mi kakae long moning, mo sidaon wetem papa mo mama blong mi. Mi luk papa blong mi i bin rere gud finis long sakramen. Wetem wan waet klos i ova long bred mo wota, mo i bin openem ol skripja blong hem long ples blong prea blong sakramen.
I no longtaem, i taem blong singsing sakramen hym. Taem papa blong mi i stat blong brekem bred, mi bin filim Spirit i strong tumas. I olsem se Hem i bin stap talem long mi se Atonmen blong Jisas Kraes, i blong mi stret. Mi stat blong krae, mo taem i luk i go long mama blong mi, mi luk se hem tu i stap krae mo i stap smael long mi—hem i save filim Spirit ia tu.
I nomata mi bin gat tu tingting abaot hemia long fas ples, naoia, mi save se blong tekem sakramen long hom, i wan janis we i praevet mo i naes tumas. Ova long ol las wik, mi bin filim tangkyu moa from prishud ia mo gospel ia we i bin kambak, we i givim yumi kamfot mo pis long ol taem ia blong trabol. Mo tu, mi bin filim lav we Papa blong yumi long Heven i gat long evriwan long ol pikinini blong Hem. Mo mi bin filim tangkyu from profet ia, we i stap helpem yumi blong save wanem blong mekem, iven taem yumi no andastanem from wanem.
Stat long fas taem ia we oli givim instraksen blong gat jos long hom, KOVID-19 i bin kasem plante taosen pipol long Swiden, mo i stap gohed blong spolem kolosap evri kantri long wol ia. Mo i nomata se mi lavem blong gat praevet taem blong holem jos long hom wetem sam moa famli we mi lavem, mi bin luksave tu se, hemia i no semmak olsem we blong stap go long jos mo stap wosip tugeta olsem wan wod o wan branj. Blong oli stap leftemap wanwan long yumi long sakramen miting mo ol nara miting, hemia, i no gat samting bae i save tekem ples blong hem.
Olsem we Elda D. Todd Christofferson blong Kworom blong Olgeta Twelef Aposol i bin tijim: “Bigfala risen we Lod i gat wan Jos i blong krietem wan komuniti blong ol Sent we bae oli sapsapotem olgeta long “stret mo smol rod we i lid i go long laef we i no save finis” [2 Nifae 31:18].”1
Mi bin luksave se jos i moa bitim blong jes kam tugeta wetem ol fren evri wik. Hem i abaot blong tekem sakramen, blong stap filim se yu yu pat blong wan ples, blong sapsapotem wanwan long yumi, mo blong stap bildim wan komuniti blong fet long kingdom blong God. Oltaem bambae mi talem tangkyu from ol blesing blong save gat wan jos long hom long taem blong KOVID-19 ia, mo blong ol niu tingting we mi bin kasem abaot hamas i impoten blong stap mit tugeta. Bae sakramen miting i kam moa spesel taem bambae yumi save mit bakegen.