Ua Na’o Tusiga Faatekinolosi: Autalavou Matutua

I Le Faifeautalai Ua Faafuasei ona Toe Tofia

Saunia e Amy Harrris

Pe na i ai se taimi na sui faafuasei ai lau misiona? O motugaafa nei mai se tasi e malamalama i sina vaega o mea o loo feagai ma oe.

E alala le tusitala i Iuta, ISA.

O le toatele o outou faifeautalai e le o i ai i nofoaga sa faamoemoe e te i ai i le taimi nei—o loo faatalitali pe o le a le tofiga fou o lau misiona, pe atonu foi ua e toe foi i le fale. O le matamata atu i nei tala ua aumaia ai ni manatuaga maaleale o lou lava aafiaga i le misiona i tausaga ua mavae. Sa ou mafaufau atonu e mafai ona ou faasoa atu ni nai vaaiga e ono fesoasoani atu ai, mai se tasi faifeautalai na toe tofia mai se tasi misiona i se isi.

O Le Faatula’ieseina o Tagata Mai Alepania

I le amataga o le 1997, sa avea au ma se faifeautalai i Alepania. Sa ma fiafia ma la’u soa i nuu i tua, o pai manogi o le sisi-ma-le-spinach, ma le leo o le gagana sa ma galulue punouai ai e aoao. Ae o le mea sili lava, sa ma fiafia e galulue faatasi ma tagata iina.

I le aluga o taimi, sa faateleina le ogaoga faaupufai sa siomia ai i matou. Sa ma taumafai e tulitulimatagau i le faasoaina atu o le talalelei ae sa le mafai ona taofi ai le faalogo atu i talafou e uiga i le au fouvale ua lilofia ai le atunuu. Ona faia lea o vavao a le faigamalo, ma amata ai le tulaga matautia o mea. Sa agaigai atu le atunuu i le taua faalemalo.

Mulimuli ane, i le aso 14 o Mati, na faatula’iese ai le matou misiona atoa. O le a le galo lava ia te au le telefoni na ta’u mai ai ua oo i le taimi matou te potopoto ai ina ia mafai ai ona faanatinati ese i matou mai le atunuu. Sa faataavili mafaufauga ma lagona feteenai i lo’u mafaufau. Ioe sa ou fia saogalemu, ae o le mafaufau i le tuua o aiga ua tupu lo ma alolofa i ai, aemaise i lena tulaga matautia, na nutimomoia ai lo’u loto. O le a le maua se avanoa matou te faamavae ai.

O la matou malaga ese mai le atunuu sa aofia ai se malaga i se helikopa i se vaalele e alu i totonu ona sosoo ai lea ma se suiga puupuu i Italia a o lei toe tofia i ni misiona eseese. Sa iu ina ou i ai i Egelani. Sa vave lava, ma sa fai si o’u fiafia, ae na tele lava ina faigata. O se tasi o o’u manatuaga mulimuli o Alepania o le matamata atu i le taatia mai lalo o la matou helikopa o mou atu, ma mafaufau po o le a se mea e ono oo i tagata sa matou tuua.

Mauaina o le Filemu

E ui o le a ese ia faamatalaga o ou aafiaga mai o’u aafiaga, ae ou te manatu o loo lagona e nisi o outou lagona fefiloi e tutusa i le taimi nei. O lea, ou te faamoemoe o mea o le a ou faasoa atu o le a toe faaolaola ai foi ia te oe. O mataupu faavae nei e ono na fesoasoani ia te au e maua ai le toafilemu ina ua mavae femilosaiga ma feliuaiga o o’u aafiaga faafaifeautalai faamisiona.

1. Fesootai ma isi. Atonu na i ai ni ou lagona faanoanoa ma le fememea’i e te manao ai e te tuumuli ese mai isi. Ae e taua le faatumauina o le fesootai, aemaise i isi taimi itiiti e sosoo ai a o fetuutuunai. Aapa atu i tagata alolofa o e o loo fesoasoani e siitia o outou agaga. Faatasi ai ma tekinolosi o loo maua i le aso, e matua leai lava se ‘alofaga! Atonu e mafai ona e maua se tasi e faataitai ai ou tomai i le gagana fou. Atonu foi e mafai foi ona e fesootai pea ma i latou sa e auauna atu i ai ma aoaoina. E ui atonu o le a e lagonaina e te le o masani i le taimi nei, ae e le o tuua na o oe. E tusa lava pe le iloa e lou aiga ma uo le auala e lagolagoina lelei ai oe, ae ou te iloa o le toatele o i latou e alolofa moni ia te oe ma e mananao ia e fiafia.

2. Faaauau pea le faasoaina atu o lau molimau. E le afaina po o fea lava le itulagi o e i ai a o e faitauina lenei tala, e leai so’u masalosalo o loo siomia oe e tagata o le a faamanuiaina e ala i lau vaaiga tulagaese. Aua e te matamuli mai le faasoa atu o mea na e aoaoina ma lagonaina o se faifeautalai faamisiona—e tusa lava pe o le a le umi pe puupuu o lou taimi “i le galuega”. A o e faagasolosolo i mea na tutupu lata mai nei, ma iloa le aao o le Atua i lou olaga, ia faasoa atu na mea ua e iloa i e pele ia te oe. Atonu o se lesona na aoaoina mai mea fou na e maua, o se mea tonu lava lea e manaomia ona faalogo i ai se tasi.

3. Talitonu e silafia oe e le Tama Faalelagi. E te iloa? Na silafia e le Atua o le a tupu lenei mea! Ua ia silafia mea uma o loo faaalia i lou olaga. Ma ua malamalama lelei lava lou Faaola, o Iesu Keriso, i ou lagona. O loo faatasi i La’ua ma oe a o e savalia lenei ala ma e mafai ona faamafanafana oe e ala i le Agaga Paia. O lagona o le lototiga e ono tumau mo se taimi umi lava, ma e le afaina lena mea. Talitonu i le Alii ina ua Ia fetalai, “O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).

4. Ia onosai a o e faanoanoa. Pe o e lagona le ita? Faanoanoa? Loto vaivai? Pe o e mafaufau ifo, “E le fetaui lenei mea!”? Atonu o loo e lagonaina se ituaiga o lagona eseese. Tau lava ina e iloa po o le a lava le mea o e lagonaina i le taimi nei e aoga. O loo e faanoanoa i se mea ua le o i ai, ma e taua le onosai ia te oe lava ia a o e galue i lena faagasologa. I le taimi lava e tasi, ia faaeteete ia aua nei taumatemateina ou aafiaga pe toe soona faufau i mea ua tuanai aua e aafia ai lou tomai e galue ai i le aso. Afai ua e lagona e pei o loo e tauivi ia taulimaina i ni auala lelei, fesili atu i lou epikopo po o le Peresitene o le misiona e fesoasoani ia te oe e fesootai ma se faufautua faapolofesa. E le tatau ona e ma e ole atu mo se fesoasoani.

5. Fai se taumafaiga e valaaulia ai le Agaga. Faaauau pea ona faatofu oe lava i le galuega o le talalelei. Afai e toe tofia oe i se isi mea, ia tausisia le usiusitai i tulafono o le misiona. Saili ni auala i aso uma e faaali atu ai i le Agaga e te manao ia te Ia e faatasi ma oe, ma tusi i lalo le musumusuga e te maua mai ia te Ia. O le tumau latalata i le Agaga o le a fesoasoani ia te oe e faia faaiuga e uiga i lou lumanai faapea foi ona e maua ai le mafanafana i lou tulaga o i ai nei.

6. Ia i ai le talitonuga o loo “valaauina [pea oe] i le galuega.” Mo se taimi umi, sa ou manatu o lo’u “valaauga” o le nofoaga lea na tofia i ai au e avea ma se faifeautalai. Maimau pe ana ou malamalama muamua o lo’u valaauga moni o le auauna atu lea i fanau a le Atua i soo se mea ou te i ai. E oo lava ina ua ou aveesea le pine uliuli o lo’u igoa, sa noatia pea au e feagaiga o le papatisoga ina ia tauave i o’u luga le suafa o Iesu Keriso ma faia i isi e pei ona Ia faia i aso taitasi. Pe ua i ai sou tofiga fou i se misinoa, pe ua faamalolo oe mai le auaunaga faamisiona talai, ia mautinoa e mafai ona faaaoga au taleni e fausia ai le malo o le Atua po o fea lava e te alu i ai.

I Ona Aao

Ou te manatu o se tasi o vaega e sili ona mafatia ai i le tuua o Alepania o le, ona sa matou lafoaia ni Au Paia fou lava semanu latou te faatautaia le talalelei e aunoa ma la matou fesoasoani. Ae e te silafia? Sa latou faia se galuega ofoofogia. E ui lava matou te le i ai iina e fesoasoani ia i latou, ae sa faatasi le Atua ma i latou. Talu ona ou tuua i le silia ma le 20 tausaga ua mavae, sa alualu i luma le galuega i lena laueleele, ma o loo malolosi foi le Au Paia.

O lea, le faifeautalai pele, faaauau pea ona vaavaai mo le galuega taulima paia i le mea o loo faaalia i ou luma. O loo i ai pea tagata e manaomia lou leo, ma o loo i ai pea le tele o le olioli e tatau ona maua. Faaaoga lenei aafiaga tulaga ese e avea o se avanoa e faateleina ai la oulua sootaga ma le Atua. Tau ina Ia faamanuia ia te oe a o e agai pea i luma ma le faatuatua.

Faamafanafanaga i Taimi o le Le Mautonu

“Ua ou iloa le maoae ma le ofoofogia o faamanuiaga ua faapolopoloina e le Atua mo i latou o e alolofa ma auauna ia te ia. O lea la, i le aluga o nei taimi o le le mautonu, ia faamafanafanaina i le folafolaga lenei mai le Faaola. Na Ia fetalai, “O A’u, o le Alii, e noatia a’u pe a outou faia mea Ou te fai atu ai.’ Ou te folafola atu ia te outou e mafai ona maua e tagata uma o e o le a faalogo ia te ia ma usiusitai i ana tulafono le olioli. ”

Peresitene Russell M. Nelson, “Ua Valaaulia e Peresitene Nelson Tagata Uma o le Lalolagi ia Anapopogi mo le ‘Faamalologa Faaletino, Faaleagaga ’ i le Tali atu i KOVITI-19,” Mat. 26, 2020, tala fou. ChurchofJesusChrist.org.