O Se Savali Faapitoa mo Taimi Lē Mautonu

Faaopoopoga i le Liahona o Me 2020

Ua aafia uma i tatou i le faama’i pipisi o i ai nei ma isi luitau o tutupu i le salafa o le lalolagi. E malamalama lava o nei faalavelave atonu e ono osofia ai lagona o le le fiafia, popole, ma le fefe. Ae e le tuulafoaiina i tatou e le Atua. E mafai ona Ia fesoasoani ia tatou agai i luma ma le faatuatua.

Saunia mo Taimi Faigata

“O le mea lea, o Aʼu o le Alii, ona ua Ou iloa le malaia o le a oo mai i luga o e o nonofo i le lalolagi, na Ou valaʼau atu ai i luga o laʼu auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17).

O lena mamanu o faaaliga taiala e faaauau pea i aso nei. O loo sauniuni i tatou e le Alii mo mea e tutupu e pei o nei mea e ala i perofeta o aso nei, e aofia ai lo tatou taitai o loo i ai nei, Peresitene Russell M. Nelson.

“O loo tatou ola i se vaitau ofoofogia pe a tatou vaaia pea le aao o le Alii i olaga o Ana fanau,” na molimau ai talu ai nei le perofeta i se vitio i luga o le initoneti. “O lo tatou Tama Faalelagi ma Lona Alo, o Iesu Keriso, e silafia i tatou, alolofa ia i tatou, ma o loo leoleoina i tatou.”

O nei luitau e tuuina mai ia i tatou se avanoa e faaaoga ai mea na tatou aoaoina e uiga i le faatotonugalemuina o tapuaiga o le talalelei i aiga. Faatasi ai ma se loto auauna atu, e mafai ona tatou aapa atu ma le agaalofa ia i latou o siomia i tatou.

Filemu ia Keriso

I ia mea uma, e ofoina mai e le Alii se filemu sili atu le malosi nai lo le popole.

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

O loo i lalo ni punaoa matou te faamoemoe o le a fesoasoani ia te outou e faatautaia ai faigata o aso nei. Ia e iloa e alofagia oe. I le avea ai ma fanau a le Atua, o le a tatou sao ai faatasi mai lenei luitau.

Fesili ma Tali

1. O fea e mafai ona ou maua ai taiala talu ai nei e faatatau i gaoioiga a le Ekalesia?

O le itulau autu a le Ekalesia (ChurchofJesusChrist.org) o le a faafouina e le aunoa i faamatalaga e uiga i sauniga i Aso Sa ma isi gaoioiga a le Ekalesia. Mo se faataitaiga, ua talosagaina e le Au Peresitene Sili ia epikopo ma peresitene o siteki e fuafua faatasi pe faapefea ona maua e tagata o le Ekalesia le faamanatuga ia le itiiti ifo ma le faa-tasi i le masina. O le itulau autu e aofia ai foi savali faʻamafanafana atonu e te manatu e faʻaaoga e faasalalau atu ai le faʻamoemoe ia i latou o loʻo siomia oe. Ia manatua o lau punaoa pito sili ona taua o le Agaga Paia, o le e mafai ona tuuina atu ia te oe faaaliga patino e uiga i le fesoasoani atu i tagata o loo e taitaia.

Agai i le vaega “Savali o le Faamoemoe ma le Faamafanafanaga” o loo i lalo mo se lisi o tusiga e uiga i faanoanoaga, taliaina o le finagalo o le Alii, fesoasoani i tamaiti e taulimaina, ma isi savali faamafanafana e mafai ona e faasoa atu.

2. E mafai faapefea ona ou auauna atu i isi ma le saogalemu i lenei taimi?

Mo i latou o loo nonofo faatasi ma e pele ia i latou, o nisi o auaunaga e sili ona taua e mafai ona faia i totonu o puipui o o tatou lava fale. Fautuaga mo le fesoasoani i le autalavou ma tamaiti e mafai ona maua i le faaiuga o lenei tusiga. Mo le fesootai ma i latou i fafo atu o le aiga, o tekinolosi ua maua ai le tele o filifiliga. Vili, lafo se feau tusitusi, pe saili nisi auala e aapa atu ai ia i latou e te popole i ai. I le faaopoopo atu i le siakiina o latou manaoga faaletino, mafaufau e uiga i mea e mafai ona e faia e fesoasoani ia latou lagona le fesootai ma le tuulafoaia itiiti.

E tatau foi i taitai ona mafaufau pe mafai faapefea e tekinolosi ona fesoasoani ia i latou ia mautinoa o loo talisapaia manaoga o tagata taitoatasi. O punaoa o faamatalaga e aofia ai le polokalama feaveai o Meafaigaluega mo Tagata Auai, Gospel Living app circles, ma Punaoa mo Taitai ma Failautusi.

Talu mai Iuni 2018, ua i ai i Liahona taitasi se tusiga o le “Mataupu Faavae o le Auaunaga” atonu e mafai ona fesoasoani ia te oe. Mo se faataitaiga, o le tusiga mo Tesema 2018 o loʻo faasoa atu ai manatu mo auala eseese e fesootai atu ai i isi e te popole i ai. Manatua o le tatalo mo tagata i le igoa e mamana.

3. Ae faapefea le konafesi aoao?

Ua valaaulia i tatou uma e le Au Peresitene Sili ma le Korama a Aposetolo e Toasefululua ina ia saunia ma auai i le konafesi aoao. E ui o le a le faapotopotoina faatasi faaletino le Au Paia i le Nofoaga Autu mo Konafesi po o falelotu ia Aperila 4-5, o tekinolosi ua mafai ai ona tatou auai faatasi i luga o upegatafailagi ma tuufaatasia i le agaga ao tatou faitau, matamata, ma faalogologo faatasi. O lenei konafesi o le a fesoasoani ia i tatou e manatua ai ma faamanatu le Uluai Faaaliga, lea na tupu i le 200 tausaga talu ai, ma le Toefuataiga faifai pea o le Talalelei a Iesu Keriso i nei aso e gata ai.

Mo nisi faamatalaga e uiga i le saunia ma auai i le konafesi, asiasi i le gc.ChurchofJesusChrist.org.

4. E mafai faapefea ona sili atu aʻu tapuaiga i fafo atu o sauniga a le Ekalesia?

O loo faaaogaina e le Au Paia i le salafa o le lalolagi tusitusiga paia, musika o le talalelei, Sau, Mulimuli Mai ia te Au, mekasini o le Talalelei, Sabbath.ChurchofJesusChrist.org, ma isi punaoa o le Ekalesia e faatumu ai a latou aso o tapuaiga i le Sapati. O nisi aiga ua fai mai o nei sauniga ua faatotonugalemu i aiga o nisi ia o aafiaga aupito faaleagaga na latou maua o se aiga! Afai e te lagona le lofituina, aua le fiu. E le afaina le faafaigofie-o se pese, se tala faatusi paia, ma se molimau puupuu e mafai ona avea o se aafiaga matagofie tau-tapuaiga.

Ina ia aoao e uiga i le ala na tapuai ai le Au Paia i Kana mai le fale i le taimi o le “faasa” ai o le lotu, tagai “E Le Mafai ona e Faasaina le Mea o i Loʻu Loto” (Liahona Fepuari 2018).

Savali o le Faamoemoe ma le Faamafanafanaga

Faatasi ai ma le mamafa o lipoti o tala fou o loo siomia ai i tatou, e manaomia lo tatou faaaluina o se taimi e aloese ai mai le atuatuvale ma fafagaina o tatou agaga. O tala o loo i lalo e mafai ona valaauina le Agaga ma tuuina atu luitau i se vaaiga talafeagai. Sei o tatou mafaufau aemaise lava i mea o loʻo aafia ai tamaiti ma le autalavou i aso nei, ma ia nofouta i mea faalavefau ma faanoanoaga o loo fetaiai ma i latou. I le avea ai ma tagata matutua, o la tatou galuega le tuʻuina atu ia i latou o tali ma le fesoasoani latou te manaʻomia.

Mai Konafesi ua Mavae

• Asiasi i le gc.ChurchofJesusChrist.org ma kiliki “Autu” ia faigofie ai ona maua lauga ua tuanai ia ua uma ona faatulagaina i autu e pei o le faamalologa, loto faafetai, ma le alofa.

E Faatatau i le Mauaina o le Filemu

• “Manuia i Lenei Olaga” (Tesema 2016 Liahona): Ua molimau mai Peresitene Eyring i le faamanatuga ma le filemu o folafolaga a le Faaola.

• “Punaoa o le Filemu ma le Mana” (Mati 2019 Liahona): Ua uunaia i tatou e Elder Godoy e tuuina atu i le Alii le mea sili e mafai ona tatou faia ma faalagolago i Lona alofa tunoa.

• “Maua le Filemu mo Oe Lava ma Isi i Taimi Faigata” (Aperila 2019 Liahona): E valu fautuaga mo le sailia ma le faasoaina atu o le filemu.

Ata o Keriso, saunia e Heinrich Hofmann

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

E Faatatau i le Taulimaina o Faalavelave Faalenatura

• “Faalavelave Faalenatura—E Le Tatau Ona Tatou Fefefe” (Liahona Aokuso 2012): Na tuuina mai e Elder Ellis ni fautuaga mo faalavelave a o le’i oo mai, a o tutupu, ma pe a mavae ona tutupu.

E Faatatau i le Taliaina o le Finagalo a le Alii

• “Taliaina o le Finagalo ma le Taimi a le Alii” (Liahona Aokuso 2016): Ua faasoa mai e Elder Bednar ni tala e faatatau i Au Paia faatuatua.

• “Ae Peitai, A Le o Lea” (konafesi aoao ia Oketopa 2002): Ua uunaia i tatou e Elder Wickman e aua le masalosalo i le agalelei o le Atua, e tusa lava pe tupu se mea matautia.

E Uiga i le Faanoanoa

• “O Le a Oo Mai le Aso Sa” (konafesi aoao ia Oketopa 2006): Ua faamanatu mai e Elder Wirthlin ia i tatou e mafai ona tatou tulimatai atu i le faamalologa.

Mo le Fesoasoani i Tamaiti Laiti

• “Taulimaina o Faalavelave” (Liahona Aperila 2019): Punaoa e fesoasoani i tupulaga talavou ma tamaiti e maua ai le mautu ma le mafanafana.

• “O Le A Ou Toe Vaai Ia Te Ia” (Liahona Aperila 2019): Ua molimau Sister Aburto i le Toetu. O le itulau lona lua e aofia ai kata o upusii faʻamafanafana.

• Asiasi i le lessonhelps.ChurchofJesusChrist.org ma kiliki i autu e pei o le “Matau/Popole.”

A o tatou mafaufau e uiga ia Iesu Keriso i lenei vaitau o le Eseta, ia tatou manatua e silafia e Ia o tatou tiga uma, mafatiaga, ma vaivaiga. E alofa o Ia ia i tatou ma e i ai pea ma i tatou.

Tagai Sau, Mulimuli Mai ia te A’u—Mo Tagata Taitoatasi ma Aiga: Tusi a Mamona 2020, 54–57.