Punaoa o le Filemu ma le Mana
Saunia e Elder Carlos A. Godoy
O Le Au Peresitene o Fitugafulu
E mafai faapefea ona tumau i le filemu, matafiafia, ma le malosi e o loo feagai ma luitau?
Tagata Suesue o le Vanimonimo Talavou, saunia e Brian Kershisnik
O se tasi o aafiaga e sili ona loloto na ou oo i ai o se Pulega Aoao o le auauna lea i Au Paia pele i Venesuela. O tagata iina, e aofia ai tagata o le Ekalesia, e nonofo i tulaga faigata. E ui i lea, e ui ina i ai lea mea moni, sa mafai foi ona ou vaai, i au asiasiaga masani i le atunuu, sa i ai lava se eseesega o tagata lautele ma le Au Paia o Aso e Gata Ai.
O le Aafiaga FaaVenesuela
O le Au Paia i Venesuela o loo faia lea mea sili latou te mafaia. E moni e toatele o loo mafatia ma tauivi, ma o loo tinou le Ekalesia i le lagolagoina o i latou o e moomia le fesoasoani e ala i tupe o le taulaga anapogi, polokalama o le uelefea, ma taumafaiga amata o le ola tutoatasi. Ae ao faigofie ona mafai ona maua e le Au Paia mafuaaga e faanoanoa ai, e aofia ai ma luitau uma o lo o latou feagai ai, o i latou o ni tagata fiafia—o lo o filemu ia i latou lava, e tele lava ina ataata, ma faamoemoe mo aso lelei i luma atu.
E moni lenei mea mo le autalavou o le Ekalesia i Venesuela. O o latou luitau faaletagata ma faaleaiga o loo faamalosia atili ai i latou ma saunia ai i latou mo le lumanai. E moni foi lenei mea mo a tatou faifeautalai Venesuela. E tatau ona latou malolosi mo i latou lava, mo a latou tagata sailiili, ma mo o latou aiga. Ma o loo latou faia. Latou te faamanatu mai ia i tatou le autau talavou e 2,000 a Helamana. E ui ina itiiti i fainumera, ua latou “matuā totoa i le lototetele” (tagai Alema 53:20–21). O loo saunia e le Alii se augatupulaga o tina, tama ma taitai malolosi i Venesuela. Soo se taimi lava ma te i ai i le lotolotoi o le Au Paia iina, ma te mauaina le faatumulia o i maua i le faatuatua i le talalelei ma i le lumanai.
Filemu i Taimi o Puapuaga
E mafai faapefea ona tumau pea i le filemu, matafiafia, ma le malosi, e o lo o feagai ma na luitau? Ou te talitonu o le mea o lo o tupu i le toatele o i latou ua amata ona latou faalagolago atili atu i le Atua. O se taunuuga, o lo o latou maua le malosi mai le punaoa o le malosi uma. O lo o latou iloaina faamanuiaga ua latou maua mai i le Tama Faalelagi, ua latou faalagolago i le mana o Iesu Keriso ma Lana Togiola, ma o lo o faamafanafanaina, lagolagoina, ma faamalosia e le Agaga Paia. O se taunuuga, e faamamaina atili a latou avega, o o latou mafatiaga e fofoina, ma latou te maua le filemu i le totonugalemu o o latou tofotofoga.
O tagata o le ekalesia i Venesuela o lo o aafia i se faataitaiga faaonaponei o le mea na tupu ia Alema ma ona tagata i le Tusi a Mamona:
“Ma o lenei sa oo ina faamamaina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauai atu ma le fiafia ma le onosai i le finagalo atoa o le Alii” (Mosaea 24:15).
O Le Mana Faaola o Iesu Keriso
O lau molimau i le finagalo o le Atua e faamanuiaina i tatou ua faamalosia atili i le faaalu ai o le taimi e faatasi ma tagata o le ekalesia i Venesuela. I le aafiaga o Alema ma e na mulimuli ia te ia, o le Au Paia i Venesuela ua faamalosia, ma o le faatele ai o lo latou alualu i luma ua faamamaina ai avega ua latou tauaveina. Ua valaaulia i tatou e le Faaola e o atu ia te Ia pe a i ai ni a tatou avega mamafa, ma o le a tatou maua le malologa (tagai Mataio 11:28–30). O nei tagata o le ekalesia lelei ua faamalosia e tauave a latou avega i le malosi o le Alii.
O le Au Paia i Venesuela o ni tagata fiafia—ua malilie ia i latou lava, e tele ina ataata, faamoemoe i aso lelei i luma atu.
E avea ma taunuuga o o latou tofotofoga, ma se faamanuiaga mo le tuu atu o lo latou faatuatua i le Faaola ma Lona alofa mutimutivale, ua latou maua ai se suiga i le loto ma ua taitoatasi i latou ua avea “e pei o se tamaitiiti e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā” (Mosaea 3:19).
I le otootoga, e ala i tofotofoga ua latou atinae ai amioga faaKeriso ua faamoemoe soo uma o Keriso ia maua.
O le a le mea ua tupu ia te i latou o le mea tonu foi lea e tatatu ona tupu ia te i tatou taitoatasi. O le a tofu i tatou uma ma luitau ma tofotofoga i o tatou olaga. A tatou oo i ai, e tatau ona tatou faapea ifo ia i tatou lava:
-
Pe o tatou tepa atu i le Atua e fesoasoani mai ia i tatou e manumalo mai i na taimi faigata?
-
Pe o tatou naunau ea e totogi le tau e avea ai ma se tagata sili atu ma atinaeina uiga faaKeriso ua alagatatau mo lo tatou alualu i luma?
-
Ua tatou malamalama e ala atu i le mana o le Togiola a le Faaola, tatou te maua ai le malosiaga ma le faamoemoe?
E faapefea ma aisea e mafai ai e le Faaola ona tuuina mai lena faamafanafanaga ma le mana? Ua tau mai e tusitusiga paia ia i tatou: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma maʼi o ona tagata.
“Ma o le a ia ave i ona luga le oti ina ia mafai ona ia tatalaina fusi o le oti ia ua noatia ai ona tagata ma o le a ia ave i ona luga o latou vaivaiga ina ia mafai ona faatumuina lona loto i le alofa mutimutivale e tusa ai ma la le tino ina ia mafai ona ia silafia e tusa ai ma la le tino le ala e fesoasoani ai i ona tagata e tusa ma o latou vaivaiga” (Alema 7:11–12).
O lo o Silafia e le Alii
E pei ona aoao mai e Elder David A. Bednar o le Korama a Aposetolo e Toasefululua, “Na puapuagatia le Faaola e le mo na o a tatou agasala ae faapea foi mo le le tutusa, o le amioletonu, o le tiga, o le ita, ma le faavauvau faalelagona lea e masani ona tatou pagatia ai. E i ai le taimi o o tatou vaivaiga tatou te alalaga atu ai, ‘E leai se tasi e malamalama. … E leai se tasi e iloa.’ Atonu e leai se tagata soifua na te iloa. Peitai o le Alo o le Atua na te silafia ma malamalama lelei lava, aua sa Ia lagonaina ma tauave a tatou avega ona faatoa tatou oo lea i ai. Ma talu ai ua uma ona Ia totogia le tau atoa ma tauave lena avega, ua Ia malamalama lelei ai lava ma mafai ona faaloaloa mai Lona aao o le alofa mutimutivale i le tele o itu o o tatou olaga” (“O Le Togiola ma le Malaga i le Olaga Faitino,” Liahona, Ape. 2012, 19).
Ona sii mai lea e Elder Bednar lenei mau, lea e fesoasoani ia i tatou e malamalama ai faapea o le Togiola a Iesu Keriso, e mafai ona maua ai e i tatou taitoatasi le filemu:
“Ia outou o mai ia te au, outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” (Mataio 11:28–30).
Faamatalaga mai le Malaga o le Au Paia saunia e Brian Kershisnik
E fia faaopoopo atu lau molimau i upu a Elder Bednar. Ua ou iloa foi e ala i aafiaga faaletagata lava ia e mafai ona tatou maua le malosi ma le filemu i aao agaalofa o lo tatou Faaola. O le mana faaola ma gafatia o le Faaola e le na o se punaoa o le faamagaloina o a tatou agasala, ae o se punaoa maoae o le faamoemoe, filemu, malosi, mafanafana, taleni, musumusuga, ma mea uma ua tatau ai e fesoasoani ia te i tatou e ala atu i la tatou faigamalaga i lenei olaga ma manumalo ai. E mafai moni lava ona tatou faalagolago “i galuega, ma le alofa mutimutivale, ma le alofa tunoa o le Mesia Paia” (2 Nifae 2:8).
O lo Tatou Lava Faaaogaina i le Olaga
E mafai faapefea ona tatou maua lenei punaoa o le malosi? O le a le mea e tatau ona tatou faia e maua ai le fesoasoani tatou te manaomia?
Muamua, e tatau ona ia i tatou le faatuatua i le Alii o Iesu Keriso ma Lana Togiola. E tatau ona tatou malamalama o Ia ma Lona Tama o punaoa o le filemu ma le mana. Latou te faia mea uma ia mafai ona faataunuu.
Ona, tatau lea ona tatou galulue ma faia le mea sili tatou te mafaia i soo se mea o tatou feagai ai. Atonu o loo tatou galulue e foia se vaivaiga, sailia o se toomaga mai le puapuaga, pe o tauivi foi e atinaeina se taleni. E ui ina pei e le lava a tatou taumafaiga silisili i nisi o taimi, afai tatou te tuuina atu moni lava le mea sili, o le a faamanuia mai tatou e le Alii i Lona alofa mutimutivale i mea tatou te manaomia.
“Ao faasolo ina malamalama oe ma au ma faagalue le mana galue o le Togiola i o tatou olaga patino,” na faapea mai ai Elder Bednar, “o le a tatou tatalo ma saili mo le malosi e sui ai o tatou tulaga nai lo o le tatalo mo o tatou tulaga ia suia. O le a avea i tatou ma sui e galulue nai lo o ni mea faitino e taugalueaina (tagai i le 2 Nifae 2:14)” (“The Atonement and the Journey of Mortality,” Liahona, 16).
E tatau foi ona tatou manatua pe a fai o faia lo tatou vaega, o loo i ai le Alii i o tatou autafa. O lo tatou vaega o le taua e le faapea e moomia ona tau toatasi. O le a ia faatasi mai ia i tatou, mai le amataga e oo i le faaiuga. Ou te molimau o upu o Isaia e moni: “Aua o aʼu le Alii lou Atua o le ua taofi lou lima taumatau, o le ou fai atu ia te oe, Aua e te fefe; o au o le a ou fesoasoani ia te oe” (Isaia 41:13). E moni lenei mea mo Au Paia i Venesuela, ma e moni mo Au Paia i soo se mea i le lalolagi.