Faaeega Paia o le Malumalu F&T
Saunia mo le faaeega paia i le malumalu? Ua tuuina atu ni tali e taitai o le Ekalesia i nisi o fesili masani.
E mafai faapefea ona ou saunia ia maua lou faaeega paia?
“Ona o se malumalu e paia, ua fetalai mai le Alii ia puipuia mai le faaleagaina. Soo se tasi lava e mafai ona ulu atu pe a naunau e saunia lelei mo lena faamanuiaga. …
“…E te saunia faaletino e ala i laei talafeagai e alu atu ai i le malumalu. E le o se nofoaga mo laei faasamasamanoa. Na faamamafaina mai e perofeta o Aso e Gata Ai le faaaloalo o le tagata lava ia i o tatou tino faaletino. E tatau ona matauina faapitoa lava lena tulaga e i latou o e o le a ulu atu i se malumalu paia.”1
“O aoaoga o le malumalu e faigofie ma matagofie. E malamalama i ai le tagata lotomaualalo, ae mafai foi ona faamalamalamaina ai le mafaufau o le tagata poto. “O le sauniuniga faaleagaga e faalauteleina e le suesue. Ou te fia fautua atu faapea o tagata o loo malaga atu i le malumalu mo le taimi muamua ia faitau ia parakalafa faamalamalama o loo i le taiala i Tusitusiga Paia, i lalo o autu: ‘Faauuina,’ ‘Togiola,’ ‘Keriso,’ ‘Feagaiga,’ ‘Pau o Atamu,’ ‘Osigataulaga,’ ma le ‘Malumalu.’ O le faia o lea mea o le a maua ai se faavae mautu.”2
—Peresitene Russell M. Nelson
O isi punaoa e mafai ona fesoasoani i le saunia e maua le faaeega paia e aofia ai:
Russell M. Nelson, “Sauniuniga a le Tagata Lava Ia mo Faamanuiaga o le Malumalu,” Liahona, Iul. 2001, 37–40.
“Faapaiaina,” “Faaeega Paia,” “Tulafono o le Faapaiaga,” “Malumalu,” Gospel Topics, topics.lds.org.
Ao e saunia e maua lou faaeega paia, e tatau ona e lagona le mafanafana e talanoa atu ai e uiga i le malumalu i lou aiga, uo, ma taitai o le Ekalesia. O lesona i lau vasega e saunia ai mo le malumalu o le a maua ai foi le tele o faamatalaga aoga ma faatonuga.
O le a le mea e tupu i le taimi o le sauniga o le faaeega paia?
“O le faaeega paia o le malumalu e … mauaina i ni vaega se lua:
“I le vaega muamua, o le a e mauaina e oe lava ia ma na o oe lava se muai sauniga e taua o le uluai sauniga. O le uluai sauniga e aofia ai ni faamanuiaga faapitoa e faatatau i lou tofi paia ma lou malosiaga.
“I le vaega lona lua, o le a e mauaina ai le vaega o totoe o lou faaeega paia i se vaega o tagata faatasi ma isi o loo auai i le malumalu. I le taimi o lenei vaega, e tuuina atu ai le fuafuaga o le faaolataga, e aofia ai le Foafoaga o le lalolagi, le Pau o Atamu ma Eva, le Togiola, le Liliuese, ma le Toefuataiga, e faapena foi faatonuga i le ala e mafai ai e tagata uma lava ona toe foi atu i le afioaga o le Alii. O nisi o vaega o le faaeega paia e tuuina atu i le vitio ma o nisi e tuuina atu e taitai o le malumalu.
“Faatasi ai ma nei sauniga, o le a valaaulia oe e osi ni feagaiga faapitoa ma le Alii. O nei feagaiga e aofia ai le usiusitai i le Atua ma le talalelei a Iesu Keriso, tausia o oe lava ina ia atoatoa ma mama, ma tuuto atu lou taimi ma taleni i le galuega a le Alii. Ae ua folafola mai ai e le Atua, ia faamanuiaga ofoofogia i lenei olaga ma le avanoa e toe foi atu ai ma ola faatasi ma Ia e faavavau.
“I le faaiuga o le faaeega paia, e ulu atu tagata auai faafaailoga i le afioaga o le Alii ao latou ulu atu i le potu selesitila. O iina e mafai ai ona e faaalu le taimi e mafaufau loloto ai, tatalo, malolo, faitau tusitusiga paia, pe talanoa filemu ai i ou aafiaga ma aiga ma uo. O se nofoaga lenei o le filemu, e mafai ai foi ona e maua le mafanafana ma le taitaiga faalelagi.”3
E mafai ona tatou talanoa e uiga i le faaeega paia i fafo o le malumalu?
O se vaega o mafuaaga tatou te le masani ona talanoa ai auiliili e uiga i le faaeega paia i fafo o le malumalu e sau mai le faatonuga a le Alii ia “aua le faatauvaaina mea paia” (Mataupu Faavae ma Feagaiga 6:12). E mafai ona tatou faafetai faapea e aoao mai le Alii ia i tatou “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30) ma o le a tuuina mai ia i tatou na o mea ua tatou saunia, i lea taimi, e taliaina. Ua valaaulia e le Alii tagata uma e o mai i Lona maota, ae o le faamoemoe e faapea o i latou e maua lenei meaalofa ma le tiutetauave paia ua saunia.
E tele vaega, e aofia ai feagaiga o le malumalu, e mafai ona tatou talanoa i ai ae tatou te lei o atu i le malumalu mo le uluai taimi. E i ai nisi vaega, e faapitoa lava i sauniga, tatou te talanoaina tau lava o totonu o le malumalu. O sauniga ma lotu o le malumalu e patino ma paia, ma o se vaega e avea ai na sauniga ia faapitoa o le ala tatou te migao ai, faaaloalo, ma faaeteete pe a tatou talanoa i ai.
“O le faitauina ma le faaeteete o tusitusiga paia e faaalia mai ai le le’i ta’uina mai e le Alii mea uma i tagata uma. Na i ai ni tulaga manaomia e agavaa ai muamua ona faatoa mauaina lea o ni faamatalaga paia. E faapena sauniga o le malumalu.
“Tatou te le talanoaina sauniga o le malumalu i fafo atu o le malumalu. Peitai e lei faamoemoeina le malamalama e uiga i sauniga o nei malumalu e faapea ua mo na o nisi e toaitiiti ua filifilia, o le a nafa ma le faamautinoaina o isi e le iloa lava. O le mea moni o se tuufaafeagai, o lena tulaga. Ma ni taumafaiga malosi lava matou te uunaiaina ai tagata uma ia agavaa ma ia saunia mo sauniga o le malumalu.”4
—Peresitene Boyd K. Packer (1924-2015), Peresitene o le Korama a Aposetolo e Toasefululua
Aisea e taua tele ai lou mauaina o lou faaeega paia?
O sauniga ma feagaiga o le malumalu e taua tele ona latou te taitai atu i faamanuiaga silisili na e maua e fanau a le Tama Faalelagi i le taimi nei ma le faavavau. Na taua e Elder Robert D. Hales (1932–2017) o le Korama a Aposetolo e Toasefululua, “O le faamoemoega autu o le malumalu o le tuuina mai ai lea o sauniga e manaomia mo lo tatou faaeaga i le malo selesitila.”5 O le faaeega paia o le malumalu e fesoasoani e faaagavaa ai i tatou, e ala i le Togiola a Iesu Keriso, mo le ola e faavavau. Ae e fesoasoani foi ia i tatou i o tatou olaga i aso taitasi. O feagaiga ma sauniga o le faaeega paia e faamanuiaina ai i tatou i le taimi nei lava i le mana, puipuiga, ma le faamoemoe ma fesoasoani ia i tatou ia avea faapei ona finagalo le Atua ia avea ai i tatou.
Ua faamanatu mai e perofeta o le aso ia i tatou faapea e mafai ona tatou maua faamanuiaga e ala i le malumalu. Na saunoa mai Peresitene Boyd K. Packer, “O a tatou galuega i le malumalu e ufitia ai i tatou i se ufifatafata ma se puipuiga, i le avea ai ma ni tagata taitoatasi faapea ma se nuu.”6
O le a se mea e mafai ona ou faia ia malamalama atili ai i le faaeega paia o le malumalu ma feagaiga ou te osia iina?
Taulai atu i aoaoga ma feagaiga o le malumalu i lau suesuega patino. Saili mo mau fesootai i mataupu faavae ma feagaiga o le faaeega paia o loo maua i tusitusiga paia, lauga o konafesi aoao, ma isi tusitusiga a le Ekalesia. O le iloiloina o nei upumoni i lau suesuega patino o le a fesoasoani ia te oe e tuputupu ae ai i lou malamalama i sauniga ma feagaiga o le malumalu. Pe a suesueina le tulafono o le ola mama, mo se faataitaiga, e mafai faapefea e le amiosao o Iosefa ina ua faaosoosoina e le ava a Potifara ona faamanuiaina lou naunau e usiusitai i lenei tulafono? (tagai Kenese 39). E mafai faapefea e le naunau o Nifae e usiusitai i poloaiga a le Atua ona faaaoga i le ala e te vaai ai i lau auaunaga i lou valaauga? (tagai 1 Nifae 3:7).
Toe foi i le malumalu i le tele o taimi e mafai ai e lou tulaga faaletagata.