O Le a le Mea e Monima O Le a le Mea e Le Moni?

Saunia e Elder Carl B. Cook

O Le Au Peresitene o Fitugafulu

Pe sa e mafaufau ea pe e faapefea ona fuafua po o le a moni lava le mea e moni?

Na ou feiloai talu ai nei i se tamaitai talavou ofoofogia, e 17-tausaga o Caylee, ao ia faasoa mai ona lagona ootia i se konafesi a le siteki. Na ia folafola mai faapea e moni le Atua, e moni le Ekalesia, ma o Peresitene Russel M. Nelson o le perofeta a le Atua. Na ia tuuina mai foi se molimau malosi faapea o mea le lelei ua tau mai e nisi e uiga i le Ekalesia ma le talalelei a Iesu Keriso e sese.

Na ou ofo i le talitonuga a Caylee ma lona mafaia ona iloa po o le a le mea e moni ma o le a le mea e le moni.

Ae na sili lou ofo ina ua ou talanoa ia Caylee i le maea ai o le sauniga ma iloa ai lona popolega ma o le talitonuga e lei faigofie ona oo mai. O le mea moni, na ia onosaia se luitau faigata i lona faatuatua.

O le mea lea na ia faasoa mai.

Tauiviga e Saili ni Tali

Na toaga lava Caylee i le Ekalesia. Ae ui i lea, ao ia amata ona mafaufau loloto e uiga i le talalelei ma le Ekalesia, na oso mai i lona mafaufau ni fesili faigata. Na ia lagonaina le nofosala mo le fesiligia ma amata loa ona suesue mo ni tali.

“O lou faafitauli,” na fai mai ai Caylee, “o lou saili lea i nofoaga sese uma lava. Nai lo le sailia o tusitusiga paia po o lauga o konafesi ma talanoa i ou matua, na ou tau i ni tusiga i upega tafailagi na tau maia latou te mauaina uma tali i au fesili.”

I le amataga, na manatu Caylee o tusiga i upega tafailagi na faasusuluina le malamalama i ana fesili. Ae ui i lea, ua ia fai mai ai, “Ao ou faaauau pea ona suesue i au fesili, o mea na ou faitauina na faatumuina au i isi ma isi mau fesili ma isi ma isi masalosaloga.”

Na amata ona leai se faatuatua ma se faamoemoe o Caylee. “Na amata ona tau emoemo le malamalama o lau molimau,” ua ia manatuaina, “ma na amata ona ou taofia le faia o mea sa aoaoina ai au—faitau tusitusiga paia ma tatalo, ma auai i le seminare.”

Na iu lava ina lofituina o ia i le pogisa ma le le mautonu na ia lagonaina. Ua ia fai mai, “Na le mafai ona ou filifili po o fea le mea e mai le Atua ae po o le a le manatu valea lea ua fenumiai ma fatuina e se tasi e faapogisaina ai au. Sa le toe mafai ona ou filifili po o fea le mea sao ae o fea e taufaasese. Na faaleagaina ai au.”

Ua faatusa e Caylee lona tulaga ia Iosefa Samita ina ua ia saunoa mai, “Ina ua mavae se taimi, sa oo ina ou taunuu i le faaiuga o loʼu tumau pea i le pogisa ma le fenumiai, pe ou te faia e pei ona faatonu mai e Iakopo, o lona uiga, ia ole atu i le Atua. Ina ua mavae se taimi sa ou filifili e ‘ole atu i le Atua,’ [Iakopo 1:5], i le manatu ifo afai e tuu mai e ia le poto ia i latou ua leai se poto, ma foai tele mai, ma lē taʼutaʼua mai, atonu o le a ou taumafai i ai.” (Iosefa Samita—Talafaasolopito 1:13).

Talanoa i Tagata Na te Talitonuina

I lea taimi faigata, na aapa atu Caylee i lona faiaoga seminare, lona tinamatua, ma lona tina. Na faamautinoa atu e lona faiaoga seminare ia te ia faapea o ona lagona e le sese ma e le na o ia le tagata e i ai ni fesili. Na faasoa atu e lona faiaoga lana molimau ma fautuaina e faitau tusi na e mafai ona fesoasoani ia Caylee i lana sailiga.

E lei lauga atu le tinamatua o Caylee ia te ia. Na o lona uunaia faigofie lava o ia e mafaufau po o fea punaoa o faamatalaga e siitia ai o ia—faamatalaga i upega tafailagi po o aoaoga faavae o le Ekalesia? Na amata ona faatusatusaina e Caylee: “O le fea na siitia ai au? O le fea na aumaia le olioli ma le filemu i lou agaga? O le fea na aoaoina au faapea o le a ou faatasi ma lou aiga e faavavau i se tulaga o le fiafia e-le-iu pe afai ou te mulimuli i poloaiga a le Atua? O le fea e tuuina ni leo malomaloa i lou mafaufau?”

Sailiga o le Atua e ala i le Tatalo ma Tusitusiga Paia

Na uunaia e le tina o Caylee o ia e tatalo. Na iu loa, ina alu atu Caylee i lona potu ma sasaa atu lona loto i le Atua. Ua ia faamatala mai: “E leai se mea na tupu. E lei o mai i lalo ni agelu. E lei faatumuina lou loto i le filemu ma le agaga faafetai. Na ou toe foi atu i lou tina. Na ma tatalo faatasi, ona ia uunaia lea o au e faitau le Tusi a Mamona mo le 10 minute. Ao ou faitauina, na ou lagonaina se folafolaga i lou loto faapea afai ou te faaauau pea ona faia o lea mea, o le a ou vaai i faamanuiaga. O le a mafai ona ou vaai ma iloa po o fea aoaoga na oo mai le Atua ae o fea e leai.”

Na amata ona tatalo Caylee i aso uma ma faitau le Tusi a Mamona. Na ia aloese mai le saite o le Twitter ma uepisaite na amataina ona masalosaloga i le taimi muamua lava. Na ia alu i le seminare ma le manatu e aoao, ae aua le vaai mo manatu le lelei e uiga i le Ekalesia.

Filifiliga Po o Fea E Moni

Pe a ma le lua vaiaso mulimuli ane o le taumafaiga faifai pea, na ia lagonaina ai na leo le lelei ua faifai malie atu lava. Na faasolo ina sili atu ona lelei le aoga. O galuega na sili atu ona fiafia i ai, ma na ia maua se mafutaga sili atu ma ona matua. Na sili atu lona fiafia.

Ona o lena fiafia, ua ia fai mai ai, “Na iu lava ina ou vaai i lau tali. Na mafai ona ou filifili po o le fea e mai le Atua ae po o le fea e leai aua na ou vaaia au lava ia i mea na Ia faia mo au pe a ou faia mea Na te tau mai e fai.”

“Ua na o le pau lava lena,” na ia faaiu ai, “o le ala e mafai ai ona e filifili moni lava po o le fea e mai le Atua ae o le fea e leai. E mafai ona tatou suesue ma mafaufau loloto ma fesiligia mea uma tatou te mananao ai, ae sei vagana ua tatou faia e pei ona faatonuina mai e Iakopo ma le mea na fai e Iosefa Samita—ole atu ma faia loa—ona faatoa mafai lea ona tatou iloa moni lava po o le fea e moni ae o le fea e leai.”

O le a la se mea tatou te aoao mai le aafiaga o Caylee? O ni nai manatu nei.

E le tatau ona tatou maua se lagona leaga pe a i ai ni a tatou fesili.
E le tatau lava ona tatou taofia le tatalo ao tatou saili mo ni tali.
E tatau ona tatou suesue ma mafaufau loloto i le Tusi a Mamona.
E ala i le filifilia ma le faaeteete po o a mea tatou te faitauina ma faalogologo i ai, e mafai ona tatou tapeina leo malomaloa o tekinolosi ma agafesootai na e tosoina ese i tatou mai le upumoni ma fuafua e faaleagaina i tatou.
E tatau ona tatou fefautuaai ma tagata tatou te iloa, alolofa i ai, ma faaaloalogia—nai lo le saili atu o le fesoasoani mai tagata ese.
O le a iu lava ina tali mai le Atua ia tatou fesili i Lana lava ala ma Lana lava taimi. E alofa o Ia ia i tatou.
O le a oo mai tali ao tatou fai le finagalo o lo tatou Tama Faalelagi—ae le pe a tatou faia mea ua tau mai e le lalolagi.

Ua uunaia au e Caylee ma tamaitai talavou ma alii talavou ua saunia e le Atua mo lenei taimi. O ia, e pei o le toatele o outou, e pei o le ituaiga o tagata na vaaia e Peresitene Russell M. Nelson: “Matou te manaomia tamaitai e i ai le meaalofa o le iloatino o e e mafai ona iloa taualumaga i le lalolagi ma iloaina i latou o e e le faavaea i upumoni pe lamatia foi, e tusa po o le a le lauiloa i fea.”¹

O outou o tagata saili i le upumoni, o tagata tausi feagaiga, ma tagata e fausia le malo. Faatasi ai ma le fesoasoani a le Atua ma e ala mai le mana o Iesu Keriso ma Lana Togiola, e mafai ona e maua le meaalofa o le filifili ma iloa, ola, ma faasoa atu le mea e moni.