E Anoanoai Mea e Tatau Ona Ou Aoaoina e Uiga i le Perisitua

I le avea ai ma se tamaitai talavou ma mulimuli ane avea o se faifeautalai, ou te manatua le tau mafaufau pe e faatatau ni fuaiupu faapitoa o tusitusiga paia ia te au o se tamaitai, ae maise lava na mau e faatatau i le galuega faafaifeautalai ma le perisitua. I ou valaauga eseese i le taimi nei i le Ekalesia ma i le avea ai o se faiaoga i mataupu faalelotu, na fesili mai ai nisi ia te au i fesili lava ia pe faapefea ona faatatau le perisitua ia i latou.

E pei ona ou tusia i lau tusiga i le itulau e 34, na tau atu e taitai o le Ekalesia i ni nai tausaga ua mavae i tagata ia malamalama atili i le perisitua. Na taua e Peresitene Russell M. Nelson se popolega faapea “e toatele o tatou uso ma tuafafine e le o malamalama atoatoa i le mataupu o le mana ma le pule o le perisitua.”¹

E sao le faaupuga faapea “o le aoao e uunaia ai musumusuga.” A o ou suesue i le perisitua ma aoao atu tagata aoga i le iunivesite e uiga i le perisitua, e le gata ua ou iloa ai le itiiti tele o lou iloa ae faapena foi ona tatalaina ai lou loto i upumoni e faavavau e faatatau i le perisitua.

Ou te faamoemoe ao outou aoao atili e uiga i le perisitua i lenei tusiga, o le a outou malamalama ai faapea e finagalo o tatou Matua Faalelagi e faamanuia i tatou i le perisitua ma ua augani mai perofeta o aso e gata ai mo i tatou ina ia faaaoga tatau nei avanoa—atonu e faapitoa lava i na e tuuina atu i alii ma tamaitai agavaa i le malumalu.

Ma le faamaoni lava,

Barbara Morgan Gardner