O Le Faapogai o le Pule o le Perisitua
Auiliiliga mai le Keriso o loo Faauuina Aposetolo e Toasefululua, saunia e Harry Anderson
O le perisitua o le mana ma le pule a le Atua, lea na Ia tuuina mai ia te i tatou e faia ai Lana galuega o le faaolataga (tagai Tusitaulima 2: Taitaiga o le Ekalesia [2010], itulau 8.) Na tuuina atu e le Alii Lana perisitua i auauna filifilia talu aso o Atamu. Ona o le perisitua e tuuina atu i alii agavaa e ala i le faaee atu o lima ma o loo tausia se faamaumauga o na faauuga, o i latou o lo o umia le perisitua e mafai ona sue lo latou laina o le perisitua i tua e oo ia Iosefa Samita, o le na mauaina le Perisitua Mekisateko i Aposetolo a Iesu Keriso.
1. Peteru, Iakopo, ma Ioane
I le taimi o Lana galuega talai i le lalolagi, na tuuina atu ai e Iesu Keriso Lana pule faaleperisitua i Ana Aposetolo, e aofia ai Peteru, Iakopo, ma Ioane (tagai Mataio 10).
2. Iosefa Samita ma Oliva Kaotui
I le aso 15 o Me, 1829, na faaali ai Ioane le Papatiso ia Iosefa Samita ma Oliva Kaotui e tuuina atu ai ia te i laua le Perisitua Arona. I ni nai vaiaso mulimuli ane, na tuuina atu ai e Aposetolo anamua o Peteru, Iakopo, ma Ioane ia Iosefa Samita ma Oliva Kaotui le Perisitua Mekisateko (tagai Mataupu Faavae ma Feagaiga 27:12; 128:20; Aoaoga a le Perofeta o Iosefa Samita, fili. Iosefa Filitia Samita [1976], 81, 101).
Auiliiliga mai le Oliva Kaotui o loo Faauuina Iosefa Samita, saunia e Walter Rane
3. Aposetolo ma Taitai o Aso e Gata Ai
Na tuuina atu e le Perofeta o Iosefa Samita le perisitua i isi alii agavaa, o e, i lalo o le taitaiga a le Perofeta, na tuuina atu i isi alii agavaa, ma faapena ai lava, seia oo mai i aso nei.
Ki o le perisitua
O ki o le perisitua o le pule lea ua tuuina mai e le Atua i taitai perisitua e faatonu ai le faaaogaina o Lana perisitua i luga o le fogaeleele, e aofia ai le ala e tuuina atu ai le perisitua mai le tasi perisitua i le isi. Mo se faataitaiga, ua na o se epikopo, o le umia ki o le perisitua mo lana uarota, e mafai ona faatagaina se tama po o se alii talavou i lana uarota e mauaina le Perisitua Arona. Ia Aperila i le 1836, na maua ai e Iosefa Samita ki taua o le perisitua mai ia Mose, Elaia, ma Elia i le Malumalu o Katelani (tagai Mataupu Faavae ma Feagaiga 110).