O Le Malelega Faaiu
Faalogoina o le siufofoga o le Alii i le Konafesi Aoao
Saunia e Elder Neil L. Andersen
O Le Korama a Aposetolo e Toasefululua
Mai se lauga o le konafesi aoao o Oketopa 2017.
Elder Neil L. Andersen
Ou te tuu atu la’u tautinoga o Iesu o le Keriso, o loo Ia taitaia mataupu o lenei galuega paia, ma o le konafesi aoao o se tasi lea o taimi taua tele Na te tuu mai ai faatonuga i Lana Ekalesia ma ia i tatou taitoatasi.
A o tatou feiloai ai i lalo o le taitaiga a Peresitene Russell M. Nelson, tatou te tulimatai atu e faalogo i le “finagalo o le Alii, … o le mafaufau o le Alii, … o le siufofoga o le Alii, ma o le mana lea a le Atua mo le olataga.” (Mataupu Faavae ma Feagaiga 68:4). Tatou te faalagolago i le folafolaga a le Alii: “Pe i lou lava leo po o i le leo o a’u auauna, ua tutusa lava.” (Mataupu Faavae ma Feagaiga 1:38).
I le vāvāō ma le fenumiai o lo tatou lalolagi i nei aso, o le faatuatuaina ma le talitonuina o upu a le Au Peresitene Sili ma le Korama a le Toasefululua e taua tele i lo tatou tuputupua’e faaleagaga ma le tumau.
Ua tatou o mai i le konafesi aoao ua uma ona tatalo ma ua saunia. Mo le toatele o i tatou, o loo i ai ni popolega e manaomia vave ni tali, ma ni fesili aupito faamaoni. Tatou te mananao ia faafou lo tatou faatuatua i lo tatou Faaola, o Iesu Keriso, ma ia faamalosia lo tatou tomai e tetee atu ai i faaosoosoga ma aloese ai mai mea faalavefau. Ua tatou o mai ina ia aoaoina mai lugā.
Ou te folafola atu a e saunia lou agaga, ma e sau ma tulimatai atu o le a e faalogo i le siufofoga o le Alii, o le a oo atu manatu ma lagona i lou mafaufau ua faapatinoina faapitoa lava mo oe.
O loo i ai se oa natia o le taitaiga faalelagi o loo faatalitali mo lou mauaina i savali o le konafesi aoao. O le suega la mo i tatou taitoatasi o le auala tatou te tali atu ai i mea tatou te faalogo i ai, o mea tatou te faitau i ai, ma mea tatou te lagonaina.
Ou te folafola atu ia te oe a o e faafofoga i le siufofoga o le Alii ia te oe i aoaoga o lenei konafesi aoao, ona faatino lea o na uunaiga, o le a e lagonaina le aao o le lagi i ou luga, ma o le a faamanuiaina ai lou olaga ma olaga o isi o loo siomiaina oe.