O Ata o le Faatuatua
Jason ma Jackie Wong
Hong Kong, Saina
Ua iloa e Jason ma Jackie e taua le faatumauina o le sootaga o ni toalua. La te iloaina foi le taua o le faatumauina o le sootaga i le Atua. O le tatalo e le aunoa ua faamalosia ai ma faamanuiaina ai le la faaipoipoga.
E ui lava i le pisi o a la fuafuaga, e faamautinoa lava e Jason ma Jackie e faaavanoa lo la taimi i afiafi e faitau ai faatasi i tusitusiga paia.
Ina ua uma lana misiona, na le toe toaga Jason mo se lua tausaga. Ao toe foi atu i gaoioiga o le Ekalesia, na ia feiloai ai ia Jackie, o se tagata faatoa liliu mai, i se konafesi a le autalavou nofofua matutua. “Na ia suia lou olaga,” o lana tala lea, “aua na ou iloana sa tatau ona avea au ma se faataitaiga sili atu.”
O manatu i matafaioi o itupa e eseese mamao lava mai i lea aganuu i lea aganuu, ae o le luitau o le mafuta faatasi o ni tagata faatoa faaipoipo e foliga mai e tutusa lava. Na aoaoina e Jason ma Jackie ni lesona taua ao la galulue faatasi.
Leslie Nilsson, tagata pueata
Jason:
Sa avea au o se tagata lotu i lou olaga atoa, ae ina ua maea lau misiona, na i ai ni nai tausaga se lua na ou le toaga ai. Na amata ona ou toe faatoagaina au lava i le lua tausaga talu ai. I le taimi lea, na ou feiloai ai i lou toalua, o Jackie, i se konafesi a le autalavou nofofua matutua i se masina talu ona papatiso o ia. Na ia suia lou olaga aua na ou lagonaina lou manaomia ona avea ma se faataitaiga sili atu.
Ina ua ma faaipoipo, na ou iloaina e oo lava i se tamai aiga e pei o lo ma aiga, o loo i ai le afe o mea e tatau ona fai. E le mafai ona e vaai faalemafaufau i le tele o mea! I le amataga, ou te lei fesoasoani moni lava. Na ou faia ni nai mea laiti, ae o Jackie na faia le tele o galuega. O ia o se tagata agaalofa ma le lotofoai. I se tasi aso na le fiafia ai o ia, ma sa ou faapea, “O le a le mea ua tupu?”
Na ou tuputupu ae ma le mafaufau o teine e tatau ona faia uma feau i le fale. Na vave lava ona ou iloaina e le o le mea moni lena. Sa pisi tele Jackie ma na vevesi tele i lana galuega. Ao ou vevesi foi au ia, na ou iloaina ua tatau ona ou amata ona faia se mea e sili atu e fesoasoani ai.
Na ou amata ona salu le fola ma fufulu ipu. Ona ou aoaoina lea o le ala e faaaoga ai le masini tamea. Ou te tuu ni faamatalaga i luga e fesoasoani ia te au ia manatua ai. E moni lava! E i ai sau faamanatu e faapipii e fesoasoani ia te au e iloa ai po o fea le pauta tamea e faaaoga. Ua avea nei mea ma au masani.
E ese le manaia talu ona ou amata faia galuega i le fale. Na sili atu le fiafia o Jackie.
Jackie:
O le avea ma se tagata faatoa faaipoipo o se suiga. O le mea moni lava, o le Atua e tulagaese lava le taua i totonu o lo ma sootaga. Ana le seanoa le Atua, semanu ua ma tetea!
Jason:
I le amataga o le ma faaipoipoga, na masani ona ou talanoa i le telefoni e faaaoga ai agafesootai po le siakiina o imeli. Na faigofie ona ou mau ai i le telefoni po o le komepiuta.
Na ma iloaina sa ma manaomia ona faaalu le tele o le taimi e faatasi ai. O le taimi la lenei ma te faia ai feau i le fale faatasi. E fesoasoani lenei mea ia i maua e faia ai feau uma, ma ua mafai ai ona ma faatasi le tasi ma le isi.
Jackie:
Ma te taumafai e faaavanoa sina taimi e faatasi ai i taeao, ae e mafai ona pisi tele taeao.
Ma te taumafai foi e faaavanoa le taimi i afiafi e talanoa ai e uiga i lo ma aso; ona ma tatalo lea ma faitau tusitusiga paia ae ma te lei momoe. O le ola ai i le talalelei ua faamanuiaina ai le ma faaipoipoga.