O Le Tioata Mamanu i le Nofoaga Autu mo Tagata Asiasi mai i Roma

Saunia e Chakell Wardleigh ma Heather Claridge

Mekasini a le Ekalesia

O le faamalama tioata mamanu i le Nofoaga Autu mo Tagata Asiasi mai i le Malumalu i Roma, Italia e le gata i le matagofie ae o se molimau mamana foi.

O le susulu matagofie o tioata mamanu e faamalamalamaina atu ai malumalu uma i le salafa o le lalolagi. E i ai se mea e uiga i mamanu teuteu ma ata i totonu o nei galuega maoa’e e mafai ona pa’i atu i loto ma fausia ai le molimau i se auala tulagaese.

E pei lava foi o le matagofie o faamalama lava ia o le tele o le taimi, galuega, ma le onosai lea na alu i le fatuina e oo ai i se mamanu faigofie. Talu ai e leai lava ni tioata se lua e tutusa, e tatau i tagata tusiata ona filifili ma le mafaufau loloto po o le a le tioata e galue ai. O tioata uma e tipi ma le faaeteete ma oloina i se foliga [siepi] patino. E valiina ata auiliili i luga o le tioata ma faamauina i se mea vevela. Ona tuuina lea ma le faaeteete o fasi tioata i le tulaga sa’o ma faagatusa ma se fasi uamea manifinifi. E tuufaatasia i latou e faaaoga ai se fasi uamea vaivai [solder] (o se uamea e faavaivaia i se mea e le vevela tele ma e vave ona malo). E masani lava ona faaaoga le sima e faamausali ai le tioata i totonu o le uamea ma ia le susu ai le tioata.

Faatasi ai ma lena faagasologa faigata e mafaufau i ai, vaai faalemafaufau atu i le galuega e faia i le fatuina o se tioata mamanu tele e faaalia ai le galuega faaletino a Keriso, aua o le mea tonu lava lea na faia e Tom ma Gayle Holdman o Provo, Iuta, ISA, ma se au tusiata, tagata mamanu, ma faataitaiga na ausia faavavega i le itiiti ifo ma le tausaga. O loo faaalia le tioata ua maea i totonu o le Nofoaga Autu mo Tagata Asiasi mai i le Malumalu o Roma Italia ma e matua ofoofogia lava.

Amataina o le Galuega Faatino

I le amataga, o fuafuaga mo le Nofoaga Autu mo Tagata Asiasi mai i le Malumalu a Roma na aofia ai le faaaliga o se ata i le puipui, peitai na faaleaogaina le manatu, lea na maua ai se avanoa mo le faamalama tioata mamanu ina ia tuu ai iina. Sa tusia se vaaiga mo le faamalama; ona aumai lea o ni tagata e faatinoa ata ua fai a latou teuga, e mafai ai e le au tusiata ona fatuina se ata mamanu mo le faamalama.

“Sa matou lagonaina le faagaeetia atili ina ia faaaoga se mamanu faapitoa,” o le tala lea a Uso Holdman. “Na matou faaiuina e faia se atatosi lavelave o le ata atoa ina ia mafai ai ona matou pueina lagona o tagata na faatinoina.” Ina ua maea ona tusia le atatosi mulimuli, sa mafai e Tom ona amata galue i le tioata.

Na faaalia e le faamalama le Faaola ma Ana Aposetolo i le taimi o Lana auaunaga i le lalolagi. O loo tuuina ma le fuafua lelei i le ogatotonu o le nofoaga autu mo tagata asiasi ina ia avea ma mea muamua e vaai i ai tagata asiasi ao latou savavali atu i totonu o le fale. Ma ao savavali atu tagata asiasi i le isi itu o le faamalama, e mafai ona latou vaai i faatusa o le maamora o le Christus ma uluai Aposetolo e Toasefululua.

O Faataoto i luga o Faataoto

O se tasi o le tele o mea matagofie o loo i ai i lenei faamalama tioata mamanu e faapea, e le na’o se tasi se vaaiga o faaalia mai mai le auaunaga a le Alii i le lalolagi. I mea e foliga mai o se vaaiga se tasi i le taimi muamua e vaai i ai, o loo i ai Iesu Keriso ma le Au Aposetolo e Toasefululua i totonugalemu o tagata ma faatusa ia e suitulaga i mea na tutupu ma tagata mai le auaunaga a le Alii i le lalolagi faapea foi ma faataoto na Ia aoao atu. Ua tulimatai atu ma le fiafia le au Holdman mo tagata asiasi e maimoaina le tioata ma saili ma faasino mai a latou tala e sili ona fiafia i ai e uiga ia Keriso.

O le ata o le fafine i tafatafa o le vaieli e matua taua lava. E sili atu tala o ia suitulaga ai nai lo le na o se fafine i le vaieli; o loo ia aapa atu i le Faaola e pei ona aapa atu le fafine lea na aafia i le punatoto, ma o maa i ona autafa o se faatusa o le fafine na tuuaia i le mulilua lea na aumaia e fetogia i maa.

“O le fafine i le vaieli o se tasi lea o vaega e sili ona ou fiafia i ai i lenei faamalama aua o loo ia avea ma sui o le tele o tamaitai eseese mai le Feagaiga Fou,” o le tala lea a Sister Holdman. “O nei tamaitai taitoatasi e eseese uma lava o latou manaoga i fafo, ae o le taunuuga lava na latou manaomia uma lava ina ia faamaloloina. O a latou tala ma le faatuatua o loo molimau moni mai lava ia te au, ma e faamoemoe o loo faapena foi mo le toatele o tagata asiasi, e uiga i le mana faamalolo o le Faaola.”

O Se Meafaigaluega Faasusulu a Faifeautalai

O se tasi o faamoemoega maualuga a le au Holdman ina ia avea lea o le latou tioata mamanu ma se meafaigaluega aoga faafaifeautalai i le nofoaga atu mo tagata asiasi mai. “O lenei ata atoa na mamanuina ina ia avea ma se molimau vaaia ia Keriso,” o le faamalamalama mai lea a Sister Holdman. O loo aofia i le faatufugaga ni faailoga ma elemene o le soifua mai o Keriso, Faasatauroga, Togiola, Toetu, ma le anoanoai o isi faatusa e uiga ia te Ia.

“Na matou faaaofia ai ni ata o loo i ai i isi lotu Kerisiano e pei o le satauro ma le pale tuitui, ia ono mafai ai ona aumaia se lagona o le iloa ma le masani ma faataga ai tagata sailiili ma faifeautalai e fausia [fegalegaleaiga] i luga o talitonuga masani,” o le tala lea a Uso Holdman. “O lenei faamalama atoa o loo faaali atu ai o mea e taua ia i latou e taua foi ia i tatou. Ua faaalia ai o Le Ekalesia a Iesu Keriso o le Au Paia o Aso e Gata Ai o se ekalesia Kerisiano. Ou te faamoemoe o le a fesoasoani lenei mea i tagata ia malamalama atoatoa ai i lena mea.”

O Le Ala na Mamanuina Ai

Ina ua uma ona galulue ma le le faavaivai e faamaea lenei galuega faavavega i le itiiti ifo ma le tausaga, sa faalotomaualaloina ma faafiafiaina Uso ma Sister Holdman i le vaaia o le ala na mamanuina ai lenei galuega faatufugaga matagofie. “O lenei ata faatufugaga e matuai faatagaina ai lava oe e vaai atu i le auala o fesootai ai tala uma o le auaunaga a Keriso ma e faatatau foi ia i tatou i aso nei,” o le tala lea a Sister Holdman. “E le o tele so tatou eseesega mai ia i latou o e na soifua i le vaitaimi o Keriso aua tatou te manaomia o Ia ma Ana aoaoga faapei ona latou foi manaomia.”

“Na matou faia ma mamanuina faapitoa lava lenei faatufugaga ina ia faasino atu laina uma o le tioata i le fatu o le Faaola i le ogatotonu o le faatufugaga,” o le faamalamalama mai lea a Uso Holdman. “Mai fale e oo atu i le toatele o tagata, o mea uma o i lenei ata e toe faasino atu ia te Ia.”