O Se Lesona Ave Taavale

Julio Meza Michel

Chihuahua, Mekisiko

Sa ou lagona le mafanafana ma le toafilemu ao ou aveave atu i le fale. Ae, tei lava, ua ou faalogo i le faaee faalausosoo mai o se pu o se taavale.

Sa ou aveave agai i le fale mai se fono a le autalavou-matutua i se aoauli matagofie o le Aso Sa. Sa ou lagona le mafanafana ma le toafilemu ao ou mafaufau i savali na ou faalogo i ai e faatatau i le atinaeina o lo tatou agavaa o ni fanau o le Atua. Sa ou fesili ia te au lava po o le a sau mea e mafai ona fai e atinae ai le malosi o loo ia te au.

O le auala i le fale na ou ui atu ai i se auala va iti, e lua itu le lautele. Sa umi se laina taavale mai i le isi itu, ae sa leai se isi i tua o au. Ae, tei lava, ua ou faalogo i le faaee faalausosoo mai o se pu o se taavale. O lea la ua i ai nei se ave taavale i ou tua. Sa ia faaemoemo mai moli tetele ma ee mai ia te au ou te alu ese mai le auala. Na foliga mai ia te au na ia manao e ave faatelevave atu.

Sa ou manatu e manaomia e lea tagata ona aoao le onosai ma le faaaloalo mo isi, o lea na ou alu lemu ai lea. Ao ma pasi atu i ni nai auala, sa ia faaauau pea ona faaee lana pu ma faaemoemo ana moli. Ona ia alu ese lea mai le auala ma tu. Sa ou vaai atu i le faaata e vaai i tali mai i le le mafai ai ona alu televave atu. Sa ou maua se lagona lelei e uiga i lou aoaoina o ia i se lesona.

Na vave lava, ona oso i fafo le ave taavale mai lana taavale, ma tatala le faitotoa o le pasese. Sa vave ona oso i fafo se fafine o lo o sii se pepe i ona lima. Sa ou tilotilo e vaai po o fea e o i ai. E le mamao atu, na ou vaai atu i mataitusi o loo mumu mai: “Potu o Gasegase Faafuasei o le Falemai.”

“O le a la’u mea ua fai?” Sa ou fesili ifo ai ia te au lava ia. Sa ou taunuu i le fale, faapau ifo i ou tulivae, ma loimata i ou mata, sa ou faatoga atu i le Atua e faamagalo au.

I lena aso na ou aoao ai o amioga a tagata o loo siomia i tatou e mafai ona uunaia e mea e le mafai i le tele o taimi ona tatou vaaia pe malamalama i ai. I nei aso, a ou vaai i se tasi o amio i se auala ou te faamasinoina e sese, ou te filifili e mafaufau ou te le malamalama tele i mea o lo o latou feagai ai. Ou te taumafai e faaali le alofa ma le agalelei na faapea mai Iesu Keriso ia i tatou ia faaalia atu i isi ma taulai atu ina ia malamalama ma fesoasoani atu ia i latou o loo siomia au.

E mafai faapefea ona ou atinaeina lou malosi o se atalii o le Atua? E mafai ona ou tali atu i amioga a isi i le alofa ma le malamalama. O le faia o lea mea ua faatagaina ai au e lagonaina atili le alofa o le Faaola i lou lava olaga ma faatagaina isi e lagonaina lou alofa mo i latou.