Talofa mai Italia!

O a’u o Margo. Ma o a’u o Paolo. O loo ma malaga faataamilo i le lalolagi e aoao e uiga i fanau a le Atua. Auai faatasi ma ma’ua a o ma asiasi atu i Italia!

O Italia e i le itu i saute o Europa. I luga o se faafanua, e tai foliga e pei lava o se seevae soloatoa[boot]! E silia ma le onosefulu miliona tagata e nonofo ai.

E te iloa fai atu “O au o se atalii o le Atua” faaItalia? Sono un figlio di Dio. O loo faitau faaItalia e lenei teine le Tusi a Mamona.

O le tele o tamaiti i Italia e o mai i le fale mai le aoga e aai ma o latou aiga i taimi o le pausa pranzo—malologa o le aoauli. E ono ai a latou makaloni po o le araisa ma meaai aano ma fualaau faisua.

Ao lei oo i le aiga o le afiafi, o le tele o aiga Italia e fiafia e o e savalivali i le afiafi, po o le passeggiata. E fai o latou ofu mananaia ma savavali faatasi e taamilo i mea o loo i ai faleoloa. Latou te ono malolo foi mo sina gelato—aisakulimi faaItalia. Mmmm!

O le tele o tagata Italia e auai i le ekalesia Katoliko. E ui o le tele o a latou talitonuga e ese mai ia i tatou, latou te talitonu i le Tama Faalelagi, Iesu Keriso, ma le Agaga Paia.

I le masina lenei, o le a tatalaina ai se malumalu i Roma! Sa faasilasila mai i le konafesi aoao o Oketopa 2008. O le a avea lea ma uluai malumalu a Italia.

“Ou te iloa o loo soifua Iesu ma na te taitaiina perofeta. E taua tele le o i le lotu aua e mafai ai ona tatou aoao atili e uiga ia Iesu. Ua amata ona ou faitauina le Tusi a Mamona i aso uma ona ou te fia iloa le tele o mea e uiga i le talalelei.”

Lorenzo B., 7 tausaga, Piedmont, Italia

“Pe a ou latalata i le malumalu, ou te mafaufau ia Iesu ma e oso lou fiafia. Ua iu lava ina matou le toe tietie mo le 12 itula e o i le malumalu. O lea la ua mafai ona ou oo i le malumalu i le nao le 50 minute! Pe a 12 ou tausaga, o le a mafai ona ou alu ma faia papatisoga i totonu o le malumalu.”

Olivia G., 8 tausaga, Lazio, Italia

Faafetai mo le faataamilo i Italia faatasi ma i ma’ua. Feiloai i se isi taimi! Ciao!