Mana o le Tatalo
O ai e mafai ona e tatalo mo i latou i le aso lenei?
“Tatalo le Tasi mo le Tasi” (Iakopo 5:16).
Na valaau mai Tama i tagata uma e o mai i le komepiuta. Na faapau e Lusi le kilafi meataalo na ia taalo ai ae faavave mai. O le a le mea o loo tupu? Pe ua oo i le taimi e valaau ai Tinamatua i le upega tafailagi?
Na tusi atu Tama i le lau o le komepiuta. “Na ou fia faaali atu ia te outou se vaega o se lauga mai le konafesi aoao.”
Sa faapuiti mata o Lusi. E le o Tinamatua. O Peresitene Eyring! O ia e i le Au Peresitene Sili.
Na oomi e Tama le amata. Na aoao mai Peresitene Eyring e uiga i le lagolagoina o ou taitai i le Ekalesia. Na ia faamatalaina le ala e manaomia ai e taitai o le Ekalesia i tatou ia tatalo mo i latou.
“O le mafuaaga lena tatou te tatalo ai mo le perofeta, e sao a Tama?” na fesili atu ai lona tuagane laitiiti, o Tavita. Na lue uma atu ulu o Tama ma Tina.
“Ioe, tatou te faia,” na fai atu ai Tama. “Ae ou te mafaufau foi e uiga i la tatou au peresitene o le paranesi. Ou te manatu e manaomia foi e Peresitene Alvarez ma ona fesoasoani a tatou tatalo.”
E alofa Lusi ia Peresitene Alvarez ma ona fesoasoani. E agalelei i latou ia te ia i taimi uma lava. Na manao o ia e fesoasoani ia i latou!
“O le a ou tatalo mo i latou,” na fai atu ai Lusi. “Ma e mafai foi ona tatou tatalo mo i latou i a tatou tatalo faaleaiga!”
“Ou te iloa o se manatu sili lena,” sa fai atu ai Tina. “Sei tatou faia loa.”
Mo isi aso na sosoo ai, na taumafai ai Lusi ma le malosi e manatua e tatalo mo le au peresitene o le paranesi i soo se taimi e fai ai sana tatalo. E na o ni nai sekone faaopoopo lava i taimi taitasi. Faigofie!
O le aso Sa na sosoo ai i le sauniga faamanatuga, na tulai ai i luga Peresitene Alvarez ina ua uma le pese. Ona ia fai mai lea o se tala na faateia tele ai Lusi.
“I le avea ai ma se au peresitene o le paranesi, matou te fia faafetai ia te outou mo le tatalo mo i matou,” na ia fai mai ai. “Ua matou lagonaina le malosi moni lava mai na tatalo. Matou te manaomia moni lava lo outou faatuatua ma tatalo e fai ai o matou valaauga. Faafetai lava!”
Sa ataata fiafia Lusi. Na ia autilo atu ia Tavita. Sa ataata foi o ia. Sa le talitonu o ia! Sa fiafia tele o ia ma na le mafai ai ona nofo filemu. Sa ia faalagolago atu ma toso mai le lima o le ofu o Tina.
“Tina,” o lana musumusu atu lea. “Na e lagona atu le tala a Peresitene Alvarez?!” Sa ia manao e osooso i luga ma lalo. “E aoga! E aoga moni lava a tatou tatalo!”
Ina ua tuua le lotu, na savavali faatasi Lusi ma lona aiga i le fale.
“E faalogo moni mai lava le Atua ia tatou tatalo,” na fai atu ai Tina. “Ma pe le ofoofogia ea le vaai i le ala e mamana ai mo se vaega o tagata le tatalo mo se isi tagata?”
Sa lagona e Lusi le mafanafana ma le fiafia o lona loto. Na la musamusa atu ma Tavita i lalo o le ala savali ao savavali atu Tina ma Tama i o la tua. Sa ia iloa na faafofogaina e le Tama Faalelagi tatalo a lona aiga. Sa latou faia moni lava se eseesega. I le na o le tatalo lava!
I lena po, na sauni Lusi e fai ana tatalo. Sa ia mafaufau e uiga i lana faiaoga o le Peraimeri ma isi taitai o le Ekalesia e mafai ona latou faaaogaina nisi faamanuiaga faaopoopo. Atonu o le a tatalo foi o ia mo i latou! Sa piilima ona lima ma punou lona ulu. Na ia iloa lelei lava le tala e fai atu. ●