Faataitaiga LOTOTOA
Feiloai ia Dr. Mattie
Na fiafia Martha (Mattie) Hughes e sefulu-ono-tausaga ina ua ia faalogo i le faaaliga a le perofeta. Na ia iloaina o nisi o aoga fomai na iu lava ina latou faatagaina tamaitai ia avea ma fomai. O le avea ma se fomai sa fai ma ana miti.
E moni lava, ae lei alu o ia i le aoga fomai, sa tatau ona teuina e Mattie le tele o tupe. Ma ia maua se tikeri mai le kolisi. O le a tele se taimi e alu ai. Ma o se galuega o le a faigata tele. Sa ia iloaina lena mea.
Ae na mafaufau Mattie i lona uso laitiiti, o Annie, lea na maliu i luga o le taavale solofanua i Iuta. Sa leai se fomai e fesoasoani ina ua mai o ia. Ona maliu lea o le tama o Mattie. O iinei i le Aai o Sate Leki, na iloa e Mattie le tele o tagata o e na mamai pe manunua. Afai e avea Mattie ma fomai, o le a mafai ona ia fesoasoani ia i latou.
Na filifili Mattie ia maua le faatuatua. Na fai mai le perofeta o tamaitai e tatau ona aoao ia avea ma fomai, ma na manao o ia ia avea ma se fomai. O le a fesoasoani le Atua ia te ia ia maua se ala e alu ai i le aoga fomai.
Na galue malosi Mattie e teu se tupe. Sa maua sana galuega o se faatulaga mataitusi mo se nusipepa. Sa tatau ona ia faatulaga lelei mataitusi taitasi o upu uma i le faasologa sao ina ia mafai ona lolomi le nusipepa. A manava le galuega, e alu Mattie i vasega i le iunivesite ia saunia ai mo le aoga fomai.
I le va o le fale, galuega, ma le aoga, na savali Mattie mo le ono maila (10 km) i aso uma! Na ia faia ni seevae uumi tamaloa aua o ona seevae masani e le lava le malosi e tauasa ai i le lopala. Sa ia moomoo ia mafai ona ia tietie i le taavale e toso-e le miula nai lo le savali, ae na ia sefeina pene uma mo le aoga.
Na popole Mattie nei le mafai ona ia sefeina ia lava ni tupe. Na ia iloaina o lona tina ma lona tamāfai o le a taumafai e fesoasoani ia te ia, ae na i ai isi tamaiti e tausia. O le a se isi mea e mafai ona ia faia?
Na filifili Mattie e fai se suegatupe ma fesili atu i uo ma tagata o le uarota e faasoa mai soo se tupe e mafai ona latou faasaoina. Sa latou fiafia e fesoasoani. O Mattie sa na o le tamaitai lona tolu e mulimuli i le valaau a Peresitene Iaga, ma na latou mananao ia te ia ia faamanuiaina ma avea ma se fomai.
Ina ua uma suegatupe, na lava tupe a Mattie e alu ai i le aoga fomai! Na ia malaga i le isi itu o le atunuu i se iunivesite ma suesue malosi.
E lua tausaga mulimuli ane, na uu e Mattie lona ulu i luga ma savali sasao atu i luga o le tulaga o le faauuga ina ia taliaina lona faailoga. Ua iu lava ina avea o ia ma fomai! Na te le’i lagonaina muamua se fiafia tele.
Na tilotilo atu Mattie i le potopotoga o tagata ese o loo feei mai ma le fiafia. Na leai se isi o lona aiga po o uo mai le fale na mafai ona i ai iina, ae na ia iloaina na mitamita i latou ia te ia. O le a vave lava ona ia toe foi atu i le fale e tausia i latou ma aoao i latou i mea na ia aoaoina.
Ina ua toe foi atu i Iuta, na galue Mattie i le falemai a le Aualofa i le Aai o Sate Leki. Na fiafia o ia i le latalata atu i Mauga o le Vavau! Sa fiafia o ia i lana galuega o se fomai. Na ia fiafia e togafiti faamai, faamalolo manua, ma e oo lava i le aoao atu o vasega i le ala e faafanau ai pepe.
O le avea ma se fomai sa o se galuega faigata. Ae na alofa le Tama Faalelagi ia te ia ma na fesoasoani ia te ia. O lenei o le a faaalu e Mattie le vaega o totoe o lona olaga e fesoasoani ai i isi. ●