“E moni, E moni”
E alala le tusitala i le Ripapelika Faatemokalasi o le Congo.
Ina ua ou tatalo mo se molimau o le Tusi a Mamona, sa leai se mea na tupu—seia iu ina amata ona ou faitauina le Tusi Paia.
Ina ua ou pe a ma le 12 tausaga, sa ou manao ia iloa e a’u lava ia e moni le Tusi a Mamona. I se tautalaga, e mafai ona ou molimau atu ai o le Tusi a Mamona o le afioga a le Atua ona sa fai mai ai lau faiaoga o le Peraimeri. Ae o totonu o au lava ia, sa ou le malamalama i le uiga o lena mea.
Sa ou iloaina le folafolaga a Moronae lea e faapea mai afai ou te faitau, mafaufau loloto, ma tatalo, e mafai foi ona ou iloa (tagai Moronae 10:3–4). Sa ou faitau mo ni vaiaso ma lagona le filemu, ae sa lei tupu mai ai se mea maoae—leai se susulu, leai ni agelu, leai se leo. I le iuga, sa ou tuua le faitauina o le Tusi a Mamona.
I se tasi aso ao suesue i le Esoto, na ou faitau ai ao tau leai ni meaai a Isaraelu, na auina atu e le Atua le manai ia te i latou. O tagata taitoatasi sa ave se aofai faatulagaina i aso taitasi. Na Ia auina atu ia i latou ni meaai, ae sa faitalia i latou ma fuafua le faaputuina.
Na oo mai ia te au upu a Nifae: “E le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina le mea ua ia poloaiina ai i latou” (1 Nifae 3:7). Mai lea mea na ou malamalama ai na poloaiina e le Atua Isaraelu e tuua Aikupito ma fuafua e tausia lo latou fia aai. O lenei mau o le Tusi a Mamona na faalauteleina ai lou malamalama o le Tusi Paia, ma sa ou faapea ai loa o le Tusi a Mamona o le afioga a le Atua.
E pei ona faamatalaina e Elder David A. Bednar o le Korama a Aposetolo e Toasefululua, o faaaliga faaletagata lava ia e sili atu ona pei o le oso lemu ae o le la nai lo le malamalama e faafuasei ona maua pea ki se moli.1 Sa amata ona ou vaai i le Tusi a Mamona i se itu e ese.
I masina na mulimuli ane ai, sa ou iloa moni lava nai lo o se isi lava taimi o le Tusi a Mamona o le afioga a le Atua. O le uunaiga na oo mai pea lava pea ia te au e ala i le leo o le Agaga, o le “E moni, e moni, e moni.”
Ou te faitau pea i le Tusi a Mamona toeitiiti a o aso uma, ma taimi uma, ma o taimi uma ou te faalogo ai i upu nei: “E moni.” ◼