O Taeao, Ou Te Alu Ai i le Lotu
Harmin Toledo Gonzalez
Chiloé, Chile
Ata na tusia e Christiane Beauregard
E lua tausaga talu ona ma papatiso ma lou toalua, o Madeleinne, ma faamauina, na ou le toe toaga ma le toe alu i le lotu. O taeao o Aso Sa uma lava, na te faamalosia ai lava au ia nofo i luga ma ma o faatasi i le lotu, ae ou te fai atu lava leai.
“Ua ou le lava. Tuu mai au e moe,” ou te tali atu ai. Mulimuli ane, ou te alu o’u taalo soka.
E nofo i luga Madeleinne lava ia ma agai atu i le falelotu ma le ma tama tama, o Luka. Pe i le timu pe malulu, e alu pea lava o ia.
O le toe tepa i tua, na ou iloa ai na osofaia au e Satani. Na ia uunaia au faapea o loo lelei lava au e aunoa ma le Ekalesia. Na ia tau mai ia te au, “O loo lelei lava oe, o loo e filemu, o loo e lagolelei.” Ae o le mea moni lava, na leai ni ou faamanuiaga, alualu i luma, ma le fiafia. E faafetai lava, ona sa fesoasoani mai lou toalua ma lou Tama Faalelagi ia te au ia vaai manino i mea.
I se tasi po o le aso Faraile pe o se tausaga talu ona ou le toe alu i le lotu, na fai ai sau miti. Na ou miti sa ou i ai i se nuutua matagofie lava, ma sa savavali ma uulima faatasi ma lou toalua ma lou atalii. Sa matou matuai fiafia lava.
Ae tei lava ua amata ona pogisa. Sa matuai pogisa lava ma na le mafai ona ou vaai i se mea. Na faafuasei lava, ona ou iloaina sa ou le toe uuina lima o lou toalua ma le atalii. Na ou valaau i o la igoa, ma faamoemoe o le a la toe foi mai. Na ou manao ia toe foi mai i laua, ma na ou manao ia mou ese atu le pogisa.
I lena taimi, na ou oo ai i le mea moni lava e taua o le faavauvau. Ua leiloa mai ia te au Madeleinne ma Luka. Ua la agai atu i luma e aunoa ma au, ma tuua ai na o au, ua siomia i le pogisa.
Ina ua ou alu ae i le taeao na sosoo ai, na ou iloaina na tuuina mai ia te au e lou Tama oi le Lagi se faailoga. Afai ou te toe foi i le lotu ma ave lou toalua ma lou atalii i le malumalu e faamau faatasi ai, o le a ou le maua i laua. O le a ou le maua i laua i le ologa a sau. O le a ou i ai i se tulaga ua leiloa, ma faavauvau.
“O taeao,” na ou tau atu ai ia Madeleinne, “o le a ou alu ai i le lotu.”
O taeao o aso Sa uma lava talu mai lena taimi, ou te alu ai i le lotu faatasi ma lo’u aiga. Ou te lei toe misia lava se sauniga se tasi talu mai lena miti i le lima tausaga talu ai. Na iu lava ina faamauina i matou i le malumalu ia Setema 2016.
Ou te faafetai mo ou faamanuiaga uma lava. Ou te faafetai faapitoa lava mo lou aiga ma mo le lototoa, malosi, ma le faataitaiga a lou toalua. Ou te faafetai e lei fiu lava o ia ma lou Tama Faalelagi ia te au. Ua avea nei au ma tagata ua i ai nei e faafetai ai ia i laua.