Mafuaaga e 5 e Tatau Ai ona Auai Tagata Nofofua i Faamauga o le Malumalu

Alex Hugie

Mekasini a le Ekalesia

E mafai ona tatou manuia mai le auai i faamauga e tusa lava pe tatou te nofofua!

Pe a uunaia i tatou e perofeta e faia sauniga o le malumalu mo o tatou tuaa, e aofia i lenei mea sauniga uma e manaomia mo le faaolataga. Ae ui i lea, o nisi talavou nofofua matutua e ono aloese mai faamauga, ma manatu e talafeagai mo i latou ua faaipoipo. Ae e le moni! E i ai faamanuiaga tulaga ese mai le sauniga o faamauga lea e mafai ona fesoasoani ia i tatou i le taimi nei pe afai tatou te auai.

E toatele le au matutua nofofua latou te manatu o le faia o faamauga fai ma sui e aunoa ma se toalua o le a le mautonu. Ae pei o le tele o sauniga, e faalagolago lo tatou aafiaga i la tatou sauniuniga. Afai tatou te manatu i se sauniga o faamauga o se avanoa e aoao ai, fesoasoani e togiola tagata ua maliliu, ma lagona le Agaga, ona le mafai lea ona taofia i tatou ona o tulaga faale-faaipoipoga.

O mafuaaga nei e lima e mafai ai ona fiafia i tatou o tagata nofofua i le faiga o faamauga.

O le a tatou malamalama ma talisapaia le taua o le sauniga faamau.

Atonu tatou te le o faaipoipo, ae e le faapea tatou te le o sauni ia faamanuiaina e ala i se malamalamaaga sili atu o le feagaiga e faavavau o le faaipoipoga. O le mea moni, o le mamanu o le talalelei mo a tatou feagaiga uma o le aoao lea e uiga ia i latou ae tatou te lei faia. E leai se isi mea i totonu o le malumalu e mafai ona tatou faalogoina ai upu mamana o le sauniga o faamauga, lea e tumu i aoaoga loloto ma folafolaga faaselesitila. E mafai ona tatou aoao tele e uiga “i le feagaiga fou ma le tumau-faavavau” (Mataupu Faavae ma Feagaiga 132:19) mai tusitusiga paia, taitai o le Ekalesia, ma isi tusi a le Ekalesia. Ae afai tatou te maua le avanoa, o le auai moni i faamauga mo o tatou augatuaa e mafai ona fesoasoani ia i tatou e amata ona aoao ai i le atoatoa o aafiaga o le sauniga mo o tatou lumanai.
O le fai ma sui i faamauga o le a fesoasoani ia i tatou ina ia avea ma ni taitoalua sili ona lelei.

Pe o a tatou lava faamauga o loo i ai i se taimi lata mai pe mamao, o le a sili atu ona tatou saunia mo se faaipoipoga e faavavau e ala i le faateleina o lo tatou malamalama e uiga i lenei sauniga palealii. O se tasi o auala sili mo i tatou e masani ai i na feagaiga o le a tatou faia “mo le taimi nei ma mo le faavavau atoa” (Mataupu Faavae ma Feagaiga 132:7) o le molimauina lea o le faia i totonu o le malumalu. E mafai ona tatou faalogo i folafolaga o le a tatou faia i o tatou taitoalua ma le Alii ina ia mafai ona tatou iloa mea ua faamoemoeina mai ia i tatou ma ia saunia ai ia ausia na faamoemoega. Afai tatou te faamaoni, o le a le mafai ona faafitia soo se faamanuiaga folafolaina o le talalelei. O le faalogo i faamanuiaga o le sauniga o faamauga ao tatou nofofua, e mafai ona aumaia ia i tatou se mea matagofie e tulimatai atu i ai, i soo se taimi e oo mai ai lena taimi.
O loo faatalitali mai o tatou tuua mo i tatou ina ia faia faamauga mo i latou!

O galuega faalemalumalu e sili atu ona lelei pe a fai faatasi ma talafaasolopito o aiga. Sa ou iloaina lenei lava mea ina ua ou aumaia se igoa faaleaiga, o le ua uma ona ou mauaina isi sauniga uma, ina ia faamauina i ona matua. Sa ou maua se uunaiga malosi faaleagaga o loo mataituina e o’u tuaa ma ua ia taliaina le galuega na ou faia mo ia. Semanu e le tutusa lenei lagona pe ana faapea ou te le’i faaumaina le faamauga.
E aumaia e faamauga ni avanoa tulaga ese e aoao ai.

O sauniga taitasi o le malumalu e tumu i faatusa. Ua aoao mai i tatou e faamauga o le malumalu e uiga i upumoni lea e le o faamamafa mai i isi sauniga e ala i faatusa e pei o le fata faitaulaga ma faaata lea o loo suitulaga o le faavavau. E mafai ona tatou faalogo i upu paia o le feagaiga o le faamauga. I nisi taimi, e mafai foi e le tagata fai faamauga ona ofoina atu ni manatu musuia i luga o le taua ma le uiga i tua atu o le sauniga.
O faamauga e tuuina ai o tatou olaga i se vaaiga manino.

O le auai i faamauga fai ma sui o le a le suia ai o tatou tulaga faaipoipo, ae o le a aumaia ai ia i tatou se manatu manino o mea o loo faatalitali mai mo i tatou. O le fesoasoani i o tatou augatuaa e osia lenei feagaiga o le a fesoasoani ia i tatou e fausia a tatou lava auala e faia ai lea mea. Afai tatou te vaai i faamanuiaga o le faavavau e pei lava o ni sini maualuluga ma sini matua mamao lava, ua tatou faafesuiaʻia i tatou lava mai le avanoa e amata ai ona aafia ai i le taimi nei. O le talalelei e faatatau lava i le saunia ma le faamamaluina o feagaiga, ma o se auala mamana e faia ai lenei mea o le ola agavaa lea ma faia sauniga taua o le malumalu--o sauniga uma.