Autalavou

Ou te Fiafia i Talafaasolopito o Aiga! Ou te lei fiafia i taimi uma i galuega o talafaasolopito o aiga. O lena mea na suia ina ua papatisoina au mo se tasi o ou tuaa i le Malumalu o Chile Santiago.

Sa avea au o se tiakono i le taimi muamua na ou alu ai i le malumalu. Ina ua ou sauni e ulu atu i le vai papatisoga, na ou lagona le i ai o se tagata ua ulu mai i le potu. Sa ou ea ae ma vaaia ai se toeaina o ofuina ni ofu tuai. Sa ou lagonaina lona alofa ma le faafetai mo au aua o loo ou faia lona galuega sui. Ina ua uma ona ou papatiso mo ia ma sau i luga mai le vai, na ou autilo solo mo ia, ae ua le o i ai o ia iina.

Na masani ona ou mafaufau o le malumalu e saunia igoa mo galuega o le malumalu, o lea na ou le fiafia ai i le faia o sailiga o talafaasolopito o aiga. Ae o lenei aafiaga na faaoso ai lou fiafia e uiga i le sailia mo ou lava igoa o le aiga.

I se tasi aso na ou alu ai i lau komepiuta ma vaai ai na ou mauaina se imeli mai le Ekalesia faatasi ma se igoa o le aiga. Na ou lagonaina sa ou manaomia le toe sailia o isi igoa, o lea na ou fesili ai i lou tina pe faapefea ona saili lelei mo igoa ma ao mai nisi faamatalaga e uiga i ou tuaa.

O le taimi nei, ua ou maua ni igoa e 11 o le aiga, ma ou te iloa e mafai ona ou maua nisi igoa e sili atu. O nei tagata e lei maua le avanoa e papatiso ai ao i ai i le lalolagi, ma na latou faatalitali mo se taimi umi mo o latou galuega faalemalumalu ia faia. Ou te fiafia e mafai ona ou fesoasoani ia i latou e ala i galuega o le malumalu ma talafaasolopito o aiga.

Lucas,16 tausaga, Santiago, Chile