O Le A Ou Toe Vaai Ia Te Ia

Saunia e Reyna I. Aburto

Fesoasoani Lua i le Au Peresitene Aoao o le Aualofa

Na ou ola ae i Nicaragua. A o o’u laitiiti, na ou faia mea uma faatasi ma lo’u tuagane matua. Na ma savavali faatasi i le aoga. Na ma o faatasi i le faleoloa. Sa ma faia ni ituaiga mea uiga eseese i tua o le matou fale. Sa ma fiafia.

Ma, ina ua iva ou tausaga, na tupu se mea faanoanoa tele. Na maliu lo’u tuagane i se mafui’e. I le taimi muamua sa le’i lagonaina moni ua alu ese o ia. Sa masani ona ou vaai faalemafaufau o le a ia tuitui i lo matou faitotoa i luma. O le a ia taʻu mai ia i matou sa na ona alu ese lava o ia i se mea. Sa masani ona ou sioa i le faitotoa, ma moomoo ia tupu lena mea. Sa ou matuai manao lava e toe vaai ia te ia.

I le aluga o taimi, sa amata ona tau faigofie. Na ou misia pea lo’u tuagane, ae na mafai ona ou toe lagonaina le fiafia.

I lena taimi, e le o au o se tagata O Le Ekalesia a Iesu Keriso o le Au Paia o Aso e Gata Ai. Ae ina ua ou matua, sa ou aoao e uiga i le Ekalesia ma papatiso. I se tasi aso sa ou fufuluina aʻu ipu. O le taimi o le Eseta. Sa ou mafaufau i le Toetu ma mafaufau i lo’u tuagane.

Na faafuasei ona oo mai se lagona ia te au. Na ou manatuaina le miti i aso uma na ou faia e uiga i loʻu tuagane. Na ou iloaina e le o se mea valea moni lava! Na oo mai le Agaga Paia, e faamafanafana aʻu ma taitai au. O le a i ai se aso o le a toetu ai loʻu tuagane. Ma o le a ou toe vaai moni lava ia te ia.

Afai ua maliu se tasi e te alofa i ai, e le afaina le misia o i latou ma lagona le faanoanoa. Talanoa i lou aiga poʻo se tagata matua pe a e lagona ua e sauni. Tatalo i le Tama Faalelagi e uiga i ou lagona. E mafai ona Ia fesoasoani ia te oe e toe lagonaina le filemu.

Po o le a lava, manatua e alofa Iesu Keriso ia te oe. I le Eseta tatou te manatua ai Lana taulaga mo i tatou. Ona o Ia, o le a tatou toetutu ai ma mafai ai ona tatou toe nonofo e faavavau ma o tatou aiga. ●

Kata Faamafanafana

Oti ese nei kata. E mafai ona e gaulua i le afa pe faaaoga o se faailoga tusi. Teu i totonu o au tusitusiga paia po o se isi mea e te vaai i ai pe a e lagona le faanoanoa, tuua toatasi, po o le fefe.

“Ou te le tuulafoaiina outou: ou te sau ia te outou.”

Ioane 14:18

“E soloiesea foi e le Atua loimata uma i o latou mata.”

Faaaliga 21:4

“Ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou.”

Mataupu Faavae ma Feagaiga 68:6