O Le MeaalofaSili a Le Atua

Saunia e Peresitene Russell M. Nelson

Mai le “Ia Faafetaia le Atua,” Liahona, Me 2012, 77–80.

I se tasi aso na ma vaaia ma Sister Nelson ni iʻa o le moana i se koneteina tioata mo i’a. O i’a felanulanua’i i lanu sesega ma foliga eseese sa femasaua’i solo. Sa ou fesili atu i se tagata faigaluega sa latalata mai, “O ai e fafagaina nei i’a matagofie?”

Sa tali mai o ia, “O a’u.”

Ona ou fesili atu lea, “Pe ua latou faafetai atu ea ia te oe?”

Sa ia tali mai, “E lei oo i le taimi!”

O nisi tagata e pei o na i’a. Latou te le manatunatu i le Atua ma Lona agalelei ia i latou. E matuai sili atu le lelei o le a i ai pe afai e mafai ona manatunatu atili ia tagata uma i le alofa o le Atua ma faailoa atu lena agaga faafetai ia te Ia.

Loto faafetai mo Iesu Keriso

Na auina mai e le Atua Lona Alo, o Iesu Keriso, e fesoasoani ia i tatou. Na ia faia lena mea ona e alofa tele o Ia ia i tatou.

Na afio mai Iesu e togiola i tatou.

Ona o Lana Togiola, ua mafai ai ona tatou toetutu pe a mavae le oti.

Ona o Lana Togiola, ua mafai ai ona tatou toe foi atu e nonofo faatasi ma lo tatou Tama Faalelagi e faavavau.

Sa faamalamalama mai e Iesu:

“O au nei o le toe tu, ma le ola: o le faatuatua mai ia te au, e ui lava ina oti, a e ola lava ia: O tagata ola uma o e faatuatua mai ia te au e le oti lava” (Ioane 11:25–26).

O le savali matagofie lenei o le Eseta! ●

O Iesu O Lo’u Faaola

Na toetu mai Iesu i le taeao o le Eseta. Faitau ia fuaiupu e saili ai mea na Ia faia mo i tatou. Valivali se ave o le la pe a uma ona e faitauina fuaiupu taʻitasi. Ona valivali atoa lea o le ata.

Na mafatia Iesu i Ketesemane ma luga o le satauro e laveai i tatou mai a tatou agasala.
Na maliu Iesu ma toetu mai e laveai i tatou mai le oti.
Na tuuina mai e Iesu ia i tatou le faamanatuga e fesoasoani tatou te manatua ai o Ia.
Na aoao i tatou e Iesu e faamagalo atu i isi.
Na faaali mai e Iesu ia i tatou pe faapefea ona agalelei.
Ona o Iesu, o le a tatou toetutu uma ai pe a mavae le oti.