O Le Filifiliga: Ia Avea ma se Tusiata Sili po o se Tina Sili?

Saunia e Jenedy Paige

Na tau mai e tagata uma ia te au e le mafai lava ona faia uma mea e lua. Ae pe moni ea?

Ou te manatuaina le lagona o le le mautonu ao ou aoga i le kolisi e uiga i olaga o tusiata maoae. Na foliga mai o tusiata na maoae moni lava ma lauiloa na avea ma ni tusiata sili ona sa tuua o latou aiga ma ositaulaga lo latou mafaufau lelei. O tusiata sili na vali ata i le taeao o le Kerisimasi ao talai e a latou fanau iti meaalofa. O le tasi na faaipoipo faaono. O le isi na tipi ese lona taliga ma auina atu i e pele ia te ia. Ma o le isi na oo lava ina fasiotia se tasi! Na amata ona ou mafaufau pe o le avea ma se tusiata sili ao avea foi ma se ava ma se tina (e faia uma ao faatumauina lou mafaufau lelei!) pe mata e mafaia.

Na aoao mai au polofesa afai matou te mananao moni lava ia avea ma e sili, e tatau ona matou faia ni osigataulaga. E tatau ona matou galulue malosi e sili atu i lo se isi lava. E ao ona matou faamuamua le tusiata i o matou olaga. E masani ona fesili lou mafaufau, “Ae afai e tausia e se tusiata poloaiga, faamuamua mea e tatau ona faamuamua, ma maua le Agaga o le Alii e taitaia a latou galuega, pe le mafai ea ona avea i latou o ni tusiata sili po o le silisili atu foi?” O lenei fesili na i ai pea ia te au i lau aoga atoa lava.

E oo atu i le taimi na ma faauu ai ma lou toalua, sa ma faaipoipo mo le tausaga. Na susu mai Peresitene Russell M. Nelson, (o le taimi lea, o ia o se sui o le Korama a Aposetolo e Toasefululua) e lauga i le matou faauuga. Na sosoo ai ma se taumafataga o le aoauli, ma na o le 16 tamaiti aoga na valaaulia e auai. O le mea na ofo ai, na filifilia uma maua ma lou toalua iina. Ina ua tatala mai le talanoaga mo fesili ma tali. Na ou sii i luga lou lima, ma pupula sao atu lava i fofoga o Elder Nelson, ma faaleo atu ou popolega e uiga i le avea ma se tusiata ma se tina. Sa ou galue malosi lava e fausia au taleni i le aoga, ma na ou manao e faaauau pea ona galue malosi ma faaleleia atili, ae na ou iloaina foi o le tulaga faatina e tatau ona faamuamua. Na iai se auala e faia uma ai mea e lua? Na susulu fofoga o Elder Nelson ao tali mai, “E mafai tele lava!” Na ia uunaia au e faaleleia au taleni ma tatalo i le Tama Faalelagi mo le fesoasoani i le iloaina pe faapefea ona faia uma na mea faatasi ma Ia, o le a mafai ai ona ou faia mea na ou manatu muamua e le mafaia. Na ou taliaina lena fautuaga ma le loto atoa.

Tuuto Atu i Ana Faamoemoega

Ua toafa nei le ma fanau ma lou toalua. Ua ma aoaoina le ala e taulima ai le tulaga faamatua. I le amataga, na amata le tele o ou aso i le 4:00 i le vaveao ina ia vali ata ae lei feala lau fanau. Na ou taumafai e vali ata mo aso e ono i se vaiaso, e tusa lava pe o nisi aso mo na o le 30 minute. Sa ou amata au galuega vali uma i se tatalo, i le iloaina o au ose tagata noa lava e aunoa ma le fesoasoani a le Alii. Na ou tatalo e le gata ina ia ou mafaia lau tusiata ae ia ou iloaina foi le mea e sili ona taua i lena aso ma tautino atu e faamuamua lava Ona faamoemoega. E lei vave le alualu i luma, ae na faatumauina.

I le 12 tausaga mai le aso o lou faauuga. Sa ou maua sina taimi o le lotovaivai. Sa foliga mai na matua faigata tele le olaga. Na avea le tulaga faatina ua sili atu le faigata nai lo ou manatu. Na ou saofai i lau laupapa valiata ma tagi, ma mafaufau pe o le a mafai ea ona avea moni lava au ma se tusiata sili na ou moemiti i ai. Na uunaia au e to mai au apitalaaga tuai mai le fata, ma na ou sue i lau tusiga i le aso 30 o Aperila, 2006, le aso ina ua uma lou faauuga. Na galo nimo ia au lou aafiaga maoae ma Peresitene Nelson! O le vevesi o le olaga i se itu na toeitiiti lava galo ai mai lou mafaufau. Na i ai iina i ou luma upu mai le perofeta soifua, “E mafai tele lava!” Na suia loimata i loimata o le fiafia ao ou toe tepa i tua i mea uma na mafai ona ou faataunuuina i lena taimi, ma na ou tulimatai atu foi i luma ma le faamoemoe.

O Le Faia o Mea e le Mafaia

I ni nai masina mulimuli ane, na ou maua ai se valaau mai se tasi o tusiata o le mekasini o le Ensign, na fesili mai pe mafai ona latou faaaogaina se tasi o au atavali i totonu o le faavaa o le lomiga o Novema 2018 o le konafesi aoao. Sa ou tei! Ao tuputupu ae, o le mea muamua lava ou te faia i taimi uma lava e maua ai mekasini o le Ekalesia o le sueina lea o atavali. O lenei o le a i ai iina se tasi o au atavali! Ma, ina ua tau mai ia te au na latou mananao ia ogatusa lau atavali ma upu mai ia Peresitene Nelson, na mafai ona ou vaaia le aao o le Atua o loo uunaia au i luma.

O loo umi pea se ala mo au i lau malaga faatusiata, ae ou te matuai faafetai lava mo le faamoemoe o Peresitene Nelson i le Alii ma ia i tatou. Ou te faafetai mo lona manatu lelei ma lona toafimalie. Ou te iloa ao tatou faatino le faatuatua i le Alii o le a mafai ona tatou faia mea sili, e oo lava i mea na tatou manatu e le mafaia. “Aua e leai lava se mea e tasi e le mafaia e le Atua” (Luka 1:37).