O Tatou Aiga, O Tatou Auaiga
O Le Ma Tama, o le Atalii o le Tama Faalelagi
E alala le tusitala i Arisona, ISA.
O upu e le o aʻu e ona na oo mai i loʻu mafaufau: “E te manatu e sili atu lou alofa ia te ia nai lo aʻu?”
Ata pue o le tusitala ma lana tama tama
O la ma tama tama laitiiti pele, o Hayden, na sau i lenei lalolagi e lanumoana, e le’i manava, ma tauivi ina ia ola. Leai se tagi. Leai se minoi.
A o faanatinati faataamilo fomai ma tausimai i le potu o le falemai, sa ou iloa e i ai se mea ua tupu. Na vave ona tuuina atu e loʻu toalua ma loʻu tama ia Hayden se faamanuiaga faaleperisitua, ma sa faanatinati atu Hayden i le potu mo gasegase tigaina. Na vave ona faamaonia o loo maua o ia i se faaletonu i lona fatu e seasea tupu. I totonu o ni nai aso na faia ai ni ona taotoga o le fatu.
E ala mai i le mana ofoofogia o faamanuiaga faaleperisitua, anapogi, ma tatalo, na faatoilaloina ai e Hayden mea faigata ma faasaoina lona ola. Sa ma fiafia tele i le aumaia o le ma atalii i le fale ma amataina o matou olaga fou faatasi.
Na aumaia e Hayden le olioli e le mafaamatalaina i o matou olaga. Matou te faapelepele ma alolofa ia te ia. Ae ina ua mavae se taimi, sa amata ona ou popole e le o faasolo ina malosi o ia e pei ona faamoemoeina. E ui na faamautinoa mai e tagata tomai faapitoa ia i matou o le a iu lava ina manuia, ae sa faaauau pea le popolevale ao ou tauivi e fesoasoani i laʻu tama.
Sa ma suesue ma loʻu toalua e aoao mea uma ma te mafai e uiga i le maʻi o Hayden. Sa ma faia mea uma na ta’u mai e foma’i e fai. Ae e lei faasolo malosi lava.
Na ou vaivai ma faanoanoa. Sa ou aioi atu i loʻu Tama oi le Lagi e fesoasoani ia te au e saili se tasi e mafai ona fesoasoani ia Hayden, ae e lei oo mai se fesoasoani. Na faateleina le leaga o le tulaga a Hayden. Na amata ona oso ona ma’i lili. Sa ma fefefe. Sa ma faapea o le a aveesea atu o ia.
I se tasi po, sa umi ona ou ala i le sailiga o ni tali. Na ou tusia se tusi mo Hayden. Sa ou taʻu atu ia te ia le tele o loʻu alofa ia te ia ma loʻu taumafai malosi e faafaigofie lona olaga. Sa ou folafola atu o le a ou faaaluina le tele o lou olaga e taumafai ai e maua le fesoasoani na ia manaomia.
O le le fiafia ma le le mautonu na vave ona lofituina a’u. Na ou tootuli ma fesili atu i loʻu Tama i le Lagi, “Aisea?” Sa ou manatu na Ia auina mai Hayden ia te au ona sa Ia silafia o le a ou le fiu lava e taumafai e fesoasoani i laʻu tama. Aisea e le mafai ai ona ou maua ni tali? Aisea na taitai atu ai e fomai fou ma togafitiga fou taitasi i se isi faafitauli? Pe e lei alofa le Tama Faalelagi ia Hayden?
O le a le galo ia te au lena taimi. O se lagona ofoofogia o le alofa na faafuasei ona fusia au. O upu e le o aʻu e onaina na oo mai i loʻu mafaufau: “Jerlyn, e te manatu e sili atu lou alofa ia te ia nai lo aʻu?”
Sa faateia au. Na foliga mai ua tumau le taimi. Na maligi oʻu loimata—e le o le le fiafia e pei ona ou faalogoina muamua, ae mai le faamoemoe, malamalama, ma le alofa.
I lena lava taimi, na suia mea uma. Na faamaluluina loʻu loto. Na suia aʻu fesili. Ua ou malamalama nei e alofa loʻu Tama oi le Lagi ia Hayden i se alofa atoatoa. Na auina mai Hayden i totonu o se tino e fetaui mo ona manaoga ma ona avanoa mo le tuputupu ae ma le aʻoaʻoina. E i ai lana ia lava seti tulaga ese o tomai ma luitau, e pei lava oi tatou taitoatasi. Ua ou iloa o tamaiti e i ai manaoga faapitoa o ni fanau taua ma pele a le Tama Faalelagi o loo i ai se misiona faapitoa i lenei lalolagi.
Ma te mauaina ma loʻu toalua ia tali ma faamanuiaga i taimi uma, ae e oo mai i le taimi a le Alii, ae le o ma’ua lava. Ua taʻitaʻiina i maua i tusi sao, togafitiga, aʻoga, ma faiaoga e fesoasoani ai ia Hayden ia manuia i lona olaga faitino. Ma te taumafai e saili mo le ala ua tuu e lo tatou Tama oi le Lagi mo Hayden nai lo le ala na ma mananao mo ia e uia. O loo ma faia mea uma ma te mafaia e fesoasoani ai ia Hayden ia ausia lona malosiaga paia ma ola i le olaga na fuafuaina e lona Tama Faalelagi mo ia. O le ma malamalamaaga i le fuafuaga a le Tama Faalelagi ua sili atu ona manino i le taimi nei ua ma iloa o Hayden na avea muamua ma Ona atalii ae le’i avea ma ma tama.