Faataitai Ni Tu Masani Fou o le Eseta
I lenei Eseta, faaalu sina isi taimi e manatua ai le meaalofa silisili ua tuuina mai.
Faʻamatalaga mai le Aua Ua Fanau mai mo i Tatou le Tama, saunia e Lynne Millman Weidinger
O le Kerisimasi e masani ona sili atu ona gauai atu i ai pe a oo i aso malolo. Peitai a aunoa ma mea ua leva ona tutupu lea tatou te faamanatuina i Eseta taitasi, o le a leai se Kerisimasi.
Na aoao mai Peresitene Gordon B. Hinckley (1910–2008) i se tasi taimi, “O le a leai se Kerisimasi pe ana faapea e leai se Eseta. O le pepe o Iesu o Peteleema o le a pei o se isi lava pepe e aunoa ma le Keriso togiola o Ketesemane ma Kalevaria, ma le manumalo moni o le Toetu.”1
O nisi nei o tu ma masani e mafai ona e faʻaopopoina i au faamanatuina faaletausaga.
1. O e Usuusu Pese i le Eseta
Tuu ese vaega malie i manu o tia ma tagata pupuu, o pese uma o le Kerisimasi e faatatau ia Iesu Keriso. O le Eseta o le taimi sili lea mo musika e uiga i le Faaola, ma ioe, tusa lava pe pepese i faitotoa pito i luma o ou tuaoi.
Afai ua leai ni ou manatu, siaki le vaega “autu” o le tusipese i lalo o le “Eseta” ma le “Togiola” mo pese. Soo se pese e faamanatu ai Iesu Keriso e fetaui lelei mo pesepesega o le Eseta.
2. Faamagalo Se Tasi
E faafia ona e faafetai mo le meaalofa o le salamo? E ofoina atu e le Eseta se avanoa e faʻaopoopo atili ai i le auala tatou te tuʻuina atu ai lena lava agaga o le faamagalo atu i isi.
Na aoao mai Iesu: “O le mea lea, Ou te fai atu ai ia te outou, e tatau ona outou faamagalo i le tasi. …
“O Au, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (Mataupu Faavae ma Feagaiga 64:9–10).
Fesili ifo ia te oe lava: O ai o loo e teuina ai ni lagona leaga? Tatalo mo le malosi e faamagalo ai lenei tagata, ma tuu atu i le Faaola e fesoasoani i na lagona tiga ia mou atu.
3. Tuufaatasi se Faaaliga, Tala, po o Isi Gaoioiga/Faatinoga
E mafai ona e faatulagaina se gaoioiga/faatinoga mo le Eseta. O se faataitaiga faigofie atonu o se faitauga faatusitusiga paia mo le afiafi faaleaiga po o se konaseti a le nuu.
4. Asiasi i Tuugamau o e Pele
Ona o Iesu Keriso, o le oti ua leai sona tui (tagai 1 Korinito 15:55). Faaalu se taimi e asiasi ai i tuugamau o e pele e mafaufau loloto ai i lenei tala fou fiafia.
E mafai foi ona e faitauina leotele nisi mau e te fiafia i ai o loo feagai ma le Toetu ao e asiasi i nei tuugamau. O nisi (o le tele) o mau e mafaufau i ai mo lenei vaega o 1 Korinito 15:20–22; Alema 11:42–44; ma le Mataupu Faavae ma Feagaiga 88:14–16.
5. Ia Lelei Teisi Atu
Faamatalaga mai le Ua Asiasi Iesu Keriso i Amerika, saunia e John Scott
O le Eseta e faamamaluina mea na tutupu i Ketesemane, o mea na tutupu i luga o le satauro, o le Faaola na toetu mai le oti i le aso lona tolu, ona auauna ai lea mo le 40 aso ao lei afio ae i le lagi.
E le gata i lea, e leʻi leva talu ona afio aʻe i le lagi, ae faaali atu Iesu Keriso i Sa Nifae ma auauna atu ia i latou (tagai 3 Nifae 11–28). E tele naua mea e faamanatu!
Aisea e le faalautele ai lou vaitau o le Eseta? Ia fiafia pea lou agaga i vavega o le Eseta. Faia se taumafaiga malosi e avea atili faapei o Keriso i le 40 aso pe a mavae le Eseta. Mo musumusuga, mafaufau i le valaaulia lenei mai ia Peresitene Russell M. Nelson: “Faapaiaina se vaega o lou taimi i vaiaso taitasi e suesue mea uma na fetalaia ma faia e Iesu e pei ona tusia i le Feagaiga Tuai, aua o Ia o le Ieova o le Feagaiga Tuai. Suesue i Ana tulafono e pei ona tusia i le Feagaiga Fou, aua o Ia o lona Keriso. Suesue i Ana aoaoga faavae e pei ona faamaumauina i le Tusi a Mamona, aua e leai se tusi o tusitusiga paia lea o loo manino ai ona faaalia Lana misiona ma Lana galuega. Ma suesue i Ana upu e pei ona tusia i le Mataupu Faavae ma Feagaiga, aua o loo faaauau pea ona Ia aoaoina Ona tagata i lenei tisipenisione.”2
O Loo Faatali Mai Au Tu Masani
Na aoao mai Elder Dieter F. Uchtdorf o le Korama a Aposetolo e Toasefululua, “Ina ia maua le aso aupito taua i le talafaasolopito, e tatau ona tatou toe mafaufau i lena afiafi ua toetoe 2,000 tausaga talu ai i le Faatoaga o Ketesemane ina ua tootuli ifo Iesu Keriso i le tatalo lotulotu ma ofoina atu Ia lava e fai ma togiola mo a tatou agasala.”3
O mea sili ona taua na tutupu i le talafaasolopito e aoga le faaaluina o le taimi e mafaufau loloto i ai i tausaga taʻitasi. O tu masani e fesoasoani ia i matou e faia lena mea, tusa lava pe mai i lenei lisi poʻo la oe lava filifiliga.
O le a le mea o le a e faaopoopoina i lenei tausaga?