O Atatusi o le Faatuatua
Bob ma Lori Thurston
Na auauna i le Misiona a Kemupotia Phnom Penh
“Ina ua ma tatalaina le ma valaauga ma maua ai ua valaauina i ma’ua e auauna atu i le Misiona a Kemupotia Phnom Penh, na ma fetagisi. Sa ma fiafia!” Ua faapea mai Uso Bob Thurston. “Ailoga ma te filifilia Kemupotia, ae o se meaalofa! O se faamanuiaga!” Ua faapea mai Tuafafine Thurston.
E lagona e le au Thurston se sootaga faapitoa ma tagata o Kemupotia. Ma te alolofa ia i latou, ma na ma lagonaina foi lena alofa mai ia i latou,” ua fai mai ai Tuafafine Thurston. “Sa faaali mai e tagata i Kemupotia ia i maua le agalelei tele.”
Mai tiute uma na feagai ma le au Thurston i le la misiona, la te faatauaina tele le avanoa e asiasi ai i tagata i o latou fale.
E manatua e Sister Thurston le tilotilo atu ia i latou na ia auauna i ai i Kemupotia ma mafaufau, “E le mafai ona ou faatali seia ou vaai ia te oe i le olaga a sau, ona mafai ai lea ona ou taʻu atu ia te oe mea uma ou te lagona mo oe ma loʻu alofa mo oe”
I le la misiona faatasi, na aoaoina ai e Bob ma Lori Thurston o le auaunaga anoa e mafai ona tupu e ui lava i papupuni o gagana ma eseesega faaleaganuu aua o i tatou uma lava o fanau a le Atua.
Leslie Nilsson, tagata pueata
Bob:
Ae ma te lei faaipoipo ma Lori, sa ma talanoa e uiga i le auauna atu i misiona pe a ma litaea. Sa ma faamisiona uma muamua. O Lori sa faamisiona i Kobe, Iapani, ma sa ou faamisiona i Perisipeni, Ausetalia. Ina ua iu ina ma sauni e litaea, sa ma taʻu atu i le ma fanau ma te mananao e auauna atu i ni misiona se tele.
Sa faamanuiaina i maua i le mafai ona ma litaea ao talavou pea. Ina ua ma faalogo o nisi o ulugalii matutua ua le mafai ona auauna atu i nisi nofoaga e pei o atunuu tauatiae ona o mafuaaga o le soifua maloloina ma isi atugaluga, na ma mafaufau, “Ma te le’i 60 tausaga. O lea ma te malolosi, o lea la faaaoga ma’ua!”
Na ou litaea toe lua lava aso atoa lo’u 56 tausaga. Na ma maua moni lava la ma’ua valaauga o le misiona ao ou galue pea. Ina ua ma tatalaina le ma valaauga ma maua ai ua valaauina i ma’ua e auauna atu i le Misiona a Kemupotia Phnom Penh, na ma fetagisi. Sa ma fiafia!
Lori:
E le’i i ai Kemupotia i o ma mafaufau. Na ou manatu o le a ma o i Aferika po o se isi mea. Na amata ona ma fesili ifo ia i ma’ua lava, “Ua lelei, o a mea o faatalitali mai mo i ta’ua?” Ailoga ma te filifilia Kemupotia, ae o se meaalofa! O se faamanuiaga lava! E sili atu le atamai o le Alii nai lo i ta’ua. Na Ia auina atu i ma’ua i le mea e tatau ona ma i ai.
Na ma auauna atu i se misiona fesoasoani agaalofa. Na ma galulue i galuega faatino mo le Auaunaga Agaalofa a le AAG, faʻatumu lipoti, ma talosagaina ni galuega faatino fou. Na ma siaki foi i galuega faatino ua mavae e pei o vaieli na eliina i le lua tausaga talu ai. Na iu ina ma auauna atu foi i isi auala.
Sa ma auai i konafesi a siteki ma itu e fesoasoani e aoao ia taitai ma faifeautalai, na ma asiasia fale o faifeautalai ma asia tagata i o latou fale. Na ma faia ituaiga mea eseese e fesoasoani ai ia sologa lelei le misiona.
E leai ni aso se lua na tutusa i le ma misiona. O nisi aso na ma i ai i totonu o le togavao, e tulivae le-loloto i totonu o le vai po o palapala. O isi aso na faʻaalu i le ofisa o le misiona. Faʻatasi ai ma faifeʻautalai o le Va i Fafo, matou te asiasi atu i le Matagaluega o Talitonuga Eseese ma Lotu. I Kemupotia, o le upu “cult” [vaega e ese talitonuga faalelotu] e le faapea o se mea leaga. O le lotu aloaia o le Puta---o isi lotu uma e manatu o ni vaega e ese talitonuga faalelotu. Sa ma asia le Matagaluega e fesoasoani e faatulaga se uluai vaaiga e faapea o Le Ekalesia a Iesu Keriso o le Au Paia o Aso e Gata Ai o se faalapotopotoga lelei ma e mafai ona faatuatuaina.
Na matou atiina ae se fesootaiga lelei ma i latou, ma sa vave ona latou valaau mai mo se fesoasoani. Latou te valaau mai ma fai mai, “Na feagai i matou ma se lolo, ma matou te manaomia ni meaai mo le 200 aiga ua leai ni fale.” Sa latou iloa e mafai ona latou faalagolago i le Ekalesia e aumai mea i le nofoaga o manaomia vave ai ma faaopoopo atu i mea latou te lei mauaina.
O le a le mea na ma oo i ai i Kemupotia? Soo se mea e te lauina mai, atonu na ma oo i ai! Na ma saofafai i luga o fola e sili ona maualalo--e masani lava na o le palapala po o ni ofe--i fale e sili ona maualalo. Ua ma oo foi i fale tetele a tagata ofisa o le malo. Na auauna atu foi Bob i le au peresitene a se paranesi mo sina taimi.
Bob:
Na valaau mai le peresitene o le misiona ia te a’u ma faapea mai, “Talofa, ou te manao ia avea oe ma fesoasoani lua i se paranesi.” I le tausaga ma le afa mulimuli ane, sa ou i ai i le potu faamau o le Malumalu i Hong Kong Saina ma le peresitene o le paranesi na ou galue ai. Sa ulu atu o ia i le malumalu mo le taimi muamua! Na sefeina e ia ma lona aiga tupe ma na faafitu ona taumafai e o atu i le malumalu, ae e i ai lava se faalavelave, pe ma’i se isi. E i ai lava le mea e tupu. Ina ua mavae le fitu tausaga, na latou sefeina na o le 40 tala.
E tolu taimi i le ma misiona, na mafai ona ma fesoasoani i le Au Paia o Aso e Gata Ai i Kemupotia e auai i le malumalu. Sa ma aveina le tele o peresitene o paranesi e le’i oo i le malumalu ae na latou faia ni faatalanoaga mo pepa faataga o le malumalu. Ae e sili atu i Kemupotia, o se ulugalii matutua o le a fesoasoani i nei aiga ao agai atu i le malumalu. Latou te manaʻomia le i ai o se tasi ma i latou aua latou te le iloa pe faapefea ona lele i luga o se vaalele. E toatele e le’i tietie foi i se pasi! Ma o lenei e tatau ona latou felelei atu i Hong Kong ma o atu i le malumalu. Sa faigata mo i latou ona faia lena mea na o i latou lava. Ma te faafetai mo Tupe Fesoasoani mo Tagata Ulu o le Malumalu [Temple Patron Assistance Fund] lea na fesoasoani e tausia ai i latou.
Lori:
O le avea ma se tagata o le Ekalesia i Kemupotia e mafai ona luitauina. O se atunuu, e leai se manatu o Kemupotia i le Sapati. O tagata uma e o mai i le lotu e tatau ona faia ni osigataulaga ina ia i ai iina.
E le gata i lea, o Kemupotia e ono pasene Musalemi ma e na o le lua pasene Kerisiano--o isi o tagata Puta. O le suia mai se olaga Puta i se olaga faʻa-Kerisiano e faigata tele. O nisi tagata e tuli ma a latou galuega, ma o le tele o taimi e faaesea i latou e isi i le vaiaai.
O le sefuluai o se mea tele. E masani ona o mai i taeao taitasi ia Monike Puta e fesili mai mo ni araisa po o tupe, ma ua masani ai tagata. Ae o le ave o lau siaki ma ave se fasi vaega o lena mea mo le sefuluai o se mea tele.
O le toʻatele na i ai ni puapuaga moni lava i o latou olaga. Talu ai o le Khmer Rouge, o se malo faakomunisi na pulea Kemupotia i le iuga o le 70, o tagata uma i luga o le 40 tausaga e i ai sana ia lava tala matautia taufaamatau. Ou te lei feiloai atu i se tasi e lei aafia ai. O tagata uma na i ai o o latou aiga na fasiotia. E ui i le tele o mea na feagai ma i latou, sa le mafai ona ou talitonu i lo latou malolosi, i lo latou naunau e taumafai. Ae i tua atu o lo latou agaga malosi, o le toatele o loo i ai pea le manatu maualalo ia te ia lava. E toatele e le lagona o i latou e taua pe aoga tele.
Sa ofoofogia le vaai i le auala na fesoasoani ai le talalelei a Iesu Keriso ia i latou e fuga mai. Ina ua latou iloa o latou e le gata o ni tagata lelei ae o se alo foi o le Atua, latou te fai mai, “E te pepelo? O lenei ua i ai laʻu vaega e saofaga.”
O le a tupu ma ola le Ekalesia i Kemupotia. O tagata maoae na taitaiina atu i le Ekalesia. O le Au Paia iina o ni paionia, ma o i latou o e taliaina moni le talalelei e faamanuiaina i le tele o auala ona ua latou iloa le Faaola. E ese le maoae.
E toatele le au paia ma uarota malolosi i se nofoaga e taua o le “Mauga o Lapisi,” o se nofoaga tele e lafoai ai lapisi e nonofo ai tagata. O le au paia iina o ni tagata piki ma tagata e aoina mea. Latou te maua a latou tupe mai le toe faʻaaogaina o le palasitika ma le alumini lea latou te mauaina mai le lapisi. Latou te nonofo i fale laiti ua faafia ona ma oo i ai.
Bob:
I se tasi aso na ma faalogoina se musika leotele, ma ma matauina o loo faatuina se faleie. I Kemupotia, o lona uiga o se tasi ua faaipoipo pe ua maliu se tasi.
Lori:
Na ma iloa ai o se tina e toalima pe toaono tamaiti na faatoa maliu. Sa leai se tane na i ai iina. Na feala i luga tamaiti ma iloa ua maliu lo latou tina.
O le tasi afafine sa na ona tagi masusu. E ala mai i se faaliliu upu, na ia fai mai ai, “O aʻu o le ulumatua. O nai o’u tei uma nei. Ou te le iloa po o le a la’u mea o le a fai.”
Sa vave ona ou si’iina mai o ia i o’u lima. E mafai faapefea ona ou le faia? O lenei teineitiiti na faatoa maliu lona tina. Sa ou talanoa ia te ia i le gagana Peretania ma fai atu, “Ou te iloa e te le malamalama ia te aʻu, ae ou te folafola atu o le a e toe vaai i lou tina. O le a lelei mea uma ia te oe. O le a le tuulafoaiina oe.”
O le tele o aafiaga faʻapenei na ma maua ai se sootaga faapitoa ma tagata o Kemupotia.
Na ma lagonaina foi lena alofa. Sa faaali mai e tagata i Kemupotia ia i maua le agalelei tele. Ma te alolofa ia te i latou aua o i latou o alo o le Atua. O i latou o o tatou tuagane ma uso.
Faatasi ai ma nisi tagata, ou te manatua le mafaufau, “E le mafai ona ou faatali seia ou vaai ia te oe i le olaga a sau, ona mafai ai lea ona ou taʻu atu ia te oe mea uma ou te lagona mo oe ma loʻu alofa mo oe, ma mea ou te faamemelo ai ia te oe, aua e le mafai ona ou fai atu ai nei.”
Ua faamanuiaina i ma’ua i la ma’ua misiona i le tele o auala. Fai mai nisi tagata, “Ou te le iloa pe mafai ona ou auauna i se misiona. E le mafai ona ou tuua la’u fanau laiti [grandkids].” E toalima le fanau tama a le ma fanau i le taimi na ma o ese ai, e lima, fa, tolu, lua, ma le tasi tausaga. E toalua le fanau teine a le ma fanau na fananau aʻo ma o ese. O le a ou faasaoina ni a’u pine faamisiona Kemupotia e lua ma tuuina atu i a’u pepe teine e toalua [grand-daughters] ina ia la iloa ai e le’i i ai Tinamatua iina [i le fale] ona o loo faia e Tinamatua le mea na manaomia e le Alii na te faia.
Bob:
E tele ni auala e auauna atu ai i le Alii o ni faifeautalai. Tatou te talitonu faamaoni i mea na saunoa mai ai Elder Jeffrey R. Holland e uiga i le galuega faafaifeautalai a tagata matutua. Na ia faapea mai, “Ma ou te folafola atu o le a outou faia mea mo [lou aiga] i le galuega a le Alii, i lalolagi e lē uma, ia e le mafai lava ona outou faia pe afai tou te nonofo i le fale ma faaalu le tele o taimi ma i latou. O le a se faamanuiaga sili atu e mafai ona tuu atu e matua matutua i a latou fanau nai lo le fai atu e ala i galuega ma upu, “I le aiga lenei, tatou te o e faamisiona!” [“Ua Tauto i Tatou Uma,” Liahona, Nov. 2011, 45.]”