Faamanuiaga o le Ola Tutoatasi
Ua Manuia le Pisinisi
Faafetai i mea sa ia aoaoina i vasega o le ola tutoatasi, ina ua tapunia le tasi faitotoa ia Teddy Reyes, e le’i umi ae matala le isi.
ATA PUE SAUNIA E Raul Sandoval
Ua ta le 4:00 i le taeao i Santo Domingo, le Dominican Republic, ma o Teddy Reyes ua leva ona ala ma galue. E tele ana mea e fai i le aso ina ia faatumauina le faamanuiaina o lana pisinisi. Ua amata ona tipitipi tamato ma le falaoa. Ona ia faia lea o lana sosi faapitoa.
E oʻo atu i le 6:00 i le taeao, e toa lua tagata faigaluega ua taunuu atu e fesoasoani ia te ia, ma faatopetope sauniuniga. E ta ifo le 8:00, ua latou faia le 300 sanuisi, afifi taitasi i pepa palasitika ma ua utuina i tagapepa. E toʻa ono isi tagata faigaluega e taunuu atu, ma e o atu le vaega atoa e faʻatau atu.
E o’o atu i le 9.00 i le taeao, ua taulia uma ae na o ni nai sanuisi—e tolu pe fa na faʻasaoina e Teddy e fafaga ai lana vaega.
O loo lelei le pisinisi a Teddy. Ae o mea e le’i faigofie i taimi uma. O le mea moni, mo le lima tausaga talu ai, ua le mafai ona ia maua galuega tumau i lana matata filifilia—o se loia.
E faʻapefea la ona faia e Teddy le suiga mai se tagata faufautua i se tagata e faʻatau atu sanuisi? E tele galuega faigata, ioe, ae na ia faaaogaina foi ma le faaeteete ia mataupu faavae sa ia aoaoina i vasega na ofo atu e ala i le polokalama amata a le Ekalesia o Auaunaga o le Ola Tutoatasi.
Leai Sana Galeuga
I le lima tausaga talu ai, na tulaga lelei le olaga a Teddy. Na lelei lana galuega o se loia, e lei leva ona faaipoipo o ia, ma sa ia papatisoina lona toalua. “Ae sa i ai ni o ma luʻitau”, na ia fai mai ai, “ma na leai saʻu galuega.”
Mo le isi fa tausaga, sa tauivi ai Teddy e sue se galuega. “Sa i ai le tele o galuega sa mafai ona ou faia, ae leai se tasi na manao e totogi aʻu. Sa ou taumafai e amata ni galuega eseese na o aʻu, ae sa le aoga.”
O lona toalua, o Stephany, na lelei lana galuega, ae na le gafatia e lona totogi ona totogiina ia pili. E le’i umi ae maua le tama a le ulugalii. Na la mauaina le fiafia tele, ae na atili le manuia ai la tulaga tautupe. Na leai se latou fale, na tatau ona faʻatau ese le la taavale, ma faʻaaoga uma a la tupe teu. Mulimuli ane sa tatau ona latou siitia atu i se tamai fale a le tina o Stephany.
Ae e lei faavaivai ai Teddy. E le i pine ae maua se avanoa e leʻi mafaufauina.
O Le Mana o le Ola Tutoatasi
Ina ua mavae tausaga o tauiviga, na iloa e Teddy ua oo i le taimi mo se suiga.
“Sa ou filifili e ave vasega a le Ekalesia o le ola tutoatasi,” o lana tala lea. “Sa ou faalogo e uiga i na vasega ae na manatu i taimi uma e le mo a’u. Na ou manatu e faatatau i le faia o mea e oe lava ia. Na ofoofogia vasega.”
Muamua, na auai Teddy i se vaega o Tulaga Tautupe a le Tagata Lava Ia. Ona ia auai lea i se vaega o le Amataina ma le Faaolaina o La’u Pisinisi. O vasega e fai i vaega na fesoasoani ia Teddy i lona malamalama tau pisinisi ae na fesoasoani foi ia te ia e atiina ae faaleagaga.
“O le aveina o nei vasega na suia ai mea uma,” o lana tala lea. “Sa ou filifili e faia mea uma na latou aoaoina. Ma na vave ona suia a’u tulaga tautupe. Sa amata ona ou totogiina se sefuluai atoa, tatalo i aso uma, suesue i tusitusiga paia, ma faatinoina le faatuatua. Ma na suia mea—na amata ona ou teuina tupe ma tausia le aso Sapati ia paia. O mataupu faavae uma na faamanuiaina au.”
I lana vaega o le Amataina ma le Faaolaina o La’u Pisinisi, sa iloa e Teddy le auala e iloa ai se oloa manaomia e mafai ai ona manuia tagata faatau i le mea o loʻo ia nofo ai. A o ia iloiloina mea na sailia e tagata, na amata ona solo mai musumusuga. I totonu o lana eria, e fiafia tagata i sanuisi fou, ae latou te fiafia e faatonu pe fai se oka—ma tiliva atu.
“E tele faleaiga e iai se latou sosi faapitoa e tulagaese ai a latou meaai,” o le tala lea a Teddy. “O lea na ou atiina ae ai laʻu lava sosi faapitoa mo sanuisi!”
Faaolaina o Lana Pisinisi
I le aso na ia faʻalauiloa ai lana pisinisi, na faia ai e Teddy sanuisi e 30.
“I le tolusefulu minute mulimuli ane, na ou toe foʻi ai i le fale,” o lana tala lea. “Na popole loʻu toalua ina ua ia maua au i luga o le nofoa. Sa ia fesili mai ia te au pe o le a le mea o loo ou faia i le fale—sa le tatau ona ou faatauina atu ni sanuisi? Ua uma ona ou faatauina atu uma!”
I isi vaiaso na sosoo ai, na faafesootai e Teddy pisinisi ma aoga i le lotoifale. E toatele na naunau e faatau ana sanuisi, ma na amata ona tuputupu ae lana pisinisi. Na vave ona ia aʻoaʻoina le auala e tausia ai fualaau faisua ina ia umi lo latou aoga. Na te silafia lelei foi le umi e lelei ai lana sosi faapitoa. Na ia faatonuina ma piki falaoa i afiafi taitasi. Na ia faatauina mai fualaau faisua i Aso Toonai, lea e itiiti ifo le tau ae o le a lelei pea i le Aso Gafua.
E lei leva ae mauaina e ia ni oka mo ituaiga faapitoa o sanuisi, ma e oo lava i ni oka tetele mo taimi faapitoa. Sa ia manaomia le fesoasoani ma na amata ona fai ana tagata faigaluega.
E ala i le faia o ni sootaga lelei ma aʻoga i totonu o le lotoifale ma pisinisi, na fatuina ai e Teddy ni tagata faatau faifai pea. I totonu o le fa masina, e valu tagata faigaluega ma sa faatauina atu sanuisi e 300 i le aso, lima aso i se vaiaso. O lana au faʻatau na sili ona lelei na latou faʻatau atu ai sanuisi uma lava e oo lava i le taimi o le taumafanafana ina ua tapunia aʻoga. O lenei ua saunia Teddy e toe faatele le pisinisi.
Talu ai na ia aveina vasega mo le ola tutoatasi, na musuia ai o ia i le fuafuaga o le pisinisi sanuisi. “Ona o lenei taiala mai le Ekalesia ma faamanuiaga ua ou mauaina,” ua ia saunoa ai, “E i ai saʻu molimau malosi e uiga i le Ekalesia ma Iesu Keriso.”