O Le Faailoaga Sili o le Alofa o le Atua

Saunia e Elder M. Russell Ballard

Sui Peresitene o le Korama a Aposetolo e Toasefululua

Mai se saunoaga i le konafesi aoao ia Aperila 1988.

E faailoa mai e le Atua Lona alofa mo i tatou e ala i le saunia o le taitaiga tatou te manaʻomia e alualu ai i luma ma ausia ai mea tatou te gafatia. O Ia o Le e sili Lona silafia e uiga ia i tatou, o mea tatou te gafatia, ma o tatou avanoa e faavavau ua tuuina mai ia i tatou fautuaga paia ma poloaiga i Ana tusi lesona—o tusitusiga paia. A tatou malamalama ma mulimuli i nei faatonuga, ua iai i o tatou olaga le faamoemoe ma le uiga. Tatou te iloa o lo tatou Foafoa e alofa ia i tatou ma finagalo mo lo tatou fiafia. I se faaaliga le mafaatusalia o lenei alofa paia mo i tatou, na Ia auina mai ai Lona Alo Pele e Toatasi, o Iesu Keriso.

“Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

“E lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia” (Ioane 3:16–17).

Na soifua mai Iesu i le olaga faitino. Sa ia taitaia se olaga atoatoa, ma, i le faia o lea tulaga, na faailogaina ai le ala mo i matou e mulimuli ai. Na Ia aoao Ona soo: “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).

Atonu tatou te amata ona malamalama i le loloto o le alofa o Keriso mo i tatou pe a tatou mafaufau na Ia naunau e togiola ma mafatia i le tiga mo a tatou agasala, “o le mafatia lea na oo ai ia te [ia] lava, o le Atua lava lea, o lē ua silisili i tagata uma, le gatete ona o le tiga, ma tafe toto ai pu afu uma, ma mafatia ai i le tino atoa ma le agaga” (Mataupu Faavae ma Feagaiga 19:18).

O lenei Eseta, ia tatou tuuina atu se faafetai faapitoa i le Atua mo le Togiola ma le Toetu o Lona Alo pele, o Iesu Keriso. Aua ia te Ia, e ala ia te Ia, ma e ala mai ia te Ia, o lenei tulaga faaletino e mafai ona avea ma se olaga tumau, atoatoa, lea e le mafai ai e upu ona faaalia ai lo tatou olioli.

O mea ofoofogia uma o le natura o ni ata o Lona mana paia ma faʻaaliga o Lona alofa. Ae o le vavega sili o vavega uma o loo faatalitali mai mo i tatou. O le a tupu pe afai, e ala i Lona mana, o le a tatou toetutu ai mai le oti ma le tuugamau i se lalolagi fou o le a le mavae, lea, afai tatou te agavaa, o le a tatou faatasi ma Ia ma lo tatou Tama oi le Lagi e faavavau faavavau lava.