“O lea la!”

Richard J. Anderson

Iuta, ISA

Na ou taunuu i le fale i le leva o le po i le taumalulu ina ua mavae ona ou taitaia le tele o faatalanoaga a’o avea ai ma se epikopo. Sa ou vaivai. Sa faigata le galuega mo le tele o vaiaso, ma o tiutetauave faaleaiga ma le Ekalesia na ou lagona ai le sili atu nai lo o mea ou te gafatia.

I lena afiafi, sa tatau ona ou faaleleia laʻu taavale ina ia mafai ai ona ou galue i le taeao e sosoo ai. A o ou ofuina lo’u ofu faigaluega, na suia la’u matafaioi mai le epikopo i le fai taavale. Sa ou taoto i luga o le foloa malulu o le faletaavale i lalo ifo o le taavale ma amata ona galue. Aisea na tatau ai ona ou maluluina, vaivai, ma faatigaina o’u lima ina ua uma ona ou galue malosi i lena aso? Na ou le maua le onosa’i ma na amata ai se tatalo faatauanau i le Tama Faalelagi.

“E mafai ona E fesoasoani laiitiiti mai ia te a’u?” Na ou fai atu ai. “O loo ou taumafai i le mea sili ou te mafaia e avea ai ma se tamā lelei, tane, ma se epikopo ma ola i poloaiga. Mata e le sili atu laʻu tautua pe a mafai ona ou maua sina malologa? Faamolemole fesoasoani mai ia uma ona ou faia lenei mea ina ia mafai ai ona ou moe.”

Na faafuasei lava, ona oo mai ma le malosi ni upu manino ma mavaevae se tolu i loʻu mafaufau: “O lea le!”

“O le a?” Sa ou tali atu.

Na toe oo mai upu: “O lea la!”

O le malamalama na amata ona faatumulia ai loʻu mafaufau ma lo’u loto ina ua faatolu ona oo mai upu nei: “O lea la!” O nei upu na aumaia se savali i loʻu agaga. “Lea” [It] o le olaga faitino, ma sa ou oo i se taimi o le tuputupu ae ua mamanuina e fesoasoani ia te au ia avea ma tagata e finagalo le Tama Faalelagi ou te avea ai. Na pei lava na fai mai le Agaga ia te au, “Na e faamoemoe o lenei malaga faalelalolagi e leai ni tauiviga?” Ina ua ou tu i luga mai lena fola sima malulu, e le o au lea muamua.

E faalagolago i le auala tatou te tali atu ai ia i latou, o tofotofoga e mafai ona vaaia o ni meaalofa mai se Tama alofa i le Lagi. Na te tuuina mai ia i tatou le avanoa e feagai ai ma tofotofoga ina ia mafai ai ona tatou aoao e liliu atu ia te Ia. Pe a tatou faia, ua faamanuiaina i tatou i le aoaoina ma le alualu i luma faaleagaga.

O upu e tolu na oo mai i loʻu mafaufau i lena po malulu i luga o le fola sima o lo’u fale taavale na faamanuiaina ai au mo le silia ma le 35 tausaga. Ou te taumafai malosi ina ia iloa e leai se tofotofoga e le aoga. Ou te vaai i tofotofoga o ni avanoa e aoao ai mea atonu ou te le mafai ona aoaoina i se isi lava auala.