E Oo Lava i se Afā E Le Mafai Ona Taofia i Maua

Koraima Santiago de Jesus

San Juan, Puerto Rico

E lei umi ona ou foi mai laʻu misiona, ae ou maua se valaaulia e alu i se siva. I le siva, sa ou tuu sese ai laʻu telefoni ma na ofo mai se alii talavou e fesoasoani ia te aʻu e sue. A o ma talatalanoa, na ma iloa ai oi ma’ua uma o faifeautalai ua maea misiona ma faasoa le tele o manatu ma sini.

Na faaauau pea le ma mafutaga, ma na iu ina ma faamau. O le ma miti ia faamauina i le Malumalu a Uosigitone D.C. ao lei tapunia mo le toe faafouina ia Mati 2018. Ae ina ua uma ona fai lena filifiliga, sa tofotofoina loa i ma’ua. Muamua, na leai saʻu galuega ma na leai se auala e teu ai se tupe mo la ma malaga i le malumalu. I le isi, sa i ai se afā na foufou mai o le a taia ai Puerto Rico ao leʻi oʻo i le aso o le ma faaipoipoga.

Ina ua sau le Afa o Maria, sa faaleagaina ai lo matou motu matagofie. Na tapunia faleoloa. Na leai se eletise; vai, meaai, ma isi mea masani na faigata ona maua. Na leiloloa mea uma na ma fuafua e faʻaaoga mo le ‘aiga o le ma faaipoipoga. Na tatau ona le oo le ‘aiga o le faaipoipoga, ma na foliga mai o le a le oo foi le ma faaipoipoga. O le malaga i totonu ma fafo o Puerto Rico sa faatapulaaina, ma e leai se tasi na iloa pe mo le a le umi. Na amata ona ou lagonaina le lotovaivai, ma sa faatumulia au i le masalosalo ma le le mautonu.

I se tasi po, na ma talatalanoa ai ma la’u uo ua ma faamau e uiga i lo ma tulaga. Sa le mautinoa le faimalaga, ma o le a leai se ‘aiga o le faaipoipoga po o ni lavalava faaipoipo, ae na faamautu mai e le Agaga e tatau ona ma faatuatua i le Alii. O le mea sili ona taua o le faamauina i totonu o le malumalu. Sa ma tatalo atu i le Tama Faalelagi mo le fesoasoani.

I le taimi na toe amata ai faigamalaga mai Puerto Rico, sa tatau loa ona ma faia ni fuafuaga fou mo le malaga ma toe faatulaga la matou aso o le faamauga. Sa matou le maua ni ala o fesootaiga mo vaiaso ina ua mavae le afa, ae na i ai se telefoni feaveai a se uo. Na ia faatagaina i ma’ua e faaaoga e faafesootai ai le malumalu. Sa mafai ona ma fesuiai mea uma ina ia mafai ona faamauina pea i maua! I nai vaiaso ao lumanai la ma’ua faigamalaga, na foai mai e tagata o aiga ma uo ni seevae ma ni lavalava ma fesoasoani ia ma maua le tele o mea mo le ma faaipoipoga.

Ina ua ma ulu atu i le malumalu, sa ma tuua uma o ma’ua popolega i tua. Sa ma uuina le lima o le tasi ma le isi e ulufale faatasi ai i lo ma lumanai. E mafai ona ou fai atu moni lava sa ou lagonaina le aao o le Alii o taʻitaʻia ma faamautinoa ia i ma’ua, afai lava ma te faatuatuaina o Ia, o le a SEKI mea uma. O le taimi nei, ua faamanuiaina i ma’ua i se atalii aulelei ma o i matou o se aiga ua faamauina mo le faavavau atoa.