Avea le Auaunaga o se Mea Fiafia

O le auauna atu ma le alofa e aumaia le olioli i le tagata foai ma le tagata e taliaina.

O nisi taimi o la tatou sailiga mo le fiafia i lenei olaga e foliga mai e pei o le tamo’e i luga o le masini tamo’e. Tatou te tamomoe ma tamomoe ma lagona o lae tumau i le mea e tasi. Mo nisi, o le manatu o le auauna atu i isi e pei o lae ua faaopoopo atili nisi mea e fai.

Ae e finagalo lo tatou Tama Faalelagi ia tatou maua le olioli ma na faapea mai ia i tatou, “ua ola tagata ina ia latou maua le olioli” (2 Nifae 2:25). Ma na aoao mai le Faaola o le auauna atu i isi o se vaega taua o le auala tatou te aumaia ai le olioli i o tatou olaga ma olaga o isi.

O Le a Le Olioli?

O le olioli ua faauigaina o “se lagona o le olioli tele ma le fiafia.”¹ Ua tuuina mai e perofeta o aso e gata ai le faamaninoga i le mea e maua mai ai le olioli ma pe faapefea ona maua. “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga,” na saunoa mai ai Peresitene Russell M. Nelson. “… O le olioli e sau mai ia [Iesu Keriso] ma ona o Ia. O Ia o le puna o le olioli uma.”²

O le Auaunaga e Aumaia le Olioli

Ina ua uma ona ‘ai Liae i le fua o le laau o le ola, na faatumulia lona agaga ”i le olioli tele” (1 Nifae 8:12). O lona manaoga muamua ia faasoa atu lea fua ia i latou e alofa i ai.

O lo tatou naunautaiga e auauna atu i isi e mafai ona aumaia lea ituaiga olioli ia i tatou ma i latou. Na aoao e le Faaola Ona soo o le fua tatou te aumaia pe a tatou fesootai atu ia te Ia e fesoasoani e aumaia ai ia i tatou se atoatoaga o le olioli (tagai Ioane 15:1–11). O le faia o Lana galuega e ala i le auauna atu ma saili e aumai isi ia te Ia e mafai ona avea o se aafiaga fiafia (tagai Luka 15:7; Alema 29:9; Mataupu Faavae ma Feagaiga 18:16; 50:22). E mafai ona tatou maua lenei olioli e tusa lava pe feagai ma faigata ma mafatiaga (tagai 2 Korinito 7:4; Kolose 1:11).

Na faaali mai e le Faaola ia i tatou le faataitaiga sili o se tasi o punaoa sili o le olioli moni i le olaga faitino e maua e ala i le auaunaga. Pe a tatou auauna atu i o tatou uso ma tuafafine e pei o le Faaola, faatasi ai ma le alofa mama ma le alofa i o tatou loto, e mafai ona tatou maua le olioli e sili atu nai lo le fiafia mauagofie.

“A o tatou talia [le auauna] ma loto naunautai, o le a tatou … latalata atili i le avea ma nuu o Siona ma o le a tatou lagonaina le olioli silisili faatasi ma i latou na tatou fesoasoani i ai i luga o le ala o le avea ma soo.” na aoao mai ai Sister Jean B. Bingham, Peresitene Aoao o le Aualofa.³

E Faapefea ona Tatou Faia le Auaunaga ia Fiafia Atili?

E tele auala e aumaia ai le olioli tele i la tatou auaunaga. O ni nai manatu nei:

Malamalama i lou faamoemoega i le auauna atu. E tele mafuaaga e auauna atu ai. I le iuga, o a tatou taumafaiga e tatau ona ogatusa ma faamoemoega o le Atua “ia aumaia le tino ola pea ma le ola faavavau o le tagata” (Mose 1:39). A o tatou taliaina le valaaulia a Peresitene Russell M. Nelson e fesoasoani i isi i le ala o le feagaiga, e mafai ona tatou maua le olioli i le auai i le galuega a le Atua.⁴ (Mo nisi faamatalaga i le faamoemoega o le auaunaga, tagai “Mataupu Faavae mo le Auaunaga: O Le Faamoemoega o le a Suia ai La Tatou Auaunaga,” i le Liahona o Ianuari 2019.)
Ia faatatau le faia o auaunaga i tagata ae le o galuega. Na masani ona faamanatu mai ia i tatou e Peresitene Thomas S. Monson: “Ia aua lava nei avea le foiaina o se faafitauli ma mea e sili ona taua nai lo se tagata e tatau ona e alofa i ai.”⁵ O le auaunaga e faatatau i le alolofa i tagata, ae le o mea e fai. A o tatou tuputupu ae e alolofa e pei ona faia e le Faaola, o le a sili atu ona tatou mataala i le olioli lea e sau mai le auauna atu i isi.
Faafaigofie le auaunaga. Na taʻu mai e Peresitene M. Russell Ballard, Sui Peresitene o le Korama a Aposetolo e Toasefululua: “E tutupu mea sili e ala i mea faigofie laiti. … O a tatou auaunaga agalelei iti ma faatauvaa e faaputuputu e avea o se olaga e faatumulia i le alofa mo le Tama Faalelagi, ma tuuto atu i le galuega a le Alii o Iesu Keriso, ma lagona ai le filemu ma le fiafia i taimi uma lava tatou te aapa atu ai le tasi i le isi.”⁶
Aveese le atuatuvale mai le auaunaga. E le o lau matafaioi le galueaiina o le faaolataga o se tagata. E i le va o lena tagata ma le Alii. O lo tatou tiutetauave o le alofa ia i latou ma fesoasoani ia latou liliu atu ia Iesu Keriso, o lo latou Faaola.

Aua Nei Aveesea le Olioli i le Auauna Atu

O nisi taimi e mumusu tagata e fesili atu mo se fesoasoani manaʻomia, o lea o le ofoina atu o la tatou auaunaga atonu o le mea lea latou te manaomia. Ae o le faamalosia o i tatou lava i tagata e le o le tali, foi lea. O le fesili muamua mo le faatagaga ae e te le’i faia se auaunaga o se manatu lelei.

Na faamatala e Elder Dieter F. Uchtdorf o le Korama a Aposetolo e Toasefululua e uiga i se tina nofotoatasi na maua i le tane susu—ona mamaʻi ai foi lea o lana fanau. O le fale sa masani ona mamā na avea ma se fale palapalā ma gasu. Na faulala’i ipu ma tagamea.

I se taimi na ia lagonaina ai le matuai lofituina, na tuitui ai uso o le Aualofa i lona faitotoa. Latou te le’i faapea mai, “Faailoa mai pe mafai ona matou fesoasoani.” Ina ua latou vaaia le tulaga ua i ai, na amata loa ona latou gaoioi.

“Na latou faamamaina le gasu, faasusulu atu le malamalama ma le mama i le fale, ma valaau atu i se uo e fai mai se faatauga o mea sa sili ona manaomia. Ina ua faamaeaina le la galuega ma faatofa atu, sa latou tuua lena tina talavou i loimata—o loimata o le agaga faafetai ma le alofa.”⁷

Na lagona uma e le au foaʻi ma le na taliaina le mafanafana o le olioli.

Atiina ae le Olioli i Lou Olaga

O le tele o le olioli, filemu, ma le faamalieina e mafai ona tatou atiina ae io tatou olaga, o le tele foi lena o le a mafai ona tatou fefaasoaaʻi ma isi ao tatou auauna atu. O le olioli e ala mai i le Agaga Paia (tagai Kalatia 5:22 ma le Mataupu Faavae ma Feagaiga 11:13). O se mea e mafai ona tatou tatalo ai (tagai Mataupu Faavae ma Feagaiga 136:29) ma valaaulia i o tatou olaga. O nai manatu nei mo le atiina ae o le olioli i o tatou olaga:

Faitau ou manuia. Ao e suesueina lou olaga, tusi i lau api o talaaga mea ua faamanuiaina ai oe e le Atua.⁸ Ia iloa le lelei o loʻo siomia oe.⁹ Gaua’i atu i mea atonu o le a taofia ai oe mai le lagona o le fiafia ma tusi i lalo ni auala e foia ai pe sili atu foi ona malamalama i ai. I lenei vaitau o le Eseta, ia faaavanoa se taimi e saili ai se sootaga sili atu ma le Faaola (tagai Mataupu Faavae ma Feagaiga 101:36).
Faataitai le mafaufau i isi. O le fiafia e mafai ona sili atu ona faigofie ona e mauaina i taimi o le mafaufau loloto.¹⁰ Faʻalogo ma le totoa i mea e te maua ai le olioli (tagai 1 Nofoaiga a Tupu 16:15). O le le faaaluina o se taimi i auupega tafailagi e ono manaʻomia i nisi o taimi e faataitai ai le mafaufau i isi.¹¹
Aloese mai le faatusatusaina o oe lava. Ua faapea mai o le faatusatusa o le gaoi lea o le fiafia. Na lapatai mai Paulo o i latou “e fuaina i latou lava, ma ua faatusaina i latou lava ia te i latou, e le popoto” (2 Korinito 10:12).
Saili faaaliga patino. Na aoao mai le Faaola: “Afai e te ole mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau.” (Mataupu Faavae ma Feagaiga 42:61).

Valaaulia e Faatino

E faʻapefea ona e faateleina le fiafia e te mauaina i lou olaga e ala i le auauna atu?