Faamaoni Suamalie
E alaala le tusitala i Kolorato, ISA.
“Fai le mea lena e faamaoni” (2 Korinito 13:7).
“Ou te manaʻo e te vaʻaia lou tuagane,” o le tala lea a Mama. “Ma te o ma lau pa e fesoasoani i se tasi o ma’i.”
Sa ou tilotilo aʻe mai le saluina o le fola o lo matou tamai fale ma lue atu lou ulu. O Mama o le peresitene o le Aualofa, ma e masani ona alu e asiasi i tamaitai i la matou uarota.
“Faafetai lava, Arlyn,” o le tala lea a Mama, ao kisi i lou tumuai. “O loo moe Ioane. Ma o loo fefete le paluga falaoa i luga o le laulau. Faamolemole aua ete tago i ai.”
Sa ou tilotilo atu i le faitotoa ao la tietie atu ma Pa i le taavaletoso i luga o la matou auala pefu. Na ou lagona le mitamita na talitonuina aʻu e Mama.
A o ou saluina le umukuka, sa ou tu e vaai i le paluga falaoa. Sa le mafai ona ou faatali mo Mama e tao nanei. E masani lava matou te aia le falaoa fou ma le siamu na fai i le fale. Ae na uma le matou siamu i le tolu masina talu ai.
Siamu! O le manatu na mafua ai ona ou fiaai mo se mea suamalie. Sa ou tilotilo i luga i le fagu suka, i le pito i luga o le fata. Sa ou iloa na teuina e Mama e fai ai se isi siamu.
Ae o le tele o loʻu mafaufau e uiga i le suka, o le malosi foi lea o le fiaai na ou lagonaina. Mulimuli ane, na ou tosoina se nofoa i le fata ma aapa atu. Na’o sina pa’i atu lava o o’u tamatama’ilima i le fagu suka. Na ou tosoina latalata ane i le pito o le fata. …
Ona se’e lea o le fagu mai le fata! Na ou taumafai e sapo, ae na pau ma le leotele i le ogatotonu o le paluga falaoa. Na masaa solo le suka i luga o le falaoa ma le laulau ma luga o le fola.
“Auoi leai!” Na ou alaga ai. Lea na te’i ai i luga lo’u tuagane pepe. Na amata ona tagi. Na ou fia tagi foi. O le a se tala a Mama e uiga i lenei gasu?
Ina ua uma ona ou faagaina Ioane, sa ou faia le mea sili e faamama ai le suka. Na ou aveeseina le fagu mai le paluga ma fufulu. Na ou solo ese le suka mai luga o le fata ma le fola. Ae sa leai se mea e mafai ona ou faia e aveese ai le suka mai le paluga.
Sa ou mafaufau e toe tuu le fagu suka i luga o le fata. Masalo o le a le iloa e Mama ua leai se mea. Ae na ou iloa e le o le sa’o lena. O lea sa ou faatuina ai le fagu i luga o le laulau ma faatalitali mo Mama ma Pa e toe foi mai i le fale.
Ina ua la taunuu i le fale, sa iloaina e Mama le fagu suka i le taimi lava lena.
Sa ou manava loloa. “Na ou manao i se tofo o le suka. Ae na lavea ia te a’u le fagu ma pau ai mai le fata. Sa ou taumafai e faamama, ae le mafai ona ou aumaia mai le palu falaoa.” O upu na faanatinati atu ao ou tilotilo i lalo i le fola.
Sa filemu Mama mo se minute.
“Ou te faamalie atu,” sa ou musumusu atu ai.
Sa mapuea Mama. “Ia, ou te matea o le a sili atu ona suamalie le falaoa nanei,” na ia fai mai ai. Sa ou vaai atu i luga. Sa ia ataata laitiiti mai ia te a’u. “Faafetai mo le ta’uina mai ia i ma’ua o le mea na tupu.”
Aʻo matou aai i le falaoa sumalie i lena po, na matou talanoa ma Mama ma Pa e uiga i le faamaoni.
“Tatou te faia uma ni mea sese i le olaga,” o le tala lea a Pa. “Ae a tatou faamaoni ma taumafai e salamo, e fiafia le Tama Faalelagi ma Iesu. O le a faamanuiaina i tatou i taimi uma ona o le faamaoni—e tusa lava pe sili atu ona faigata i le taimi muamua.”
Sa ou faanoanoa pea na masaa ia a’u le suka. Na ou iloa atonu o le a le tele se matou siamu i lenei tausaga ona o loʻu sese. Ae sa ou fiafia na ou taʻuina le mea moni. O se lagona manaia lea e leai se suka e mafai ona tuuina mai. ●