Taulimaina o Faalavelave

I se taimi vave lava pe mulimuli ane, o le a feagai fanau ma faalavelave, pe latalata i le fale pe mamao. Ae “e tusa lava pe iai le lalolagi o lo o siomiaina i tatou i le le mautonu, e mafai ona tatou maua le faamanuiaga o le filemu i totonu.”¹ O nisi nei o mea e mafai ona e faia e fesoasoani ai i tamaiti ia lagona lena filemu.

Tulaga Mautu

Pe a tupu se mea mataʻutia, e ono lagona e tamaiti e le o paleni lo latou lalolagi. Ia avea ma se faataitaiga o le toafilemu mo i latou. Tautala lemu ma le toʻa e uiga i le mataupu. Tausisi i se faatulagana masani i le mea e te mafaia. Fai mea uma e mafai ona e faia e faaauau ai le faiga o afiafi faaleaiga, suesueina o tusitusiga paia, tatalo, ma isi tu masani a le aiga. I se taimi, e mafai e fanau ona aoaoina e tusa lava pe luluina lo latou lalolagi, e aumaia e le talalelei le malamalama ma o le a faaauau pea le olaga.

Faaaloalo

Faaali le faaaloalo mo lagona o tamaiti. Faalogo i tamaiti ma faailoa atu o latou lagona. Faaali atu ia i latou o loʻo e manatu mamafa i o latou popolega. Tuu atu avanoa ia i latou pe a latou manaʻomia ae ia latou iloa o loʻo e avanoa pe a latou sauni e talanoa. Tali faʻamaoni fesili ao latou tulaʻi mai i se auala talafeagai ma lo latou matutua. Ia iloa e lau fanau e mafai ona latou talanoa atu ia te oe e uiga i o latou popolega ma atugaluga.

Taiala

Atonu e fesili lau fanau, “Aisea e faataga ai e le Atua ia mea leaga e tutupu?” Faamalamalama atu o taimi lelei uma ma taimi leaga o se vaega o le olaga ma o se vaega o le fuafuaga e faavavau a le Atua. Na te faatagaina tagata taitoatasi e faia a latou lava filifiliga, ma o nisi taimi e fai ai e tagata filifiliga leaga e mafua ai mafatiaga. O isi taimi, o faʻalavelave e le mafua ona o se tasi, ae o se vaega o le natura. Po o le a lava le mea e tupu, o loo i ai le Tama Faalelagi iina mo i tatou. Faatasi ai ma Lana fesoasoani, e mafai ai ona tatou aoao ma tuputupu ae, e oo lava i aafiaga tiga. E mafai ona tatou liliu atu ia te Ia e maua ai le filemu.

Faamalosia

Faaali i tamaiti o loʻo i ai le mana ia i latou e faia ai se eseesega e ala i le tuuina atu ia i latou o se auala e fesoasoani ai. Mo se faʻataʻitaʻiga, e mafai ona latou fesoasoani i le aoina o foaʻi mo tagata na afaina, asiasi i se uo maʻi po o manuʻa i le falemaʻi, faʻafiafia se tasi o loʻo feagai ma se maliu i le aiga, pe tatalo mo i latou o loʻo tauivi. E le mafai ona tatou faaleleia mea uma, ae ua ia i tatou le malosi e faia ai le tele o mea lelei, ma “tatou te galulue mo le filemu i soo se taimi tatou te fesoasoani ai e faamama avega a le isi tagata.”²

Faamafanafana

Faamanatu i lau fanau e alofa le Atua ia i latou ma e te alofa ia i latou. Aua nei e faia ni folafolaga pepelo e leai se leaga o le a tupu ia i latou, ae ia faamautinoa ia i latou o loo latou saogalemu i le taimi nei ma o le a e faia mea uma e te mafaia e puipuia ai i latou. Faamautinoa atu ia i latou o le Tama Faalelagi o le a fesoasoani ia i latou i soo se tofotofoga e oo mai i lo latou ala.

Afai e te lagonaina e oe lava le lotovaivai i faigata, ia manatua i le iuga, o le a manumalo le lelei i le leaga. “O loo tatou tau ma le agasala, … ae le moomia ona tatou lotovaivai,” na aoao mai ai Peresitene Thomas S. Monson (1927–2018). “O se taua tatou te mafaia ma o le a tatou manumalo. Ua tuuina mai e lo tatou Tama o i le Lagi ia auupega tatou te moomia e tau ai. O i ai o Ia i le foeuli. E leai se mea tatou te fefefe ai.”³