Reykjavík, Aiselani

Ata

reykjavik

Faʻatasi ai ma le ufitia o le Mauga o Esja i le kiona i tua, o Reykjavík, le laumua felanulanua’i a Aiselani, o faʻafeiloai atu i se motu e silia ma le 1,000 maila (1,609 km) mai le atunuu tele o Europa. Na muamua nofoia e le Vikings i le TA 874, o Reykjavík o le fatu lea o gaoioiga faaleaganuu, tamaoaiga, ma gaoioiga faalemalo a Aiselani, faapea foi ma se tasi lea o aai e sili ona mama, lanumeamata, ma saogalemu i le lalolagi.

O tagatanuu Aiselani muamua e toalua na papatisoina i Tenimaka i le 1851. E lei leva ae toe foi atu i Aiselani, ma i le 1853 na faatulagaina ai le uluai paranesi. I le aso ua lata i le 300 tagata o le ekalesia i Aiselani i paranesi e tolu, i Reykjavik, Akureyri, ma Sellfoss. O le malumalu e sili ona latalata e i Lonetona, Egelani, e 1,177 maila (1,894 km) mai Reykjavík.

E ui e toaitiiti le aofai o le au paia, o loo faaauau pea ona ola le Ekalesia. E ui i luitau o le mamao, o le faaliliuga o tusi a le Ekalesia, leaga o le tau, ma papuipui faaleaganuu, ua folafola mai e taitai o le Ekalesia o le a avea Aiselani ma se faailo i isi atunuu i se aso. Na asiasi atu Peresitene Gordon B. Hinckley (1910--2008) i Aiselani ma faamanatu atu i le au paia o i latou o “tagata o le ‘malosi ma le mana ma le gafatia’ e faia mea sili” (“Wonderful to Have Sweet, Good Land,” Church News, Sept. 21, 2002, 10).

Na faavaeina le Misiona a Aiselani i le 1894, ae na faamutaina le galuega tala’i i le 1914. Na avea Aiselani o se vaega o le Misiona a Tenimaka Copenhagen i le 1975.
I le 1977, na faapaiaina ai e Elder Joseph B. Wirthlin (1917–2008), o lē na avea i lena taimi ma se tasi o le Korama Muamua a Fitugafulu ia Aiselani mo le talaiina o le talalelei.
I le 1981 na lomia ai le Tusi a Mamona i le gagana Aiselani—o se gagana e le tautalagia i se isi lava nofoaga i le lalolagi.