O Le Pelaue o Loo Misi
E alala le tusitala i Iowa, ISA.
“O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (Mataupu Faavae ma Feagaiga 64:10).
“Tina, ua leai so’u pelaue!” Na fai atu ai Brad. Ua oo i le taimi e alu ai i le fale mai le lotu, ae ua le mafai ona maua e Brad lona pelaue i luga o le tautau lavalava.
“E te mautinoa o iina na tautau ai?” O le fesili lea a tina.
“Ioe. O i tonu lava.” O le pelaue a Brad e lanumoana sesega ma lanu mumu. Sa faigata ona misi i le vaai.
“Masalo na faame’i e se isi. Tatou tilotilo solo i le fale,” o le tala lea a Tama.
Na vaevae Tina, Tama ma Brad e siaki potu eseese. Na latou tilotilo i le pusa ua leiloa-ma-maua, i le falesa, i le potu aoga o le Aoga Sa a Brad, i le potu Peraimeri, ma i luga o tautau lavalava uma. Sa latou tilotilo foi i totonu o potu taele, ae latou te leʻi maua le pelaue.
“Leiloa pe na ave sese e seisi. Ou te mautinoa o le a latou toe faafoi mai i le vaiaso a sau pe a latou iloa e le o latou e anaina,” o le tala lea a Tama.
“Mo le taimi nei, e mafai ona e ofuina lou pelaue tuai,” na fai mai ai Tina.
Sa faauu Brad. E le’i fiafia i lona pelaue tuai. Sa manifinifi, matafi, ma laitiiti tele mo ia. Sa fiafia o ia i le auala na foliga ai lona ofu fou lanumumu-ma-le-lanumoana na foliga mai ai o ia o se tagata maoae ma le lototoa.
“Atonu na iloa e se tagata le manaia o loʻu pelaue ma tago gaoi,” o le mafaufau lea o Brad. E mafai faapefea ona tupu lea mea i le lotu? O tagata uma iina e tatau ona faamaoni. E le mafai e Brad ona faʻatagaina lena tagata faomea ia sao. Sa i ai sana fuafuaga. O le Aso Sa e sosoo ai, o le a ia mataala ma le totoa e vaai po o ai o loʻo ofuina lona pelaue. Ona ia toe toso mai lea ma ee atu, “Taofi, gaoi!” O le a latou lagonaina le salamo na latou aveina.
Sa le mafai ona faatali Brad mo le Aso Sa e faataunuu ai lana fuafuaga. Ae o le Aso Sa na sosoo ai na matua mafanafana tele mo pelaue, ma faapena foi le Aso Sa na sosoo ai.
O le Aso Sa ina ua mavae lena, na tilotilo solo Brad ma le masalosalo i le Peraimeri i tama uma, ma mafaufau po o ai na gaoia lona pelaue. Pe o le tamaitiiti umi lale? Pe atonu foi o se teine. Na lagona e ia e le mafai ona ia talitonu i se tasi. Sa le fiafia Brad i lena lagona.
Ina ua uma le lotu na faatopetope atu Brad faataamilo i le fale, matamata i aiga o fai o latou pelaue. Ae na te leʻi vaaia lona pelaue i se mea. Na ia siaki foi le pusa na leiloa-ma-maua … ae leai se pelaue. Po o fea o i ai?
A o agai atu i le fale, sa mafaufau Brad i se fuafuaga fou. O le a ia tatalo. Sa ia iloa e mafai ona maua e le Tama Faalelagi mea leiloloa. O le po lena na tatalo ai Brad ma fai atu, “Tama Faalelagi, faamolemole taʻu mai po o ai na aveina loʻu pelaue. Ou te manao e toe faafoi mai.”
Sa faatalitali Brad mo le igoa po o foliga o le tagata faomea e oo mai i lona mafaufau. Ae nai lo lena na amata ona ia mafaufau e uiga i lana uo o Carl. E masani ona nofo Brad i autafa o Carl i le Peraimeri. La te tausua ma talie faatasi i le tele o taimi. Ae e leʻi lotu Carl i ni nai vaiaso. Na misia o ia e Brad.
Ae faapefea pe afai o Carl na aveina lona pelaue? Masalo na fefe Carl e sau i le lotu i le taimi nei ona ua manatu o Brad e le toe avea ma ana uo. Na manao Brad e toe sau Carl i le lotu. Afai na ave e Carl lona pelaue, na filifili Brad, o le a le ee ia te ia. O le a ia faamagalo ia te ia.
Na oso i totonu o lona moega, ma se lagona e sili atu.
O le Aso Sa na sosoo ai i le Peraimeri, e le’i i ai Carl, ae na i ai se tamaitiiti fou. Na fai sona fusiua tosi mumu-ma-le-lanumoana.
“Manaia lou fusiua,” o le tala lea a Brad, ma nofo i autafa o le tamaitiiti fou. “Ua pei ai oe o se tagata maoa’e ma le lototoa.”
Sa ataata le tamaitiiti.
Sa ataata foi Brad. Na te lei toe saili mo ni tagata faomea. Na ia sailia ni uo. ●