O Se Valaaulia mo Ricardo

Martin Apolo Cordova

Paraná, Pasila

Pe a ou faalogo e uiga i se gaoioiga a le Ekalesia, ou te valaaulia pea lava pea ni tagata se toa 10 e le auai i le Ekalesia e auai. Ua ou faia lenei mea mo le tele o tausaga. Ou te faia ni valaaulia ma tuu taitasi i totonu o se teutusi paʻepaʻe ma tatalo mo le Agaga e taialaina aʻu. Ona ou tuuina atu lea o valaaulia. E seasea auai uma mai le toa 10, ae tusa lava pe tasi e auai, ou te lagona ua faamanuiaina a’u taumafaiga.

I nai tausaga ua mavae, sa ou saunia ni valaaulia se sefulu i se faigalotu mo ulugalii faaipoipo. Na ou tuuina atu le iva i tagata i le galuega ae tasi na totoe. Sa ou le iloa po o ai e tuuina atu i ai. I nai minute mulimuli ane, na pasi ane ai i laʻu kesi, Ricardo, o se sui faatau oloa. Na ou lagona le uunaiga e valaaulia o ia, e ui lava na ia teenaina se valaaulia mai se isi tagata faigaluega e auai i se gaoioiga i lana lotu. Ou te leʻi manatu o le a fia sau Ricardo.

Ae ina ua toe pasi ane Ricardo i laʻu kesi e alu i fafo, sa ou toe lagonaina le uunaiga. Ae peitai, na ia aluese vave ma ou le maua ai se avanoa e talanoa ia te ia. Sa ou tatalo ina ia toe foi mai Ricardo pe afai e tatau ona ou tuuina atu ia te ia le valaaulia.

Ina ua maea laʻu tatalo, na toe foi mai Ricardo e fesili mai ia te a’u. Mulimuli ane, sa ou fai atu, “Ricardo, e faia se gaoioiga mo ulugalii faaipoipo i la’u lotu. O le a matou fefaasoaai ni aafiaga i auala e ola fiafia ai i aso taitasi. Mulimuli ane, o le a faia se siva. Afai ou te valaauliaina oe, pe o le a e sau?”

“Ioe!” Fai mai ai Ricardo, ae o lana tali na le faatalitonuina ai a’u.

“O le mea sili na ou faia laʻu vaega,” sa ou mafaufau ai.

Sa ma vave taunuu ma loʻu toalua i le gaoioiga e faafeiloai tagata ao latou taunuu mai. Na faafuasei ona ou vaai ia Ricardo ma lona toalua, o Regina. Sa ou faʻafeiloaia i la’ua i loʻu toʻalua ma isi o loʻo auai. I le afiafi atoa, na foliga mai Ricardo ma Regina na la mauaina lava le fiafia. Na ou teʻi ina ua la fai mai o le a la o mai i le lotu i le Aso Sa e aoao atili.

Na mafai ona aoao atili Ricardo, Regina ma le la fanau e toalua. Na i’u lava ina latou auai i le Ekalesia. Mulimuli ane, na faamauina i latou i le malumalu. Sa taʻu mai e Ricardo ia te au i se tasi taimi sa la talatalanoa ma lona toalua e uiga i le teteʻa, ae na taitaiina e le Alii ia Ricardo i loʻu ofisa.

Talu mai lena taimi na ou ole atu i le Atua ina ia faamagalo mai au ona o lou mafaufau o le a le talia e Ricardo laʻu valaaulia. Ua ou aoaoina e taua le valaaulia o tagata uma. E te le iloa lava po o ai o le a taliaina.