Fesili & Tali
“E mafai faapefea ona fesoasoani lo’u faamanuiaga faapeteriaka ia te au e fai a’u faaiuga?”
O La Tatou Liahona Patino
O faamanuiaga faapeteriaka o se auala lea e fesoasoani ai le Tama Faalelagi ia tatou iloa lo tatou muai olaga, olaga faitino, ma le faasinomaga e faavavau. O le iloaina o nei upumoni faapitoa e tolu e uiga ia i tatou lava, e fesoasoani tatou te mulimuli ai i le fuafuaga a le Atua mo i tatou. Tatou te iloa po o ai i tatou, pe aisea ua tatou i ai iinei, ma po o fea e mafai ona tatou i ai. E pei ona galue le Liahona e tusa ai ma le faatuatua ma le maelega o Nifae ma lona aiga i le mulimuli i ana fautuaga (tagai i le 1 Nifae 16:28), e mafai foi ona tatou faamaoni ma filiga i le mulimuli i la tatou lava Liahona ma ana fautuaga, lea o le a taialaina ai i tatou i lo tatou malosi faaleatua.
Elder Utai, 20 tausaga, Misiona a Atenitina Salta
O Se Vaaiga e Faavavau
Soo se taimi lava ou te lagona ai le leai o se faamoemoe i le faia o faaiuga, ou te liliu atu i loʻu faamanuiaga faapeteriaka ma mafaufau loloto i ana faaaliga paia. Ona faigofie ai lea o le filifiliga. E le gata ina fesoasoani ia te au e onosaia loʻu olaga faalelalolagi ma selesele folafolaga folafolaina, ae e faamanatu mai ai foi ia te au le saunia o au e ulufale atu ma le agavaa i le malo o le Alii i se aso. E fesoasoani pea ia te au e tuputupu ae i le faatuatua, talitonu i le finagalo o le Alii, ma ola ai i se vaaiga e faavavau.
Abegail F., 18 tausaga, Vanu o Cagayan, Filipaina
Fautuaga Faalelagi
O loʻu faamanuiaga faapeteriaka e aumaia ai ia te au le fautuaga mai loʻu Tama Faalelagi. Afai ou te mulimuli i lena fautuaga, ou te iloa o le a ou maua faaaliga i faaiuga e tatau ona ou faia. Na te taliina nisi o aʻu fesili ae ou te leʻi fesili atu.
Cami H., 16 tausaga, Iuta, ISA
Faalogo i le Agaga
Afai o loo e sailia le faamafanafanaga ma le taitaiga po o se tali i se fesili taua, e mafai ona e tatalo ma le faamaoni e uiga i ai ma faitau lou faamanuiaga faapeteriaka ma le manatu moni o le loto, ao e faalogo atu i le Agaga. O le suesueina o tusitusiga paia e fesoasoani foi. Ou te talitonu afai e te faia lenei mea ma le faatuatua moni, o le a tali mai le Alii ia te oe, i Lana lava taimi, i le auala sili.
Kezia P., 15 tausaga, Hawaii, ISA
Faamanuiaga Folafolaina
O faamanuiaga faapeteriaka e taʻu mai ia i tatou mea e finagalo le Atua e faamanuia ai i tatou. Na te tuuina mai ia i tatou lapataiga ma faamatala pe mafai faapefea ona tatou avea atili e faapei o Ia. Pe a tatou iloa mea o loo teuina e le Tama Faalelagi mo i tatou ma auala e maua ai, o le a tatou filifili ma faatino e tusa ai ma le mauaina.
Hunter H., 18 tausaga, Iuta, ISA